Fa’atulaga vaega tupe e totogi ai malaga loia

Ua talia e le Faamasinoga Maualuga le talosaga na fa’aulu e le tamaitai loia fautua lea ua tofia e tulai mo Siaumau Siaumau Jr., mo se vaega tupe mai i le malo, e na te auai atu ai i se a’oa’oga o le a faia i Amerika, ina ia mafai ai ona aloaia lona tauaveina o le mataupu faasaga i le ua molia, ona o lea o lo o i ai se talosaga  a le malo ina ia fa’asala Siaumau Jr., i le oti.

Ua pasia e le fa’amasinoga, le fa’aaluina o se vaega tupe e $4,936, e fa’atupe ai le pasese, totogi o le fale e nofo ai le loia, fa’apea ma le alauni a lana loia.

O lea a’oa’oga ua fa’amoemoe e faia i le aso 27 ma le 28 o Ianuari i le a’ai o Birmingham, Alabama, lea o le a talanoaina ai mataupu e fa’atatau i fa’asalaga o le oti.

O Siaumau Jr o lo o tu’uaia i moliaga mamafa, e aofia ai le fasioti tagata i le tulaga muamua, taumafai e fa’ao’o le oti i se tagata, fa’apea ai le fa’ao’olima i le tulaga muamua, ona o le fa’alavelave lea na tulai mai i le aso 22 Iulai 2010 i luma o le Fale Faamasino Maualuga le tumau i Fagatogo, lea na tagatavaleina ai le ali’i leoleo, o Det. Lt. Lusila Brown.

Sa talosagaina e le tama’ita’i loia o Leslie Cardin, lea ua tula’i mo Siaumau Jr., ia faila mo lenei mata’upu mai i le ofisa o le susuga i le ali’i loia o Tautai Aviata Fa’alevao, ona e talu lava ona si’i gasegase atu Tautai i atunu’u i fafo, e le’i toe tatalaina lona ofisa.

Na taua e Cardin, e o’o lava foi i nisi o le aiga o le ua molia, o lo o latou taumafai pea i se auala e mafai ai ona feso’otai i se tasi e ono mafai ona ia tatalaina le ofisa ma aumai faila e pei ona manaomia.

Na fa’ailoa e Cardin, le i ai o se fa’amoemoega, e fa’auluina seisi talosaga e tali tutusa ma lana talosaga lea ua talia e le fa’amasinoga, mo le ali’i loia o Mike White, lea o lo o la galulue fa’atasi i lenei mata’upu.

Na fa’aalia e le loia a le malo, o Mitzie J. Folau, le fa’ate’ia o ia i se fa’aaliga a Cardin, e fa’apea, e leai se paketi a le Ofisa o Loia Fautua, e fa’atupe ai ituaiga malaga fa’apenei.

Fai mai Folau, e o’o lava foi i le Ofisa o le Loia Sili e leai foi sa latou tupe mo lenei mataupu, tusa lava pe o lo o i ai le fa’amoemoe latou te auina mai ni tagata fa’apitoa mai fafo e molimau i lenei mataupu.

Fai mai Folau, e le tete’e o ia i le talosaga, peitai e le mafai e le malo ona tu’u atu ni siaki i le va o le aso Lulu (ananafi) seia o’o i le aso Sa, ona e i ai foi aiaiga ma taiala a le malo mo le tu’uina atu o siaki.

Sa ia taua foi le le talafeagai o le talosaga a le itu tete’e, ona latou te le o iloa po o a uma mataupu o lo o latou fa’afeagai i le taimi nei, sei vagana ua latou maua le faila e uiga i lenei mataupu, peitai na finau Cardin, o loo malamalama lelei le latou ofisa i le mataupu lenei, sa latou tulimataia mai lava i le uluai taimi na tulai mai ai, aemaise ai foi, ua silia ma le faatasi ona la talanoa ma le ua molia e uiga i lenei mataupu.

Na finau Folau i le le talafeagai o le talosaga atoa ai ma le taugata tele pe a faatupe, peitai na finau le faamasinoga, e sili atu ona taugata pe afai e auina mai tagata mai fafo e molimau i le taimi o le mataupu.

O le aso Sa nei ua faamoemoe e malaga atu ai Cardin i Alabama mo le aoaoga e pei ona poloaina ai e le faamasinoga le malo latou te totogiina lona pasese.

O lo o taofia pea Siaumau Jr i le toese i Tafuna i le taimi nei e aunoa ma se tupe ua faatulaga e tatala ai o ia i tua, e faatalitali ai le isi ana iloiloga lea o le a toe valaauina e le faamasinoga.

O le poloaiga a le faamasinoga o lo o sainia ai le afioga i le faamasino sili lagolago ia Lyle L. Richmond ma le afioga i le faamasino lagolago ia Faamausili Faasua Pomele.