LEPUAI ALLEN MEYER

O le aso 8 Ianuari 2015 lea ua fa'atulaga e le fa'amasinoga maualuga e fofogaina ai lana fa'asalaga fa'asaga i le ali'i sa avea muamua ma pule sili o le lala o se kamupani va'a i Amerika Samoa nei, ina ua talia e le fa'amasinoga le tali ioe a le ali'i i le moliaga mamafa o lona ave fa'agaoi o se vaega tupe tele a le kamupani sa tu'uina atu i lalo o lana va'avaaia, i lalo se maliliega na latou sainia ma le malo i le vaiaso nei.

Na ulua'i tu'uaia e le malo le susuga a Lepuiai Allen Meyer i moliaga mamafa e tolu, lea e aofia ai lona ave fa'agaoi o ni tupe sa tu'uina atu i lalo o lana va'avaaiga, moliaga o le faia o fa'amaumauga tau fa'asese, atoa ai ma le moliaga o le gaoi, ae i lalo o le maliliega lea ua talia e le fa'amasinoga, ua tali ioe ai Lepuiai i le moliaga o lona ave fa'agaoi o se vaega tupe tele, ae solofua e le fa'amasinoga moliaga o lo o totoe.

I le tali ioe ai o Lepuiai, sa ia ta'utino ai e fa'apea, i se taimi o le va o Iulai 2012 ma Oketopa 2013, a'o avea o ia ma pule o le kamupani va'a a le Pacific Shipping Services, sa ia aoina mai ai tupe mai paaga a le kamupani, ona ia teu lea i totonu o se teuga tupe sa ia tatalaina i le lala o le faletupe a Hawaii i Amerika Samoa nei, i lalo o le igoa o le kamupani, ae na o ia o lo o saini ai.

Sa ia ioe foi e fa'apea, o lea teugatupe fou sa ia tatalaina e aunoa ma se faatanaga mai le Komiti Fa'afoe a le kamupani. Na ioeina e Lepuia'i i se vaega o lea maliliega lona tala ese mai o le silia i le $200,000 mai totonu o lea teugatupe, ae fa'aaoga mo ia lava.

O se tasi o vaega o le maliliega lea ua talia e le fa'amasinoga, o le malie lea o Lepuia'i e totogi le silia i le $180,000 i le kamupani sa galue muamua ai.

O lo o tumau pea tuutuuga o lo o tatala ai le ua molia i tua, e fa'atali ai le aso lea ua fa'atulaga e fofogaina ai lana fa'asalaga.

FELISE PAULO

O le ali'i e 25 tausaga lea na tu'uaia i lona fa'ao'olima i se isi ali'i na la faigaluega fa'atasi, ua nofovaavaaia mo le 12 masina i lalo o poloaiga e ao ona ia usita'i i ai, e pei o le fa'asa lea ona ia toe taumafai e fa'afeso'ota'i le ali'i na manu'a, fa'asa ona ia toe tagofia le ava malosi, a ia auai i ni aoaoga e fesoasoani ai i le tulaga o le ita vave, atoa ai ma lona totogiina lea o le pili o le falema'i a le ali'i na a'afia i le taimi na taofia ai o ia i le LBJ.

Na faatoese Felise Paulo i luma o le faamasinoga e tusa ai o lana solitulafono sa faia, ma ia talosagaina ai se isi avanoa mo ia, sei faaauau ai pea ona galue i lana galuega fou lea faatoa 2 vaiaso talu ona maua, talu ona mae'a le faalavelave na taofia ai o ia e leoleo i le falepuipui.

Sa ia faatoese foi i le alii na aafia atoa ai ma lona aiga, ma ia talosagaina o ia ina ia faamagalo sona sese ua i ai i lo la va.

Na uluai tuuaia Paulo i moliaga e lua o le faaoolima i le tulaga tolu atoa ai ma le faatupu vevesi i nofoaga faitele, ae i lalo o se maliliega na sainia e Paulo ma le malo, sa ia tali ioe ai i le faaoolima i le tulaga tolu, ae solofua e le fa'amasinoga faaitumalo le isi moliaga mama.

I le tali ioe ai o Paulo i le moliaga o le faaoolima i le tulaga tolu, sa ia tautino ai e faapea, i se taimi o le masina o Setema na te'a nei, na ia faaoolima ai i le alii o Uati Ropeti e ala i lona tu'i o lona auvae ma pau ai i lalo, atoa ai ma lona kiki o ona foliga a'o taatia i lalo e ala i le faaaogaina lea o ona seevae e u'amea le pito i luma, ma manu'a ai foliga o le alii o Ropeti, ae le o ni manu'a tuga e pei ona taua e le loia a le malo.

Na fa'ailoa e le faamasinoga ia Paulo e fa'apea, ana leai le 'ava malosi na filogia ai lona mafaufau i lea afiafi, e i ai le talitonuga a le fa'amasinoga e leai se vevesi e tula'i mai, peita'i ua avea lona tagofia o le 'ava malosi ma itu ua sese ai ana faaiuga, ma i'u i lona soli ai o le tulafono.

E 45 aso na manatu le faamasinoga e taofia ai Paulo i le toese i Tafuna, peita'i ua fa'amalumalu lona tuliina o lea fa'asalaga, fuafua lava i lona usitaia o isi tuutuuga o lana nofovaavaaia, ae ua lava aso e 5 na taofia ai o ia i le taimi na faatoa tula'i mai ai lenei mataupu, e avea ma ana fa'asalaga i lenei mataupu. Ua poloaina o ia na te totogi le salatupe e $150.