Ads by Google Ads by Google

Tali Komesina i fa’asea a nisi o leoleo

Na teena e le afioga i le alii komesina o Leoleo tuuaiga mai nisi o leoleo o le matagaluega e faapea, na mafua ona maua siitaga a nisi o leoleo ona ua fai i le masani ma le faa aiga faaiuga a le matagaluega.

Saunoa le tofa Tuaolo M. Fruean, “E leai ni faa aiga, masani po o le faaletino na faavae ai le sii o tulaga o leoleo sa faamanuiaina i le vaiaso na te’a nei, o tulaga fou ua latou maua na afua mai i le latou tautua faamaoni ma galuega lelei sa latou faia,” o le saunoaga lea a Tuaolo.

“E le o lou ma’i i le tele o aso, tele o taimi e te livi ai ae e mafaufau e te sau maua le tulaga kapeteni poo le satini, e leai, e faavae lou mauaina o le faailoga lena i au galuega,” o le saunoaga tu’u sa’o lea a le komesina i leoleo sa faasea.

Na taua e Tuaolo lona faanoanoa ona o faasea nei ua aumai i luga o le nusipepa, ma faasea ai nisi o leoleo i le maua o tulaga fou a isi ae leai ni a latou tulaga fou sa maua.

“O tulaga fou ua maua e leoleo ua faamanuiaina, o mea ia sa latou galulue punoua’i i ai lea ua mafua ai ona o latou maua, o le tautua sa latou faatino lea ua mafua ai ona o latou selesele le taui lelei,” o le isi lea saunoaga a le alii komesina.

Na taua e leoleo sa faasea i siitaga fou o tulaga o leoleo i le Samoa News, o nisi o leoleo o loo aofia i le toa 40 lea ua siitia a latou tulaga, sa le tatau ona o latou maua faamanuiaga nei, peitai e le iloa pe na faapefea ona o latou maua nei suiga fou.

O nisi o mafuaga na faavae ai i luga faasea e faapea, o nisi o leoleo nei o loo i ai a latou faamaumauga tau solitulafono ua faamaonia e le faamasinoga, ae o loo avea pea i latou ma leoleo, o leoleo o loo galulue mo le kovana, e le tatau ona maua ni a latou siitaga aua e leai ni a latou galuega o faia, na o le faafeaoina lava o le kovana ma lana masiofo, aesmaise foi, o leoleo ua tele tausaga o tautua i le matagaluega e le o faia lava ni a latou siitaga.

Saunoa Tuaolo, e pito sili ona taua i le malo ma le matagaluega le leoleo e galue faamaoni ma faatino ona tiute i lea aso ma lea aso, aua o le mafuaaga lena na faatautoina ai le leoleo, o le tautua le atunuu ma le matagaluega i le faamaoni.

“Na tatou o mai e tautua le malo ma le atunuu i le agaga faamaoni, o le mea lena ua manaomia e le malo i le taimi lenei, e le o toe manaomia tele e le malo le poto ma le atamai, ae ua manaomia le tagata faamaoni i le faatinoina o ona tiute na tofia i ai o ia,” o le saunoaga lea a Tuaolo