Ua talia e le afioga i le ali’i fa’amasino ia John L. Ward II le talosaga a le afioga i le tamaitai faipule mai le Itumalo o Tualauta ia Vui Florence Vaili Saulo, ina ia auai o ia i le iloiloga o le talosaga e fa’asaga i le Komesina o Palota lea na fa’aulu e le susuga a Su’a Lucia Bartley.

O le itula e 1:00 i le aoauli ananafi na valaauina ai lenei mataupu i luma o le Fa’amasinoga Maualuga a Amerika Samoa, ma e le i umi se taimi na faatautaia ai lea iloiloga ae mae’a, ina ua fa’ailoa e loia mai itu e tolu le leai o se isi e fa’atuiese i le talosaga na fa’aulu e alii loia e to’alua o lo o tula’i mo Vui, le susuga ia Marcellus Talaimalo Uiagalelei ma Toetasi Tuiteleleapaga.

O le alii loia ia Richard DeSaulles o lo o tula’i mo le susuga a Bartley ae o Gwen Tauiliili- Langkilde o lo o tula’i mo le Ofisa o Palota, ae na o le afioga i le ali’i fa’amasino ia Ward na iloiloina lenei mataupu.

Ina ua nofoia le fa’amasinoga ananafi, na fesili le ali’i fa’amasino ia Ward pe i ai se itu e fa’atuiese i le talosaga a Vui, ae na tali DeSaulles ma Gwen e leai se isi o i laua e fa’atuiese i le talosaga ua i luma o le fa’amasinoga.

Ina ua fa’aalia e Ward le talia o le talosaga, sa talosaga ai loa le ali’i loia ia Uiagalelei i le fa’amasinoga, mo se avanoa e vave fofogaina ai lenei mataupu ao le i o o i le aso o le palota, ona o lo o naunau le tamaitai faipule ia Vui, e le tatau ona fa’alavelave le mataupu lenei mo tapenaga mo le palota o lo o loma nei.

Na soisoi le alii fa’amasino ia Ward ma ia saunoa atu i le ali’i loia e fa’apea, o le a silasila toto’a le fa’amasinoga i le talosaga, ina ia vave faia se iloiloga o lenei mataupu i se taimi lata mai.

Na fa’ailoa fo’i e Ward i loia, e tatau ona o o atu i le afiafi lava ananafi ua i totonu o pusa a loia o lo o i le fale fa’amasino se faasilasila mo se aso talafeagai e tatau ona valaau ai lenei mataupu.

O le mataupu lenei na tofu atu i luma o le Fa’amasinoga, ina ua teena e le Komesina o le Ofisa o Palota ia Tuaolo M. Fruean le talosaga na fa’aulu e Bartley e fesiligia ai le le agavaa o Vui e avea ma sui tauva o le Itumalo o Tualauta i le palota o lo o loma nei, e tusa ai o tulaga o tulafono ma faiga faavae tau palotaga.

I se tusi sa tuuina atu e le Ofisa o Palota i luma o le Fa’amasinoga e talosagaina ai le teena o le talosaga a Bartley, o lo o fa’amanino ai le agava’a o Vui e avea ma sui tauva mo le palota o lo o loma nei.

O le autu o le finau a Bartley e tusa ai o lenei mataupu, e tatau ia Vui ona fa’ailoa lona pepa fanau ina ia fa’amaonia ai o ia o le Nesionale o le Iunaite Setete, ma ia tusa ai ma ta’iala o tulafono tau faiga palota, peita’i na taua e Vui i se vaega o lana talosaga ua i luma o le fa’amasinoga, o le itu o lo o taumafai Bartley e finau i le fa’amasinoga, e le gata e leai ni mau fa’amaonia e lagolago ai, ae ua atagia mai ai fo’i lona taumafai e fa’aleaga lona tagata.

Na taua e Vui i lana talosaga e fa’apea, o pepa fanau a Amerika Samoa mo so o se tasi e soifua mai i Amerika Samoa, e le gata e afua mai i le Matagaluega o le Soifua Maloloina, ae o lo o faamaumauina fo’i i le Ofisa o Lesitala o Pepa Fanau.

E talitonu Vui, e leai se vaega a le Ofisa o Palota e faia i le mataupu lenei o pepa fanau, aua o fa’amaumauga uma nei e maua mai i isi Ofisa o le malo e pei ona ia taua.

Sa ia taua fo’i i se vaega o lana talosaga e fa’apea, o le tuuina atu la o se ituaiga talosaga fa’apenei i luma o le Komesina o Palota e fesiligia ai le pepa fanau o se isi tagata, o se faiga ua atagia mai ai le leai o se mafuaaga sa’o ma lelei ua ala ai ona laga lenei mataupu, ae ona o se taumafaiga e fa’aleaga o ia.

E talitonu fo’i Vui ma lana itu, o le tuuina atu o ituaiga mataupu faapenei i luma o le faamasinoga, e iloilo pe talanoaina ai fa’amaumauga fa’asaga i se tagata, o se tulaga lea e leai sona fa’avae i lalo o le tulafono e iloilo ai, aua o mataupu lava e fitoitonu i faiga faapalota.

I le faaiuga o le talosaga a Vui na faaulu e ana loia, o lo o ia talosagaina ai le faamasinoga ina ia faaleaoga le talosaga a Bartley e tusa ai o lenei mataupu.

I se tusi sa tuuina atu e Bartley ia Tuaolo i le aso 5 Setema 2014, sa ia taua ai lona faauluina o lenei lava talosaga i le 2012, faatasi ai ma Esther Walls lea fo’i sa avea uma i laua ma sui tauva mo le Itumalo o Tualauta i le palota o lea tausaga, peita’i sa leai se faaiuga a le faamasinoga e tusa ai o le la talosaga, ona e talitonu le faamasinoga ua tuai le taimi na faila ai le la talosaga.

I se vaega o le talosaga mai le Ofisa o Palota sa tuuina atu i le faamasinoga e teena ai le talosaga a Bartley, e le gata o lo o taua ai le uluai taimi na faila muamua ai e Bartley ma Walls le talosaga lenei i le 2012, ae o lo o taua ai fo’i le maea ona iloiloina e le Ofisa o Palota o ta’iala uma ma aiaiga e agava’a ai ona avea Vui ma sui tauva mo le palota o lo o loma nei, ma ua manino mai ai le agava’a o ia e tusa ai o ala o le tulafono o faiga palota.

Sa tuu faatasi atu i le talosaga a le Ofisa o Palota le kopi o le tusi folau a Vui e faailoa atu ai, o lona tusi folau Amerika o lo o taua ai, o ia o le Nesionale o le Iunaite Setete, ma so o se tagata na te umia le tusi folau a le Iunaite Setete e pei ona taua e le Ofisa o Palota i le latou talosaga, o le tagata lea na soifua mai i totonu o setete ma teritori o le Iunaite Setete e aofia ai Amerika Samoa ma le motu o Swains Island.