Ads by Google Ads by Google

Talia EFKAS talosaga a se pagota i le agaga fia fesoasoani

O le faaiuga a le Ekalesia EFKAS e avea le alii pagota o Tone Pulou o se tasi o tagata faigaluega a le Ekalesia, na faavae i luga o le talitonuga o le Ekalesia, o lo o manaomia e Pulou se fesoasoani tau tupe ina ia mafai ai ona totogi tupe ua poloaina e le Faamasinoga Maualuga o ia e totogi.

O se vaega lea o le molimau a le susuga i le Feagaiga ia Rev. Reupena Alo, o le Failautusi Aoao a le Ekalesia, ina ua fesiligia e le Faamasinoga Maualuga i le taeao ananafi, e faamanino le faaiuga a le Ekalesia e faa faigaluega Pulou i le Ofisa a le Ekalesia, i lona nofoaga autu i Kanana Fou.

O le aso 22 o Oketopa na tuuina atu ai e Rev. Alo sana tusi i le Faamasinoga Maualuga, e faamaonia ai ua talia e le Ekalesia le avea o Pulou o se tasi o ana tagata faigaluega, ae faamoemoe lava le amata galue o lea alii i le galuega ua ofo mai e le Ekalesia pe afai e talia e le Faamasinoga lana talosaga e tatala o ia i tua e faigaluega.

O le tusi a Rev. Alo na tuu atu faatasi ma se tusi mai le loia fautua a Pulou, o Michael White, e talosagaina ai se poloaiga a le faamasinoga e tatala ai Pulou i tua e faigaluega ma tuli pea lona faasalaga.

O le alii o Pulou o lo o tuli sana faasalaga faafalepuipui e 28 masina i le toese i Tafuna, ina ua tausala o ia e le Faamasinoga i le moliaga o le faiaiga ma se teineititi e 13 tausaga le matua ma i’u ina ma’itaga ai lea tamaitai.

Na fa’aalia e le alii Faafeagaiga, o totogi uma a Pulou, o le a tuu atu uma i le faamasinoga e totogi ai tupe sa poloaina e le faamasinoga Pulou na te totogia, e aofia ai le ta’i $100 i masina e fesoasoai i le tausiga o le pepe a le tamaitai na ma’itaga ia te ia, ma le toe totogia o le tupe a le malo na faaalu e toe aumai ai o ia i Amerika Samoa nei, i le aofaiga e $5,651.20.

Na molimau foi Rev. Alo, e fuafua le amata faigaluega o Pulou  i le talia e le faamasinoga o le talosaga, ae o le amataga o Tesema lea ua manatu le Ekalesia e tatau ona amata galue ai lenei alii i lana galuega.

Na fesiligia e le loia a le malo, o Mitzie Jessop ia Rev. Alo pe na te iloa o Pulou ua ta’usala i le solitulafono o le faiaiga ma se teineititi e 13 tausaga le matua, na tali le molimau, o lea lava.

Na toe fesili Jessop ia Rev. Alo pe i ai ni aoga e pulea e le Ekalesia, ae pe mamao ese foi ma le nofoaga o lo o i ai le Ofisa autu lea o le a galue ai Pulou, na tali le molimau, e lua aoga a le Ekalesia o lo o i ai faatasi i le nofoaga o lo o i ai le Ofisa autu a le Ekalesia i Kanana Fou, ma pe tusa ma le 100 mita le mamao ese o faleaoga ma le Ofisa.

O atugaluga o le malo, e le tatau ona toe i ai se fesootaiga a le ua molia ma tamaiti aoga, ona o le siosiomaga o le solitulafono lea ua ta’usala ai o ia.

Na toe fesiligia e le alii faamasino lagolago ia Mamea Sala Jr le molimau, i le mamao o le faleaoga ma le Ofisa lea o le a galue ai Pulou, ae na faatusa e le molimau, e pei lava o le va o le Fale Faamasino ma le Falemeli i Fagatogo.

Sa fia iloa e Mamea taimi e masani ona o atu ai tamaiti aoga i le Ofisa, ae na tali le molimau, e seasea o atu tamaiti aoga i le Ofisa, ae se’i vagana lava taimi e totogi ai a latou pili aoga, po o nisi foi mataupu tatau.

Na faaalia e Rev. Alo, e tusa lava pe ese se talitonuga a Pulou, e le avea lea ma itu e suia ai le faaiuga a le Ekalesia, i le tuuina atu o lana fesoasoani i le tagata ua sulu atu i le Ekalesia mo se fesoasoani.

I le i’uga o lenei iloiloga, na talia ai e le faamasinoga le talosaga a Pulou ma o le 7 i le taeao o Aso Gafua seia pa’ia Aso Faraile, o le a tatala ai lenei alii mo lana galuega, ae e tatau ona toe foi i totonu o le falepuipui i le 4:30 i le afiafi.

I fafo o le potu faamasino ina ua maea le iloiloga, na taua ai e Rev. Alo e faapea, o le isi manatu autu na vaavaai i ai le ekalesia, e tatau ona totogi atu e Piulou le tupe ua poloaina e le faamasinoga o ia e totogi, e tausi ai le pepe a le tamaitai lea na ma’itaga ia te ia, ona e vaavaai alofa foi le ekalesia i le lumanai o le pepe lenei.

Fai mai Rev. o le faanaunauga a le ekalesia, o le taimi lava e maea ai ona totogi atu tupe  ua poloaina e le faamasinoga le ua molia na te totogiina, o le taimi foi lea e muta ai le avanoa  ua tuuina atu ia te ia e galue ai.