Ads by Google Ads by Google

Talavou u’unai e tapena mo le lumana’i

E tusa i le 100 tupulaga talavou sa auai i se fonotaga i le taeao ananafi na valaau ina e le Matagaluega o Talavou ma Tina (DYWA). Ma o i latou uma sa i ai sa lesitalaina o latou suafa ina ia mau ai le lisi o i latou.

 

O se tasi o sini o lenei fonotaga e una’ia ai o latou fa’amoemoe, ina ia amata loa ona vaai toto’a i lo latou lumana’i i a’oa’oga, po’o ta’aloga, po’o le amatalia o aiga ae sailia loa se galuega.

 

“Po’o le a lava le kosi ua e manatu ua tatau ma fetaui lelei ma lou fa’amoemoe mo lou lumana’i, aua le fa’atali, ae amata tapena loa i ai,” o le tima’i lea a le susuga ia Ethan Lake, le komesina o ta’aloga mo le DYWA.

 

E le’i fa’apito manu ia tasi i le tautalaga a Lake, sa matua sasa’a le fafao ina ia utupupuina e loto o le fanau, e ao ina ia faia le latou vaega, ma fa’atutumu talosaga mo avanoa e fa’aauau a’oa’oga maualuluga i so’o se Iunivesite po’o se Kolisi e tau ai lona mana’o, ona e mafai ona tau’avea ai kosi po’o ta’aloga o lo ua latou silafia lelei, e agava’a ai i latou, ma ua fiafia ai o latou loto.

 

“Aua e te manatu o se mea e fiafia i ai lou aiga, ae ia e manatu, o oe lava e ao ina e fiafia ma e gafatia i au taumafaiga ona e avea lena kosi, ma o le ala tonu lea e ao ina e o’o atu ai i mo’omo’oga o lou loto, mo lou lumana’i manuia ma le fiafia,” o le isi lea folasaga a le susuga ia Lake mo tupulaga.

 

“O le la’asaga muamua lava a’o le’i faia le filifiliga a le talavou, e ao ina matua nofo manatunatu toto’a i ana taleni, o mea o lo’o fiafia e fai i so’o se taimi, ma e ao fo’i ina mautu lona manatu poo iinei po’o fafo e ao ina fia soso’o i ai ana a’oa’oga,” o Lake lea. “O le ala o a’oa’oga, ia fa’ao’aina atili ai lona tagata i tomai e mo’omia ona maua ai lana sini ua mae’a moemiti i ai.”

 

Sa faamalosi le tautalaga a le susuga ia Lake i tupulaga, ina ia le toe fa’amoemoe pea i matua mo a latou fa’ai’uga, ae ia taga’i toto’a i latou i o latou lava mana’oga tupito, ma mea o moemiti i latou e fia ausia i o latou soifuaga tuma’oti.

 

“O lau savaliga e le toe u’ua lou lima e ou matua ma fa’asinosino oe i se ala e te uia, o lau filifiliga e faia e oe lava mo oe, ia seti mai sau sini, o se mea e te mana’o e te maua ma e galue aga’i i ai. Afai e mana’o i ai lou loto, e i ai le auala e fai ai,” o se tala faaopoopo lea a Lake.

 

Sa i ai ni ata video sa fa’aosofia ai mafaufauga o le fanau ina ia faia a fa’ai’uga mautu ma ia usita’ia o latou lava lagona, ma ia tepa taula’i o latou talavou, i le tele o avanoa lelei o lo’o folasia mai o latou luma e mafai ona e manuia ai, fa’atasi mai nai ou aiga, pe a latou fa’aaoga tatau nei avanoa.

 

O avanoa ia sa folasia, “Fa’aauau a’oa’oga maualuluga ina ia atoatoa le tapenaga mo galuega eseese ae maise ai o lau sini ua seti; fa’aleleia atili lou soifua ta’alo i le fa’agatama ua e agava’a ai ina ia e maua ai fa’amanuiaga e si’itia ai lou olaga, va’aia se galuega e te fiafia ai e talosaga i ai ma amata saili ai lou agava’a tumau mo lou aga’i i luma fa’apea ma lou aiga atoa.”

 

O le isi mea sili ona taua sa fa’ailoa atu i le fanau talavou, “E le tutusa uma mea e lelei ai tagata, e le tutusa uma fo’i sini e fa’atutu mo talavou uma, ae po’o fea le mea e fai aga’i i ai lau filifiliga, e mafai lava ona si’itia ai oe i lena taleni, aua o lo’o e galue maumaua’i i ai, ina ia taunu’u lou fa’amoemoe ma lau sini.”

 

O le fa’atumuga o pepa talosaga mo le fesoasoani tupe mo le fanau a’oga i a’oga maualuluga na faia i le mae’a ai o le lesona, fa’atasi ai ma talosaga mo avanoa e ao’oga ai le tupulaga i iunivesite po’o kolisi i fafo.

 

“O le vave ona e fa’amautu lou manatu e te a’oga i fafo, o le tausailia fo’i lea po’o lava lau tapenaga mo lou pili e te a’oga ai. O le isi vaega tupe e ao ina e talanoa toto’a i le taimi nei, o ni avanoa fa’asikolasipi e mafai ona fesoasoani mo lou fa’amoemoe,” o le tala lea a Lake.