Ads by Google Ads by Google

Talavai le Totogia - Foma’i Amerika

E lua aso ua fa’atulaga ai nei se Talavai e le totogia a ali’i Foma’i fa’apitoa mai Amerika fa’atasi ai fo’i ma Tausima’i pasi e fesoasoani mo tagata lautele o Amerika Samoa, ma sa tu’ufa’atasia lenei auaunaga e le Sosaiete a Tama o Valo’aga i Amerika Samoa.

 

O le lona 19 ai lenei o asiasiga a nei Foma’i fa’apitoa o so’o se ituaiga o gasegase faatasi ai ma Tausima’i Pasi mai le tele o setete o Amerika ua latou fia o mai e fesoasoani fo’i i o tatou tagata lautele ina ia su’esu’e toto’a o tatou gasegase, ma aumai vaila’au aoga mo togafitiga o tatou gasegase na.

 

“Ona o le taugata fo’i o lo ua i ai nei le tulaga o togafitiga, ua le ‘alo ai le sosaiete a Tama o Valo’aga o Amerika Samoa i le latou fo’i pitola’au tausi, o le taumafai lea ia soifua maloloina o latou tagatanu’u ma aiga, ae ua feso’ota’i ma uso i Amerika ina ia latou sailia foma’i agava’a e fia asiasi mai i le tatou teritori fa’apea Samoa Tuto’atasi i lenei lava vaitau, ma latou faia nei su’esu’ega o gasegase ma toe fa’auia mai togafitiga aoga mo i tatou.” O se tala mai lea a le Fa’afeagaiga Afalupetoa Uta’i.

 

O aso e lua o le a faia ai talavai pe afai ae to’ai taunu’u mai nei Foma’i fa’apitoa ma le aumalaga mai Samoa, lea sa mua’i o’o ane i ai ma faia ai latou talavai fo’i, o le aso e amata ai i le faletalimalo o Mulitauaopele i Lauli’i, ma le aso Tofi e faia ai talavai i le Maota o le Galuega o le Ekalesia Anetioka AOG i Iliili.

 

O le itula e amatalia ai talavai nei o le 9:00 i le taeao, ae fa’ato’a mae’a i le itula e 5:00 i le afiafi. Afai o oe e masani ona va’aia oe e nei foma’i, ua e masani fo’i i ituaiga vaila’au latou te ofoina mai o ni togafitiga, e lelei lava ona soso’o pea lea tautua mo oe, atonu e fa’amama avega lea i lou toe tau alu fo’i e saili sou gasegase i le tatou falema’i tele i Faga’alu.

 

O le aoga fo’i lea asiasiga, atonu e ese fo’i ni ituaiga o vaila’au e o mai ma i latou e togafitia ai lou gasegase mai vaila’au o lo’o taua’aoina mai e le tatou falema’i tele, ma e mafai ona e fa’afesiligia fo’i, pe mafai ona fa’aauau ou togafitiga i nei ituaiga o vaila’au ua atofaina mo oe, mo le umi lea e tausaga atoa!

 

O le a maua fo’i se avanoa o le tatou nei nusipepa e fa’asalalauina ai se tala mai nei ali’i foma’i e tusa ai o le latou va’aiga o tatou tagata, pe o fa’asolo ina tulaga lelei mai pe o fa’asolo ina mama’i atili i tatou! Afai fo’i o le tulaga fa’aletonu, o le a se mea e ao ina faia e le tatou malo ma ona tagata, e fa’atulaga lelei ai ala o togafitiga o gasegase o po’ia ai le atunu’u!

 

E pei lava o taimi ua tuana’i, e ala ona lua nofoaga, ina ia mafai ona fa’afaigofie le o ane o tagata o lea falelima i sasa’e i Lauli’i i le faletalimalo o Mulitauaopele, ae fa’afaigofie Iliili mo le vasega o le Fagaloa se’ia o’o i le falelima i sisifo.