Ads by Google Ads by Google

TALA VAIFANUA

FA’ATOA USUIA FONO TERRITORIAL PLANNING COMMISSION

 

Ina ua mae’a pasia e le fono ia Aperila 2015 le isi to’alima o sui totino o lea Komiti, ona fa’ato’a mafai lea ona usuia le latou ulua’i fonotaga i le lua vaiaso talu ai i le Matagaluega o Fefa’ataua’iga (le DOC).

 

E fai sina umi e le’i toe faia ni fonotaga a lea Komiti Fa’afoe ona o le le maua lava o le aofaiga o sui e ao ai ina fa’atautaia latou fonotaga. Peita’i na gata mai latou fonotaga ia Iulai 2014, ma fa’aosofia ai le faigamalo ina ia toe fa’ao’o mai nisi sui fou mo le iloiloga a le Fono Faitulafono e pasia atu ai i latou.

 

Peita’i ua fa’ailoa le agaga fa’afetai o le Fa’atonu Keniseli Lafaele o le DOC ina ua toe mafai ona fa’aauau fonotaga a lea Komiti ina ua mae’a fa’ataunu’u fo’i tiute o le fa’auluuluga o le faigamalo.

 

Mai le to’aiva o sui lautogia mo lea Komiti e to’a valu i latou na auai i le ulua’i fonotaga i le vaiaso ua te’a. O i latou nei e aofia ai: Meleagi Suitonu Chapman (mo le itumalo numera #1); Papalii Iakopo Ierome [mo le itulamalo #2]; Malepeai Setu (mo le Itumalo #3); Gi Malala (mo le itumalo #4); Pogia Tusipasi Suiaunoa (mo le Itumalo #5); Atualevao Gafatasi Afalava (mo le Itumalo #6) ma sui e to’alua o le Vaega Tuma’oti: Flo Uhrle ma Rosa Mana Hopkinson.

 

O le tiute mautu o le TPC [Territorial Planning Committee] po’o le Komiti Fa’afoe o Fuafuaga Fa’ataoto o le Teritori o Amerika Samoa, e ao ina latou toe vailiilia leleia ma aumai fautuaga i se fuafuaga o galuega fa’atino mo le atina’e o le atunu’u. A maea vailiilia leleia so’o se galuega ma ona aiaiga, ona toe fa’afo’i lea o a latou fautuaga i le Kovana Sili ma le fono faitulafono mo a latou iloiloga e toe va’ai toto’a pe ua talafeagai pe leai.

 

O le DOC e latou te tapenaina le fuafuaga o se galuega, fa’amoemoe lea i le pasia mai i le iloiloga a lea Komiti Fa’afoe lea e aotelega i ai sui o itumalo e 6 ma sui tumaoti  ua mae’a pasia e aofia ai.

 

E i ai fo’i sui e to’alua ua mae’a tofia e le DOC e galulue fa’atasi ma sui o lea Komiti Fa’afoe i lenei tausaga, ma o i la’ua nei o le tama’ita’i o avea ma Territorial Planner Line-Noue Kruse ma le sui o le Zoning o Faau Seumanutafa.

 

O tiute sa mua’i fa’asaga atu i ai lea Komiti, o le va’ai toto’a lea i le fuafauga fa’ataoto o le Teritori i le taimi nei, ma toe taga’i toto’a i ana galuega atina’e po’o talafeagai ma se lumana’i manuia o le atunu’u, ma ua toe fa’amanatu mai fo’i ele laulau, ua tatau ona toe va’ai toto’a i le latou tiute fa’atino, “E tatau ona fa’afou lea fuafuaga fa’ataoto o le atunu’u i le ta’i lima tausaga.”

 

E fa’alua ona faia fonotaga a lea Komiti i le masina e tasi, ae ua latou talosagaina le fuafuaga fa’ataoto o le atunu’u i le taimi nei, ina ia taua’aoina i le vaiaso nei ia i latou, mo a latou iloiloga ta’ito’atasi ae le’i fono i latou i lenei masina.

 

O loia faufautua o le Ofisa o le Loia Sili, e avea ma faufautua Komiti Fa’afoe, ina ia latou iloa lelei o latou tiute, fa’atasi ai ma lo latou malamalama lelei i ala e fa’atino ai latou tiute ua mae’a tamau i le tulafono a le Malo o Amerika Samoa.

 

U.S. MARSHALS FA’AO’O ANETIPA I LONA ILOILOGA FETARALE

 

Na poloa’ia e le fa’amasinoga fetarale i Alaska le US Marshals latou te totogia le pasese o Pepe Anetipa e mafai ai ona malaga mai le setete o Uosinitone agai atu i Alaska mo se tasi o ana iloiloga, ua faatulaga i le aso 22 o Iuni.

 

Ua mae’a tu’ua’ia e le fetarale Anetipa i lona failaina o lafoga tau fa’asese ma ua ia mauaina fo’i lafoga totogi e tusa ma le $202,859.

 

O Anetipa na molia ia Tesema 2014, ona o lona faila seseina o lafoga i le IRS e faaaoga ai tusitusiga o lafoga a tagata Amerika Samoa, ma o lea tulaga e le talafeagai ma le tulafono fetarale.