Ads by Google Ads by Google

TALA VAIFANUA

MOLI FOU MALAEVA’ALELE - KONEKARATE McCONNELL DOWELL

 

Ua mae’a fa’atulaga le konekarate mo le Kamupani a le McConnell Dowell latou te fa’apipi’ia moli fou o le malae va’alele i Tafuna ma o lea galuega ua mae’a fa’ailoa mai e amatalia i le masina nei.

 

O le malae vaalele i Tafuna e lua ona ala sese’e tetele. O le ala sese’e 5/23 e 10,000 futu le umi ae 150 futu lona lautele;  ma le malae sese’e 8/26 e na’o le 3,800 futu le umi ae 100 futu le lautele. O moli uma o nei malae sese’e o le a fa’amoli fou uma i lea konekarate ma e tatau ona o’o atu ia Oketopa 2015, ua mae’a fa’atino lea galuega atoa.

 

FA’ATAUTAIA KOSI E LE KOLUSE MUMU

 

Ua fa’asalalauina mai le mafai ona fa’atautaia e le Koluse Mumu i Amerika Samoa o Kosi e fa’asaoina ai le soifua o nisi ua matapogia fa’afuase’i, lavevea, malemo i le sami po’o vaitafe po’o nisi lava tulaga.

 

O nei kosi ua fa’ailoa mai e Val Tuilefano o le Koluse Mumu, “E taumafai lava le Koluse Mumu e a’oa’o ana aufaigaluega, i latou ua ofo mai le tautua, ae tatau ona fa’aau’upegaina i latou i tomai fa’apitoa ia ina ia taumafai fo’i ona toe fa’amanava se tasi e to’ai taunu’u atu le matou fesoasoani a’o mo’omia mai lea fesoasoani.”

 

O lea a’oa’oga mo sui faigaluega e le totogia a le Koluse Mumu, e tatau fo’i ona a’oa’oina e le totogia se pili. Peita’i, e i ai le isi vaega o le Kosi lenei ua fa’atulaga ma fa’atautaia e Vui Robert Tuala, e i ai lona totogi, aua a mae’a le kosi aoga mo so’o se tasi, ona taua’aoina lea o tusi pasi e fa’ailo ai lou agava’a ua maua’a e tapena ai oe mo lea tautua mo’omia i le tele o taimi e oso ai ni ma’i, pe tutupu ai ni fa’alavelave fa’afuase’i le ma’alofia.

 

Pe afai e te fia auai i so’o se tasi o nei kosi e a’oa’oina ai le First Aid/CPR/AED e ao ina e fa’afeso’ota’ia le Ofisa o le Koluse Mumu ia Val Tuilefano po’o Tuala ina ia e auai i nei kosi aoga ma e umia ai fo’i nei tusi pasi mo’omia tele. Ua fa’ailoa mai, i kosi e agava’a ai mo tusipasi nei, e fa’akonekarate lelei lava faia’oga fa’apitoa o nei kosi ina ia fa’atautaia vasega, ma e matua lelei fo’i ona fa’atautaia vasega tusitusi, ma vasega fa’ata’ita’i ona fa’atino tiute ia agava’a ai mo le fa’asaoina o le ola o nisi. E i ai totogi maulalo lava ua tapena mo lea ituaiga o kosi.

 

Ua ta’ua fo’i e Tuala, “E lua ituaiga kosi, o nisi e manana’o ia taumafai mo tofiga tau Faia’oga i nei kosi, e tatau ona fa’aauau a latou a’oa’oga e fa’aalu ai le ta’i 30-40 itula o vasega tusitusia ma le fa’atinoga o tomai i isi lala o le Koluse Mumu i fafo atu o Amerika Samoa.”

 

O nei avanoa e tatau ona totogia e le tagata lava ia lona pasese, ae fa’afaigaluega i latou e le Koluse Mumu i itula ua agava’a ai mo a’oa’oga nei, afai fo’i e maua ai ma se avanoa tumau i le Koluse Mumu, e mafai lava ona faigaluega ai i latou i fafo.

 

“O le isi ituaiga o a’oa’oga ina ia agava’a ai oe mo galuega ‘tali atu i le mana’omia e fa’asao le soifua’ e faia lava iinei mo le 6-8 itula i potu aoga ma fa’atinoga o tiute e fa’asao ai le soifua o tagata.”  O nei kosi uma e totogi, ae fuafua fo’i i ituaiga taimi ma kosi o mo’omia ona e fia fa’atinoa.

 

AUAI OFISA TURISI FONOTAGA AUSETALIA

 

Ua mae’a tu’uva’a atu le sui o le Ofisa Turisi, Fa’atonu o David Vaiafe, i le fonotaga fa’apitoa a le South Pacific Tourism Exchange - SPTE i Melepone Ausetalia, lea e fa’alua ona faia i le tausaga e tasi, ma ua le misia fo’i nei avanoa e le Ofisa o Turisi, ona o le tau atina’e lava o lea itu o le tautua a le malo mo se si’itaga o le tamaoaiga tausi o le atunu’u.

 

O le a fa’aalia ai fo’i nisi o tautua fa’apitoa e mafai ona fa’afiafiaina ai tagata tafafao mai i le atunu’u e le ali’i fa’atonusili o lea vaega o le tatou Malo, ma ua faia nei fonotaga ina ia so’ofa’atasi atumotu uma o le Pasefika i ala eseese e fa’atosina atu ai agaga o i latou e fia tafafao mai. O le fonotaga lenei ua aofia ane i ai nisi e fia fa’atau ‘oa i oloa ua gaosia i atumotu o le pasefika. O le fonotaga e amatala i le aso Iuni 18 - 21, 2015 ma toe ta’ape mai ai.