E talitonu tina ma tama matutua e toa 72, ia na faamalolo mai le polokalame a le Ofisa o le TAOA o loo faatupe mai e le feterale, o le avanoa lea ua latou toe maua e toe galulue ai mo le isi tausaga, o le tali lea o a latou talosaga i le Atua.

E na o le leo o le fiafia, vivii ma le faafetai na mafai ona gagana ai tama ma tina matutua na faamalolo mai a latou galuega i le vaiaso na te’a nei, ina ua o latou maua le tala fiafia i le taeao ananafi, ua toe faaopoopo le isi tausaga e galulue ai i lalo o le polokalame.

E a isi e lauga faafetai ma faamalo i le Faatonusili ma lana matagaluega, ae o isi i le tali atu “amene, viia le Alii, faafetai i lou tali mai.”

E fefiloi lagona o le fiafia na oo i ai tama ma tina matutua ina ua faalauiloa aloaia e le Sui Faatonu o le Ofisa o Tagata matutua i le fonotaga ananafi, e tasi le tausaga ua toe faaopoopo mo i latou e galulue ai i le polokalame o loo galulue ai nei, lea o loo faatupe mai e le malo tele.

O le itula e 9:00 i le taeao ananafi na fono ai le Ofisa ma tagata matutua uma na vaea mai le polokalame, mo le faailoaina i ai o lenei tala fiafia.

O le Sui Faatonusili o le TAOA na ia faailoaina i tagata matutua le tala fiafia, faatasi ai ma nisi o fautuaga na tuuina atu i ai e pei o le faamalolosi ma faamaoni i le faatinoina o latou galuega.

“Viia le Atua ina ua matou faalogo i lenei tala fiafia, e ui lava sa tatou faalogoina le leoirama ona o le tala faanoanoa e uiga i le faamaloloina lea o i tatou, ae o lea ua suia i le taeao nei i le tala fiafia, ua toe maua lo tatou avanoa,” o le tala lea a le isi tina matua.

Na taua e tagata matutua e faapea, talitonu i latou e leai se isi e lei tulivae i le Atua i le ao ma le po, e oo lava i nofoaga o loo galulue ai e pei o faleaoga, maketi, Toomaga eseese o loo faapotopoto ai e aofia ai ma totonu o aiga, ona o le tuuina atu o a latou manaoga i le Atua, ina ia alofagia se isi avanoa mo i latou.

“A lea ua tali le Atua, lea ua tatou maua le tala fiafia, faafetai atu ai i lau afioga i le Faatonusili ma le mamalu o le matagaluega mo galuega lelei.” o le saunoaga lea a le isi foi tina matua.

E le gata o le faafetai i le Alii ae sa momoli foi la latou faafetai i le Faatonu ma lana magaluega, ona o galuega ma le talosaga na tuu atu i le malo tele, lea ua mafai ai ona toe faaopoopo le isi tausaga o le polokalame.

E lei auai le Faatonusili o le Ofisa o Tagata Matutua ia Faafiti Pita Tauanuu i le feiloaiga a le Ofisa ma tagata matutua i le taeao ananafi, ona sa faatasi atu o ia i le iloiloga a le komiti o le Faagaioiga o le malo a le Senate, mo le fesiligiaina o le mataupu e uiga lava i tagata ua faamalolo mai le polokalame.

Ae na taua e le Sui Faatonu o le TAOA i lea feiloaiga, e ui o lea ua talia le talosaga, ae i ai lava vaega e manaomia ona faatino e tagata matutua, ina ia siisii ai pea i luga lelei o a latou faamaumauga o loo tuuina atu i fafo, e pei o le faamaoni i le galuega, vave i taimi faigaluega, ma aua le tia’i galuega.

Saunoa le sui faatonu, o galuega uma ma faamaumauga mai le polokalame lea o loo galulue ai tagata matutua, o loo tuuina atu uma i fafo mo faamaumauga, o le isi lea itu taua e tatau ai ona matua tinou uma tama ma tina e faamalosi i le galuega.

“E oo lava i tou tauvalaauga, o loo ave uma i fafo, o numera o tou telefoni, faapea ai faamaumauga uma e uiga i nuu ma nofoaga tou te o mai ai, o loo aofia ai i faamaumauga uma o loo auina atu i fafo, ina ia vaavaai i ai le polokalame ma faamaonia ai a outou galuega o loo faia,” o le saunoaga lea a le sui faatonu.

O le vaiaso fou lea ua faamoemoe e toe foi ai i le polokalame i latou e toa 72 sa faamalolo ina ua atoa le tai 48 masina na galulue ai i le polokalame.

O i latou na faamalolo mai le polokalame, ua atoa le tai 48 masina sa faatulaga e galulue ai, peitai na saunoa le faatonu ia Faafiti Pita Tauanuu e faapea, o le faafitauli na mafua ai ona tulai mai lenei faaletonu, ona sa faailoa e nisi o faatonu sa muamua atu ia te ia i tagata matutua, o le polokalame e le faamutaina ae faaauau pea, o le taimi la na faailoa atu ai i tama ma tina matutua ua faamuta le taimi e tatau ai ona latou galulue i le polokalame, sa vaaia lo latou faanoanoa.

“O le mafuaaga tonu lena na ou talosagaina ai loa le malo tele, mo se isi avanoa e toe faaauau ai le polokalame a nai tagata matutua, ma toe tuu mai ai loa le tausaga e tasi e toe faaauau ai,” o le saunoaga lea a Faafiti.