FA’AILOGA FA’APITOA MO POLAMALU FOUNDATION

Mai le fa’aaliga fa’apitoa a le Tausala Manaia Dance Group lea e fa’atautaia e Tuifa’asisina Corina Seiuli Lee, ma le to’atele o matua o le ‘ausiva, sa fa’ai’u ai le latou fa’aaliga fa’apitoa na fa’atautaia i le Faletalimalo o le Tradewinds i le taua’aoina o fa’ailoga mo latou sui o le malaga i fafo mo a’oa’oga, fa’atasi ai ma le fa’ailoga fa’apitoa mo Troy ma Theodora Polamalu, ona o le tele o so la’ua sao mo le tupulaga o Amerika Samoa.

O le fa’aaliga lava latou sa matua fa’amalieina le aofia sa ulufale mo le fia maimoaina o siva Samoa, fa’atasi ai ma le faaaliga o la’ei eseese ua mae’a sui’a lelei ma e fa’atau atu e le faleoloa o “Mena.”

E i ai fo’i le fa’ailoga fa’apitoa sa taua’aoina i le susuga Brett Butler ma le Aiga lea o le a toe masi’i e alaala tumau i fafo, ona ua si’itia a’oa’oga a se tasi o le fanau i Iunivesite i fafo. Peita’i, ona o lea fo’i aiga o se tasi o aiga e sisiva uma o la’ua alo tama’ita’i i le Tausala Manaia Dance Group lea ua latou fa’aaloalo ai fo’i i o latou sui o le a tu’ua i latou.

O le to’atolu o sui tausala o le a masi’i i fafo e aofia ai le alo tama’ita’i o le ali’i faipisinisi lauiloa o Tom Drabble ma Ta’aloga Tupa’i Drabble - Tiara Vaetamasoaali’i Drabble. O le to’atolu lea o le a masi’i i fafo sa tofusia ma latou meaalofa fa’apitoa mai le latou au siva.

I le fa’atausi’usi’uga o le fa’amoemoe i lea afiafi sa taua’aoina ai le meaalofa fa’apitoa fo’i mai le Eveni Stores i Pago Plaza mo Troy Polamalu ma le faletua fa’apea le Fa’asamoa Initiative ma ona sui uma o malaga mai ia fetufa’i ni tomai lelei mo fanau uma i Amerika Samoa. O lea fa’ailoga sa taua’aoina e le afafine o Eveni lea na te fa’afoea le faleoloa i Pago Pago.

POLOKALAMA TAUSISI SAOGALEMU I FA’ATOAGA

O le polokalama fa’apitoa a le Land Grant mo le tausiga lelei o le saogalemu o tagata e galulue i fa’ato’aga na fa’ataunu’uina le aso ananafi i le lotoa lava a le ASCC Lang Grant i Malaeimi.

E latalata i le 100 i latou na matauina na vaevae i vasega 4 ina ia fa’atautaia ai le polokalama fa’ataoto, ma sa fuafua lea i le matutua o le fanau. Na fa’asolo i latou e a’otauina le taumafai i mea’ai paleni e totoina i laufanua o aiga, ia saogalemu fo’i i latou i taimi e tausasami ai, o lona uiga e mataituina le fa’amama o lima a’o le’i taumafa se aiga, ma ia malu puipuia mai tausami i le lago ma iniseti laiti.

Mae’a lena itu ona fa’asavalia lea o i latou i nofoaga o lo’o tausia ai manu fa’afagafao, soso’o ai ma nofoaga o lo’o fa’afailele ai la’au toto e aoga i le vaomatua, ae maise o fa’ato’aga eseese e i ai ma’umaga, togafa’i ma isi togala’au fuala’au ‘aina, fa’atasi ai ma le fa’amalamalama a’ia’i o le tulaga saogalemu o tagata o le aiga i taimi e fa’aaoga ai meafaigaluega e faia ai fa’ato’aga.

O ia mea e aofia ai To’i, Naifi, Sapelu, moavao, fagavao ma ona vaila’au e fa’aaoga aua e o’ona, o salu u’amea ma isi ma uma e ono lavevea ai i latou a’o fa’aaogaina.

O le isi vasega o le aso, o le fa’ailoa lea i fanau le taua o le ‘aveesea mai le lotoifale o le aiga o vaila’au o’ona e fa’aaoga mo masini e fana ai lausului o fa’i, fana ai le vao ia pe, ma tape ai fo’i manu fa’alafua e ono leaga ai fua o la’au ‘aina ma togala’au ‘aina mata.

O lo’o i ai fo’i le ofu fa’apitoa e fa’aaogaina e le tagata e fa’aaogaina nei vaila’au, ina ia le afaina lona tino pe manavaina fo’i e ia kasa o’ona mai nei vaila’au e fa’aaoga.

O lea vasega, ua vave ona fa’ailoa ai i le fanau, e le tatau ona fa’atamala aiga uma, i nofoaga fa’apitoa, e ese mai le falenofo o aiga, e teu fa’alelei ai kesi o masini eseese e fa’aaoga i fa’ato’aga, vaila’au o’ona mo le fa’apeina o manu fa’alafua ma le vao.

“O se tasi lenei o matafaioi e tauloto pea e i matou i aiga ta’itasi, ona ua matele ina fa’aaogaina vaila’au fana vao mo le fa’apeina o le vao i fa’ato’aga. Tautuana lava ia teu mamao ese mai vaila’au mai le o’o i ai o le fanau iti,” o se tala lea a le ali’i o lo’o fa’aautu ai lea matata o le saogalemu mai vaila’au o’ona ma lona fa’aaogaina fo’i, Alfred Peters.