Tali le Pule Ofisa Litaea i le tusi a Lolo

E talitonu le Pulesili o le Ofisa o le Litaea a le malo, e leai se malosi o le alii kovana ia Lolo Matalasi Moliga i lalo o le tulafono, na te tofia ai se ta’ita’ifono le tumau mo le Komiti Fa’afoe o le litaea, ona o lo o tumau pea le susuga a Aleki Sene Sr ma ta’ita’ifono o le Komiti Fa’afoe tuai, ona o totino fou sa ia tofia e le i faamaonia e le Fono Faitulafono.

 

I lalo o le vaega 7.141 (a) o le tulafono toe teuteu a Amerika Samoa e pei ona siitia e Luatua i lana tusi i le alii kovana, o lo o manino mai i le leai o se malosi i le alii kovana na te faia ai se faaiuga faapea.

 

E o o foi i le susuga ia Sene e pei ona saunoa Luatua, e le gata o lo o tumau pea le avea o ia ma totino o le komiti faafoe a le litaea, ae o lo o tumau foi ona ia tauaveina le tofiga o le taitai fono o le Iuni, sei vagana ua oo i le isi fonotaga o lo o sosoo ai, lea e mafai ai ona palota le komiti mo le sailia o se isi totino fou e avea ma taitaifono, ae o le taimi nei, o lo o tumau pea le avea o ia ma taitaifono.

 

O se vaega lea o le tusi a Luatua Filisouaiga Ta’afua sa atuuina atu i le alii kovana i le lua vaiaso talu ai, o sana tali atu lea i le tusi a Lolo e tofia ai le susuga ia Sonny L. Thompson e avea ma ta’ita’i fono le tumau o le Komiti Fa’afoe o le Litaea.

 

Na taua e Luatua i lana tusi ia Lolo e faapea, e le gata sa ia faailoa i ai le tulafono ae sa ia toe faamanino i ai le tulaga e faatatau i totino tuai e toafa o le komiti o lo o i ai, ona ua faamavae isi totino, ae na o le toa fa foi totino fou lea faatoa faamaonia e le fono.

 

Na faapupula atili e Luatua ia Lolo e faapea, talu ai ua faamavae le afioga ia Fanene Morris Scanlan mai le toe avea ma totino o le komiti faafoe, lona uiga toe toatolu sui o lo o totoe, e ui e le i faamaonia se tasi e sui tulaga ia Fanene ua faamavae.

 

I se vaega o le tusi a Lolo sa tuuina atu ia Luatua e tusa ai o lona tofiaina o Thompson e avea ma taitaifono le tumau o le Komiti o le Litaea, sa ia taua ai e fa’apea, i le maea ai ona faamaonia e le fono o isi sui e toaono e faaopoopo i totino o le komiti, ua tula’i mai ai loa le atoa o le kalama e mafai ai e le komiti ona faatino ana fonotaga mo faaiuga fai.

 

Sa ia faamanino atili foi e faapea, talu ai e toe lava o Morris Scanlan le totino tuai o le komiti faafoe o lo o totoe, e leai foi se tofiga fou ua faamaonia e le fono e sui tulaga ia te ia, e tatau ai ona valaaulia o ia ina ia auai i le fonotaga o le a valaauina.

 

E talitonu le alii kovana, o le komiti tuai o le litaea ua le o toe aloaia i latou e galulue o ni totino o le komiti, ma ia faafetaia ai sui tuai o le komiti sa galulue i le komiti tuai e pei o le afioga ia Faoa Aitofele Sunia, le afioga i le alii senatoa ia Magalei atoa ai ma le susuga a Sene, mo tausaga e tele sa latou galulue ai o ni totino o le komiti faafoe o le litaea.

 

Sa ia faafetaia foi le auaunaga sa latou ofoina atu i le komiti, e pei foi o le tautua sa ofoina atu e Mr. Brandt Judy lea foi sa avea muamua ma totino o le komiti.

 

Na faapupula atili e Luatua ia Lolo e faapea, talu ai e le i faamaonia e le fono tofiga fou mo Magalei, Faoa, ma Sene, lona uiga o lo o tumau pea le avea o i latou ma totino tuai o le komiti faafoe, sei vagana ua aloaia le faamaonia o i latou e le fono ona faatoa mafai lea ona taua o totino fou o le komiti faafoe a le litaea.

 

Na faamanino atil e Luatua e faapea, e tusa ai ma le tulafono o lo o lima taitaiina ai galuega a le komiti o le litaea, o lo o aloaia pea i lalo o le tulafono le avea o i latou nei e toatolu ma totino o le komiti faafoe tuai, ma faaiu ai lana tusi i lona teena lea o le faaiuga a le kovana e tofia ai Thompson e avea ma taitaifono le tumau.

 

“O le tiute tauave o le taitaifono e tusa ai o le tulafono, o ia na te valaauina fonotaga a le komiti, o le mafuaaga lea na ia teena ai le talosaga a le alii kovana  na te valaauina ai se fonotaga a le komiti, ona e tatau i le taitaifono ona ia valaauina le fonotaga ma logo totino o le komiti e tusa ai o le fono taga.

 

Na aofia foi i le tusi a le alii kovana se faatonuga mo Luatua i auala e faatautaia ai galuega a le komiti faafoe, peitai na faamanino e Luatua i lana tali ia Lolo e faapea, e ui na te lagolagoina lona naunau atu ina ia faanatinati galuega a le komiti, ae i lalo o le tulafono e le tatau i le pule sili o le ofisa o le litaea ona ia maua mai ni fautuaga mai se isi tagata, sei vagana ai lava le taitaifono o le komiti.

 

Na tautino Luatua, afai na te taliaina ni fautuaga a ni isi tagata e tusa ai o auala e faatino ai lana galuega, lona uiga ua ia alu ese mai faiga faavae e ao ona lima taitaiina ai le faatinoina o lana galuega, aua i lalo o le tulafono, o le komiti faafoe e aumai ai faatonuga e lima taitaiina ai lana galuega, ae le aumai i se isi tagata.

 

O le masina na te’a nei na iloilo ai e le maota o sui ma le senate tofiga fou a le alii kovana, mo i latou e to’a 6 e faaopoopo i totonu o le komiti a le litaea, peitai e na o le toatolu o i latou nei na pasia e le Fono, e aofia ai Maaelopa Bob Tuiasosopo, Beaver Ho Ching ma Thompson, ae teena le isi toatolu e aofia ai Magalei Logovii, Aleki Sene Sr ma le teutupe a le malo ia Dr. Falema’o Phil Pili.

Comment Here