TALA VAIFANUA
A’OGA VOLLEYBALL FANAU ELEMENTARY ASCC GYM
O lo’o ua matua fiafia lava le to’atele o fanau e amata mai le 8 tausaga se’ia o’o i le 12 ma le isi vaega e amata mai le 13-15 tausaga i a latou a’oa’oga fa’apitoa o le ta’aloga volipolo o lo’o fa’atautaia e le vasega o Faia’oga Volipolo na auina mai e le ‘Fa’asamoa Initiative a le Polamalu Foundation.’
“Oka e matua lelei lava matou a’oga, o se faiga ua leva ona fia maua e matou, aua ua matua lava le koleni, e fa’aaoga fo’i le ulu e po ai le polo e fa’ataga i ta’aloga volipolo,” o se tala lea a se tasi o tama’ita’i talavou 11 tausaga le matua ae auai o ia o se totino o le au volipolo o lo’o a’otauina e Falefine Nomura, peita’i e le manatu lona tina e fa’ailoa lona suafa.
O lo’o i ai le avanoa e toe auai lou alo i ta’aloga lava nei mo fanau iti e amatalia i le itula e 7:45 i le taeao mo fanau 8-12 tausaga le matutua, ae o le 11:00 e amatalia ai ona lesitala le fanau 13-15 tausaga mo latou a’oa’oga e o’o atu i le afiafi i le ta o le 3:00.
O le faleta’alo lava o le Kolisi o lo’o fa’atautaia ai nei a’oga volipolo ma ua va’aia fo’i le to’atele o faia’oga, fa’atonu ma latou fesoasoani o nisi e lauiloa i lea fa’agatama i fafo, ua latou tutu fa’atasi e fa’ataunu’u a’oa’oga fa’apitoa mo le fanau i lea fa’agatama.
Sa tufaina fo’i mea’ai mo le fanau fa’apea ma latou mitiafu o le Fa’asamoa Initiative mo i latou uma sa auai i a’oa’oga ananafi ma le aso Lua na te’a nei.
LEITIOFONI MO LE AYFS 49ERS
O lo ua tapena nei le vasega o tama ta’a’alo, matua o fanau nei, aemaise o Faia’oga, fa’atonu o le Au Ta’a’alo ma latou fo’i aiga, e saili fa’alava le seleni ina ia mafai ona masi’i le 49ers e tali le latou vala’aulia i Hawaii i lenei tu’uaga umi o a’oga.
Ua fa’ailoa mai, ua mae’a faia isi sailiga, ua fa’afiafiaina atili le fanau, aua ua maua mai le fesoasoani e ala i le a’ao foa’i o le mamalu lautele o le atunu’u, peita’i, e le’i lava lea mo le fa’amoemoe atoa ona o lo’o masi’i atoa le ‘au e to’a 25, fa’atonu ma faia’oga e to’alua.
E le gata i le ‘au a le 49ers lea e masi’i le to’a 21 o latou tama ta’a’alo, ae ua masi’i atu ai ma nisi o latou tama a’ami fa’apitoa mai isi ‘au e pei o le 2 tama ta’a’alo mai le Steelers ae to’atolu mai le Raiders.
Ua aofia uma ma nai nei fanau i le sailiga o lo ua fa’atulaga e faia i le aso To’ona’i nei, le Leitiofoni lea.
O lo ua toe fa’atagisia mulimuli lo outou agaalofa mo le fanau ina ia foa’i ane mo lea fa’amoemoe.
Ua fa’ailoa mai, sa malaga fo’i le 49ers i Hawaii i le tu’uaga umi fo’i o a’oga i le tausaga ua te’a, ma ua latou iloa lelei ai, e ao ina lava le fa’amasani e fetaui ma tama e sili atu lo latou tomai i le fa’agatama e fa’aleleia atili ai lo latou tomai i lea fa’agatama.
O ali’i faia’oga o le 49ers e aofia ai le susuga Loso I’aulualo, Tutuila Manase ma le susuga Fa’alavea’i Ta’ase. O le malaga a le ‘au lenei e tu’ua ai e i latou teritori ia Iulai 1, 2015 ma o lenei Leitiofoni o le a fesoasoani tele mo le latou pasese ma fa’atautaia mai lea i luga o alaleo o le KHJ & V103.