Ads by Google Ads by Google

Talia e le faamasinoga talosaga a se toeaina 94 tausaga

Ua talia e le Faamasinoga Maualuga se talosaga na faaulu e se toeaina e 94 tausaga lea o lo o tuuaia i lona faia o ni uiga mataga i se alo a se tasi o lana fanau, tauala atu i lana loia fautua o Sharron Rancourt, ina ia aua nei aofia i le iloiloga a le faamasinoga molimau a le alualutoto o lo o aafia i lenei mataupu.O lo o tau saili pe na faapefea ona faatautaia le faatalatalanoaga o le teineititi, pe na tusa ai ma ala o le tulafono.E le o mafai ona faalauiloa le suafa o lenei tama matua, ona o le la fesootaiga ma le alualutoto e 4 tausaga o lo o aafia i lenei mataupu.O le mataupu lenei na alia’e mai i le amataga o le tausaga na tea nei.O se tasi itu na manatu le faamasinoga e faamamafa ao sauni e iloilo le molimau a le teineititi na aafia, pe talafeagai ona molimau lenei alualutoto i luma o le faamasinoga, ae po o fesili na fesiligia ai o ia i le taimi o le faatalatalanoaina o lenei mataupu, na tonu ma gafatia i le malosi o lona mafaufau ma lona iloa ua i ai.Ina ua maea ona matamata alii faamasino i se ata sa pu’eina i le taimi na fesiligia ai lenei alualutoto, na faaiuina ai e alii faamasino e faapea, o le teineititi ua matua laititi lava ma e le’i mau gagana fo’i o ia ina ua fesiligia faafia e le leoleo ma lona tama i le fesili lava lea e tasi e faatatau i le faalavelave sa tupu, ma ua lava lea faamaoniga i le laititi tele ma le le malamalama o lona mafaufau.Fai mai le faamasinoga, e foliga mai o le fesili ua aga’i sa’o atu “ia grandpa” ae galo ai ona fesiligia le teineititi i le mafuaaga o le lavea o lona “itutinosa” i le taimi na taalo ai i luga o le tuugamau a lona aiga.I le aotelega la o le faaiuga a le faamasinoga, e tasi lava le autu o fesili na tuuina atu i le teineititi, “pe sa tago grandpa ia te ia, ae o fea fo’i o ia na tago ai grandpa.”Fai mai le faamasinoga, e tiga lava ona leai se tali a le teineititi i ni isi o taimi, ae sa faaauau lava ona fesiligia o ia ma o ni isi o taimi e manino mai ai i le tali a lenei alual toto e ala i le “lulu o lona ulu”, e le o malamalama lelei o ia i le mea o lo o fai.O se tasi o itu na faamanino e le faamasinoga i lana faaiuga, o le siosiomaga na i ai le teineititi i le taimi na fesiligia ai o ia e lona tama ma le leoleo, ona o ni isi o taimi e toeititi ai lava tagi o ia ona o le auala na fesiligia ai o ia, e pei o le tala a lona tama sa fai i ai e faapea, “e le sasaina oe,” pe afai ete tali i le fesili, ae o le isi foi taimi na fai i ai le leoleo e faapea, “afai e te tago e faasino mai le vaega o oe na tago ai grandpa ona e alu loa lea i le fale,” o ni isi o nei uiga na taua e le faamasinoga, o ni faiga tau faafefe i le teineititi.O le afioga i le alii faamasino sili ia Michael Kruse na taulimaina lenei mataupu, i le lagolagosua a afioga i alii faamasino lagolago ia Logoai Siaki ma Faamausili Faasua Poumele.