Na faaaoga e le afioga i le alii Kovana Sili, le matua ia Togiola Tulafono luga o lana polokalama i le faaiuga o le vaiaso na te’a nei, e faailoa ai ni isi o ana fuafuaga mo le lumana’i faatasi ai ma le momolia o lana faafetai i le atunuu, e tusa ai o le avanoa sa tuuina atu ia te ia ma le afioga i le Alii Faalagia ia Faoa Aitofele Sunia, la te taitaia ai le atunuu e ala i le tofi Kovana ma le Lutena Kovana.

Na saunoa Togiola e faapea, e le o i ai se manatu e vave tauva mo ni isi tofi o le atunuu, sei vagana ua maea lelei le taimi na tuuina atu e tautua ai i le tofi kovana, ma toe foi atu i le aiga mo le tau toe atina’eina o le aiga, ona faatoa maua lea o se isi fuafuaga mo le lumana’i.

Na faamanino e Togiola e faapea, faatoa manino so la finagalo ma Maryann pe afai ae oo atu i le aso 4 Ianuari, ae faalagolago lava foi i se finagalo o le atunuu ae le faia i luga o ni o la lagona faaletagata.

“Na mafua ona ma oo mai ma Mary i le tofi lenei, ina ua ma saili atu i se finagalo o le atunuu ae sapasapaia ai lo ma faamoemoe ma Faoa, e ala i le pule na to mai e le atunuu e fai ai maua ma taitai, lona uiga foi la, afai e i ai se isi manatu e toe fia tauva mo se isi tofi o le atunuu, lona uiga e faamoemoe lava foi i se finagalo o le atunuu, pe mananao ma te toe tautua mo i latou i se isi auala,” o le saunoaga lea a le alii kovana.

“Faafetai atu i le atunuu mo a outou talosaga, o la outou tapuaiga ua i’u manuia ai le taitaiga o la tatou galuega,” o le saunoaga lea a le alii kovana.

Sa ia faafetaia le atunuu atoa i fanau aoga, tupulaga, tama ma tina aemaise ai pulega a Alii ma Faipule i nuu ma Itumalo, o lo latou tutu faatasi e lagolago taumafaiga a le malo mo se manuia o le atunuu.

Sa ia faafetaia foi sui o lana Kapeneta, o Faatonusili, Fauluuluga o Ofisa atoa ai tagata faigaluega uma a le malo, faapea ai pisinisi ma kamupani tumaoti, i la latou sao sa ofoina atu e tautua ai le atunuu.

Sa ia faamalulu foi i le atunuu pe afai ua i ai se lape i lalo o lana taitaiga, i ni faaiuga sa ia faia, poo ni upu foi sa ia faaaoga e faaleo mai ai sona lagona i le atunuu.

Na faafetaia e ni isi o le atunuu na maua avanoa e talanoa atu ai i luga o le polokalame le alii kovana, e tusa ai o tausaga tele sa tulai mai ai i le faafoeina o le Sa o Amerika Samoa.

O faanaunauga na mafai ona faaleo e ni isi o le atunuu, talosia ae toe maua se isi avanoa o Togiola e tulai mai ai e toe tautua le atunuu.

O le itula e 12:00 i le aoauli o le aso o le a faamutaina ai le avea o Togiola ma kovana o le atunuu, ae faatautoina loa le nofoaiga fou mo le isi 4 tausaga.

O Togiola na filifilia e avea ma Lutena Kovana i le palota o le 1996 ma le 2000, i le taimi ao avea le tofa Tauese Pita Sunia ma Kovana Sili, ae ina ua usufono faafuase’i le afioga i le kovana sili ia Tauese, na faatauto ai loa o ia e avea ma Kovana Sili i le aso 7 Aperila 2003.

O le aso 16 Novema 2004 na filifilia aloaia ai loa o ia e le atunuu e fai ma Kovana Sili mo lana ulua’i nofoaiga, a’o le afioga ia Ipulasi Aitofele Sunia mo le tofi Lutena Kovana, ma toe filifilia faalua ai e le atunuu i le tofi Kovana Sili i le masina o Novema 2008.

O le taimi nei, ua 65 tausaga o le soifua o le afioga i le matua ia Togiola Tulafono.