Ads by Google Ads by Google

Talanoa Maselino Ioane i le eseesega o fausaga o vaa sa ia fausia

“O LA’U GALUEGA FAU VAA O LE MEA ALOFA NA AUMAI E LE ATUA”

 

O le sola ai o le vaa o le Fuao mai Vatia ma le tulaga muamua o tuuga fautasi o le sisigafu’a o lenei tausaga, na taua ai e le Tufuga sa fausiaina le vaa e faapea, e le fou ia te ia le mua o vaa sa ia fausia i tuuga vaa i Amerika Samoa ma Samoa Tutoatasi.

 

I se faatalatalanoaga ma le susuga a Loititi Maselino Ioane na ia taua ai i le Samoa News e faapea, ina ua mua le Fuao i le tuuga fautasi na faatoa mae’a atu nei, na ia lagonaina le fiafia tele ina ua mafai ona faaaogaina e le Atua lona tagata faatauvaa e faatinoina ai galuega aua nuu ma afioaga i le atunuu.

 

“E le o se taimi muamua lea ua tulaga muamua ai se va’a na ou fausia, e le fou fo’i ia te a’u le tofo i le suamalie o le iuga o se galuega sa ou tigaina ma ou galue ai, pau le agaga faafetai o le malosi ma le poto ua tuuina mai e le Atua ia te a’u ou te galue ai i lenei galuega,” o le saunoaga lea a Loititi

 

O le Fuao le vaa mulimuli na fausia e Loititi i le tausaga na te’a nei talu ona amata galue mai Maselino i lenei galuega i se vaitaimi o le 1980.

 

O Loititi na tupuga mai i se aiga e kamuta tuaa o ona tuaa, ma o iina na afua mai ai le tomai ma le malamalama o lo o ia te ia, ma i’u ina avea ai o ia ma tufuga fauvaa e oo mai i le taimi nei.

 

O lona tina e tupuga mai i Lano i Savaii ma Vaiala i Upolu, o tagata kamuta i latou nei, ae o lona tuaa o lona tama e tupuga mai i Leone i Amerika Samoa nei ma Fagaloa i Samoa.

 

Ina ua i’u ana aoaoga i le Kolisi o Sanele i Moamoa, na galue ai loa o ia i le Ofisa o le ‘Food and Agriculture Organisation’ (FAO) i Samoa, ma o iina na ia mauaina ai le tomai e fausia ai vaa, ina ua latou galulue ma ni isi o alii papalagi mai fafo i le fausiaina o vaa fagota.

 

“Ou te le’i manatu e avea a’u ma tufuga fau vaa,” o le saunoaga lea a Loititi ma soisoi, “Ae o le tomai na ou maua a’o o’u galue i le ofisa o le FAO i Samoa, na mafai ai ona ou maua le malamalama e fausia ai soo se ituaiga vaa, ina ua maua lo’u tusipasi fauvaa i le tuana’i ai o tausaga e 5 sa ou aoga ma galue ai i le Ofisa lea.”

 

Ina ua maea lana aoga, sa amata galue ai loa o ia i le fausiaina o ni isi o vaa fagota, ae o le tausaga e 1983 na ia fausiaina ai le ulua’i fautasi i Samoa, le vaa o le Savali o le Filemu mai Falelatai, lea na siamupini i le tele o tuuga fautasi i Samoa i ona fo’i vaitaimi.

 

Na maea le Savali o le Filemu ona faasolo mai ai lava lea o le galuega a Maselino i le fausiaina o isi vaa e pei o le Tamarina, Kionasina ma le Little Rina lea na pulea uma e se tasi o alii faipisinisi i Samoa, le susuga ia Alan Grey o Apia ma Toamua.

 

O le Kionasina ma le Little Rina sa avea foi ma siamupini o tuuga fautasi i Samoa i o laua foi vaitaimi, ma faaauau mai ai i Amerika Samoa nei i le 2002 ina ua malaga mai le Little Rina ma sola atu ai ma le siamupini o tuuga fautasi o le sisigafu’a i lea tausaga.

 

O isi fautasi na fausia e Loititi, na aofia ai le La o Samoa mai Lepea ma le Tolotolo o Tama Uli mai Salelologa.

 

O lana ulua’i va’a na fau i totonu o Amerika Samoa, o le Paepae o Ulupo’o mai Aua, sosoo ai ma le Samoana Shark a le Aoga Maualuga a Samoana, o le Segavao mai Si’usega, ma toe faai’u mai ai loa i le Fuao mai Vatia.

 

“E tolu lava mea taua e tatau ona maua e soo se vaa ona latou maua lea o le manumalo, ia lelei le vaa, malolosi le auvaa toe lelei le kapeteni i le faafoeina o le va’a, ma ou te iloa afai e atoatoa mea uma ia i soo se auvaa, o le vaa lena e manumalo,” o le saunoaga lea a Loititi ma ia faafetaia ai foi le afioga o Vatia ona o le avanoa na mafai ona tuuina atu na te fausia ai le latou vaa.

 

O le taimi nei, e tolu afioaga ua maea ona latou feutana’i ma Loititi mo le amataina ni a latou fautasi fou e aofia ai Nuuuli, Utulei ma Vailoa-tai, ae na taua e Loititi e faapea, e ui lava ua ia lagona ua matua lona soifua, ae le mafai ona taofia lona fiafia e galue i lenei galuega, ona o le taleni na tuuina atu e le Atua ia te ia e tautua ai lona atunuu.