Ads by Google Ads by Google

Tali Togiola leai se afaina nofoaga faatu ai Faleaisa luga Uafu

Na faaaoga e kovana Togiola Tulafono luga o lana polokalame i le faaiuga o le vaiaso na tea nei e faaleo mai ai sona finagalo, e tusa ai o le mau faasea lea ua salalau solo i le atunuu, e uiga i le nofoaga lea ua fuafua le malo e fausia ai le Faleaisa mo le kamupani i’a o le StarKist Samoa.

O le itu i uta o le uafu tele i Fagatogo lea ua faamoemoe le malo o le a lisiina mo le faatuina ai o le Faleaisa a le Kamupani i’a, e fesoasoani ai i le la’uina mai o i’a mai vaa fagota ma teu ai, ina ia mautinoia o loo lava ma totoe le sapalai o i’a mo galuega faatino a le kamupani, peitai o lea fuafuaga a le malo ua tele i ai faitioga a le atunuu e aofia ai nisi o tamalii ma taitai o le fono.

O nisi o faasea mai le atunuu e aofia ai le le talafeagai ona faatuina o se Faleaisa i le nofoaga e pei ona fuafuaina e le malo, e le gata e ono aafia ai le saogalemu o le gataifale ma le taulaga, ae o se nofoaga foi e muamua lava taunuu mai ai vaa meli o loo malaga mai ai tagata tafafao mai fafo, ma e ono avea lea vaaiga ma itu e afaina ai taumafaiga mo le faaleleia o le atina’e turisi i Amerika Samoa.

Saunoa Togiola, e leai se faitioga o nei mau faitioga uma latou te lei iloiloina ma le komiti atoa ai ma ana loia fautua, ona o le manatu ia mautu ma lelei le fuafuaga a’o lei oo i le taimi e amata faatinoina ai le faamoemoe, ae foliga mai e ese lava le auala o loo faatutu i ai faitioga ma faasea a le atunuu.

“Sa matou vaai uma i itu e pei ona auala mai ai faitioga ma faasea, ma tulai mai ai se manatu, e le o i ai se afaina i tulaga uma ia e pei ona outou taua, o lagona foi ia o loo taumafai mai i ai le kamupani a le StarKist, e naunau foi latou e fia puipui i le siosiomaga ma le tualaga, atoa ai ma le atinae o turisi e pei ona outou fai mai ai,” o le isi lea vaega o le saunoaga a le alii kovana e tali mai ai i faasea ma faitioga a le atunuu.

I le tulaga i gaioiga ma taumafaiga a le kamupani i’a o loo taumafai le malo e fesoasoani atu i ai, na saunoa ai Togiola e faapea, e le na o Amerika Samoa le atunuu o loo naunau e avatu le kamupani lenei e faatuina ai lana faleaisa lea, ae o loo tele foi isi atunuu o loo naunau e avatu le tautua lea a le kamupani latou te faatautaia, ina ia maua ai foi se fesoasoani mo le latou tamaoaiga, peitai e le o nofonofo foi le malo i le sailiina lea o soo se auala e fesoasoani atu ai i le kamupani, ina ia mafai ai ona faatumauina lana tautua i le atunuu.

Ae mo le au faitio e pei ona saunoa Togiola, e mafua ona faitio ona e lata mai le latou vaai, peitai o le tagata e mamao le tofa ma le utaga oo, e taofiofi lana faautautaga ona o le manatu sei vaavaai muamua ma maitauina pe faamata e i ai ni lape o gaioiga o loo taumafai atu i ai le malo.

Saunoa le alii kovana, ao i ai le Faleaisa lenei a le kamupani i Satala i le nofoaga tuai sa i ai, sa leai lava nisi na faasea i le nofoaga sa faatuina ai e ui sa latalata i le tele o fale o aiga, peitai o lea ua taumafai atu le malo e tau lalaga lenei faamoemoe, ae o lea foi ua tulioso mai ma faasea i galuega e lei faatinoina.

O lana saunoaga mulimuli i luga o lana polokalame i lenei mataupu na ia taua ai, soo se gaioiga lava o loo taumafai i ai le malo, e tasi lava le auga ma le faamoemoe, ia manuia ai le atunuu.