O se sauniga fa’apitoa sa fa’ataunu’uina i le Fale Taalo a le Caritas Technical School i le aai o Wundo i Port Moresby i le afiafi o le aso Gafua na te’a nei, na talia aloaia e le Peresetene o le Asosi Fa’aali Tino a le Pasefika ia Peter Stuart le ofi aloaia atu o Amerika Samoa e avea ma totino o lenei Asosi.

E leai se sauniga fa’apenei na faia i Ta’aloga a le Pasefika i le 2007 i Samoa ma Niu Kaletonia i le 2011, peita’i na fa’atoa fa’ataunuu lenei sauniga i le aso Gafua na te’a nei (aso Sa taimi Samoa), ina ua aloaia le ofi atu o Amerika Samoa e avea ma totino o le Asosi Faaali Tino a le Pasefika, ma ua atoa ai loa atunu’u e 13 o le Pasefika ua mafai ona lesitala i lalo o lenei Asosi.

O se sauniga faapitoa sa aloaia ai le ofi atu o Amerika Samoa e aofia ai solo a atunuu eseese e 13 ma a latou au taaalo, lea na ta’ita’i e le Au Fa’aali Tino a Amerika Samoa, ao molimauina e le silia i le to’a 2,000 tagata mai itu eseese o Papua faapea ai sui o atunuu sa tausinio a latou au ta’aalo i lenei ta’aloga.

E to’a 53 ali’i ma tama’ita’i na mafai ona tausinio i le tauvaga o lenei tausaga, o se numera ua sili atu nai lo isi taaloga a le Pasefika e lua ua mavae atu, e pei ona saunoa le susuga a Stuart.