Ads by Google Ads by Google

Talia e le malo le fautuaga a le Komiti o le Pone

Ua talia e le afioga i le ali’i kovana se fautuaga sa tu’uina atu e le Komiti o le Pone a le malo (ASEDA), ina ia aofia i le talanoaina o le Paketi a le malo mo le tausaga tupe fou 2016, Ofisa uma a le malo o loo maua mai ai tupe e fesoasoani ai i le atina’e ma le tamaoaiga o le malo.

 

Na taua e le Fa’atonusili o le Ofisa o le Paketi a le malo ia Cathy Saelua i le fonotaga a le Kapeneta i le aso Faraile na te’a nei e fa’apea, o le tele o tausaga ua mavae pe a talanoaina le paketi fa’ai’u a le malo, e na o le fa’atonusili lava o le Ofisa o le Paketi, Teutupe ma le Kovana e faia le iloiloga fa’ai’u, ao lei tuuina atu le paketi e iloilo e le Fono Faitulafono.

 

“O lenei tausaga ua manatu ai le Komiti o le Pone a le malo, ina ia aofia uma ofisa ma matagaluega a le malo o loo galulue i le sailiina mai o tupe i le talanoaina o le paketi, ina ia mafai ona i ai so latou leo i auala e fa’asoasoa ai le paketi fa’ai’u a le malo,” o le saunoaga lea a Saelua i luma o le kapeneta.

 

I le fonotaga a le kapeneta i le masina o Me na te’a nei, sa fa’ailoa ai e Saelua le i ai o se fautuaga ua mae’a ona tuuina atu e le Komiti o le Pone i auala e iloiloina ai le paketi a le malo.

 

O lea fautuaga mai le Komiti o le Pone na fa’atoa fa’alauiloa i le fonotaga a le kapeneta i le vaiaso na te’a nei e le Fa’atonusili o le Ofisa o le Paketi, o ia fo’i o se tasi o totino o le Komiti o le Pone, e aofia ai ma fo’i ma le Teutupe ma isi faatonusili o matagaluega eseese a le malo.

 

O ofisa a le malo ua fautuina le aofia i le taimi e iloiloina ai le paketi fa’ai’u a le malo e aofia ai le Loia Sili lea o loo vaavaaia le Ofisa o Femalagaaiga; O le Fa’atonusili o le Ofisa o Pulega o Taulaga ma Malaeva’alele; Fa’atonusili o le Matagaluega o Fefa’atauaiga ma Alamanuia mo le vaega o Laisene pisinisi; O le Ofisa Fa’atonusili o le ofisa a le TOFR, faapea ai fa’auluuluga o Ofisa Tumaoti a le malo e aofia ai le Pulega o le Eletise ma le Suavai (ASPA) ma le Faalapotopotoga o Fesootaiga a Amerika Samoa (ASTCA).

 

O le aso Lua na te’a nei na faia ai le ulua’i fonotaga a le kovana ma sui o Ofisa uma nei ma le fa’amoemoe e tatau ona mae’a le paketi ao lumana’i ai le tuuina atu i luma o le Fono Faitulafono mo le iloiloina, i totonu o le isi lua vaiaso.

 

Saunoa Saelua e fa’apea, o le taua o le auai o sui o ofisa a le malo o loo galulue i le sailiina mai o tupe mo le malo i le talanoanina o le paketi, e le gata latou te silafia ai alaga tupe o loo fa’amoemoe le malo e fa’atupe ai ana galuega fa’atino, ae o se auala lelei fo’i lea e mafai ai ona latou fautua atu i itu e tatau ona fa’aleleia, fuafua lea i le malosi o tupe o loo maua mai e a latou ofisa.

 

Na fa’ailoa e le ali’i kovana i lana kapeneta e fa’apea, e ui e le fou ia i latou le mataupu e fa’atatau i le paketi, peita’i e le avea le masani ma itu e fa’atalale ai fa’atonusili i le iloiloina toto’a o le paketi a lona ofisa, ao lei tuuina atu mo le pasiaina.

 

“Pau la’u fautuaga ia te outou uma o Fa’atonusili, aua le tu’u tia’ia le paketi a lou ofisa e iloilo ma fa’atulaga e i latou o loo galulue i le vaega o tupe a lou ofisa, o le tiute lena a oe le fa’atonusili, ia e mautinoa lelei o mea uma o loo i totonu o lau paketi o loo sa’o ma tonu, ma, o le manaoga uma o loo aofia i totonu, o mea na o loo e mana’o i ai pe a amata le tausaga tupe 2016,” o le saunoaga lea a le ali’i kovana.