Ads by Google Ads by Google

TALAVAI MAUA FUA E LE TOTOGIINA

Ua toe tula’i mai le Mafutaga a Tama o Folafolaga i Amerika Samoa, lea ua silia ma le to’a sefulu Mafutaga Tama i Ekalesia Eseese o aofia ai, latou te galulue fa’atasi ma le Samoa Medical Mission mai South Carolina, Amerika ina ia fa’ao’o mai se auaunaga tau togafitiga o gasegase, mata ma le fanauiti i le aso Lulu o le vaiaso a sau i Lauli’i.

O le Samoa Medical Mission ua tusa ai o le 14 ai lenei o tausaga o latou faia pea lea tautua, e le gata ai na’o i tatou i’inei, ae ua aofia ai Savaii e lua aso o talavai, ma Upolu e lua aso o Talavai mo le mamalu lautele o tagatanu’u.

Ua fa’ailoa mai e to’a 40 le ‘au malaga o i latou ua ofo mai le latou tautua ma tomai e sailia ai gasegase, taumafai ona togafitia sou gasegase o i ai, toe sapalaia ni vaila’au mo ou togafitiga, ma va’aia fo’i ou fofoga i sau va’aiga e talafeagai ma le malosi o ou mata. Ua i ai i lenei tausaga foma’i fa’apitoa mo gasegase o le fanauiti, fa’atasi ai ma tama’ita’i tausima’i uma e fesoasoani i sailiga ma togafitiga a ali’i foma’i o lo’o ua malaga mai.

O le faletalimalo o Mulitauaopele i Lauli’i ma le Ekalesia Penetekoso lea ua fa’atulaga e faia ai lenei talavai e afua i le itula e 8:00 i le taeao se’ia o’o lava i le itula e 4:00 i le afiafi. O le aumalaga e to’ai taunu’u mai i le aso Lua, peitai o le Mafutaga a Tama o le Folafolaga i Amerika Samoa e talimalo ai, saunia le nofoaga e fa’amautu i ai, fagaina i latou ma sapalaia fo’i ala mo feoa’iga ma fela’ua’iga.

O le fa’afetai i lenei vasega o foma’i, tausima’i ma latou fesoasoani ona o lo latou alolofa aua o lo’o totogia lava e i latou o latou pasese e o mai mamao ai e fa’atino lenei tautua.

O le Mafutaga lenei a Tama o Folafolaga, o se mafutaga ua amata ai ona tima’i e tama Faife’au tama uma o latou mafutaga ina ia fa’amalosia ni tima’i e taofia ai le fa’asauaga o tina ma fanau i totonu o lotoifale o latou aiga.

“O se taumafaiga toe a’apa atu a tama o le galuega, ia toe opogi atili e tama o aiga ta’itasi o latou tiute fa’atama, e ta’ita’ia ai latou aiga, ekalesia, nu’u ma le malo!” I le taimi nei, ua atoa le 10 o Fa’afeagaiga mai so’o se Ekalesia lava i le atunu’u ua auai fa’atasi ma latou mafutaga a tama e avea ma totino o lea mafutaga! “Fa’afetai Tama le alolofa ma le tausi aiga lelei!”