AUAI TAGATA LAUILOA O AMERIKA - TUTOATASI O SAMOA

O le atoaga o le 57 tausaga o le Tuto'atasi o Samoa, i le fa’aiuga o le vaiaso ua te’a sa auai ai le to'atele o ana malo fa'aaloalogia, e aofia ai nisi lauiloa i le vasega o tagata o ata tifaga, atali'i o le uso o President Kennedy, Robert Kennedy ma lona to'alua, Cheryl Hines, le teine o ata tifaga.

Sa auai foi le sui o Amerika Samoa i le Konekeresi, Aumua Amata, ma le Lutena Kovana o Amerika Samoa, Lemanu Peleti Mauga.

Ua fa'ailoa, ua ala ona vave tele le o'o ane o nei tagata fai ata tifaga i Samoa ona o lo'o ua i ai fo'i le ata fou a Seiuli Dwayne “The Rock” Johnson lea e feso'ota'i ma le Fast & Furious, "Shaw & Hobbs" lea ua tatalia nei le fa'aalia i le vaitau o le taumafanafana o lenei tausaga. O le ata lea sa pu'ea lona vaega fa'ai'u i Samoa, ma o se ata ua fa'aofi atu i ai ma nisi o tu ma aga a Samoa, "Sau Ia!"

O le ali'i o Robert Kennedy Jr, o le atali'i lea o le uso o Senator Robert Kennedy, lea fo'i sa avea ma Loia Sili i Amerika ma sa fanaina fa'anana fo'i a'o tula'i i lea tofi, e pei fo'i o lona uso peresetene, JFKennedy.

O Robert Kennedy Jr o se ali'i Loia i mataupu tau le Siosiomaga. O lona faletua o lo'o auai mai mo nisi o pisinisi e le o ni mea e feso'ota'i ma le Tuto’atasi a Samoa, peita'i ua manatu le faigamalo ina ia fa'asalafa ia i la'ua se vala'aulia fa'aaloalo, ona o nisi taualoa fo'i o le Iunaite Setete o Amerika e tupuga mai ai i la'ua nei, ma lo la sao fo'i i le tamaoaiga maua o le atunu'u e ala i tagata asiasi ma fa'atautaia pisinisi i Samoa.

Ua fa'ailoa sa alaala i la'ua i le Taumesina Island Resort, ma na fa'ailoa e le tama'ita'i o Cheryl Hines, le faletua o lea ali'i loia i ana fa'amatalaga fa'alaua'itele i luga o upega tafailagi, "Ua ma'ua fa'afiafiaina tele i le nofoaga o ma'ua nonofo ai i le Taumesina, ae maise o le Seki Festival o siva fa'asamoa uma ua ma'ua maimoaina ai. E ese mai lea o le matagofie o le fa'amamaluina o le atoaga o le 57 tausaga o le Malo Tuto'atasi o Samoa, o se malo na'o sina motu lava o lo'o fa'avae ai."

O le tele o ata o le tama'ita'i ma lona to'alua, ua pe'a fa'atasi ma i latou sa sisiva i fa'afiafiaga a le Seki Festival i le taimi na faia ai lana fa'asalalauga i luga o upega tafailagi.

Sa fa’ailoa e Aumua, sana fa'amanuia fa'alaua'itele i le faigamalo Tuto'atasi a Samoa ma ona tagata ma sa ia fa'ailoa ai lona agaga fiafia tele ina ua mafai ona la'ua auai fa'atasi ma le Sui Kovana.

Na alaalata'i i latou uma fa'atasi ma le Ao Mamalu o le Malo o Samoa Tuimalealiifano Va’aleto’a Sualauvi II & Masiofo Faamausili, Prime Minister Tuilaepa Dr. Sailele Malielegaoi & Mrs. Gillian Malielegaoi, le Sui mamamlu o le Malo tele, US Charge d’Affairs Antone “Tony” Greubel ma le Sui Kovana Lemanu Peleti Mauga o Amerika Samoa.

"Fa'amanuia pea le Atua i le Malo o Samoa, o le 57 tausaga lenei ua aulia o ni tausaga o le filemu ma le manuia mai le Atua mo Samoa ma ona tagata, matou te fa'afetaia fo'i le anoanoa'i o mea lelei ua tatou ola feso'ota'i ai, e le gata i lo tatou usoga, ae o le va fo'i ma isi malo fa'aatumotu o le Pasefika atoa ma ona malo tetele o Niu SIla ma Ausetalia."

"O lea so'otaga e le mafai ona suia e se tasi le alofa moni fa'aleuso, o le olaga fa'asamoa o le talimalo lelei, ae maise o le laufofoga fiafia e fa'aatoa ai le agaga o le fa'afeiloa'i ma le fiafia, o auro ia a Samoa e tumau pea, i le tatou olaga i aso uma,” o se tala lea a Aumua.

Na ia fa'afetaia fo'i le avanoa ua tu'uina atu e Lemanu e malaga fa'atasi ai ma ia i Samoa mo lea vala'aulia fa'apitoa.

POLOKALAMA GALUE MO FANAU A'OGA IUNI 24, 2019

O le polokalama mo le fanau a'oga e faigaluega ai i le tuuaga o le taumafanafana - Summer Youth Employment Program - i ofisa o le malo, pisinisi tumaoti ma fa'alapotopotoga, ua faatulaga ina ia amatalia ia Iuni 24, 2019. O lea polokalama a le malo o lo’o i lalo o le va’avaaiga a le Matagaluega o Tagata Faigaluega (DHR) a le malo.

Ua le mautinoa i le taimi nei le aotelega o avanoa ua mafai ona maua e fa'atumu e le fanau a'oga i lenei tausaga.

Peita'i ua fa'ailoa mai e le tama'ita'i sui Fa'atonu o le DHR, Makerita Enesi, "E le mafai ona mautinoa le aotelega o avanoa nei, se'ia oo ina mua'i fa'ailoa mai le aofaiga o le seleni mai le Polokalama a le Community Block Grant ma le Ofisa fo'i o le Kovana. O le masani lava ua na'o se vaega o le fa'atupega a le Workforce Investment Act, e fa'aaoga mo le totogi o nei fanau a'oga i lea vaitau o le a fa'aa'oa'o ai i galuega fai.

Peita'i o le tausaga ua te'a na fa'afaigaluega le 800 o tamaiti a'oga. Peita'i o le vaiaso a sau nei o le a amata loa ona fa'afeso'ota'i atu i latou le fanua ua talia a latou talosaga na fa'atutumu mo nei avanoa faigaluega mo le taumafanafana.

AMATA FA’AGAFUA TOTOGI MO NISI TAUTUA A LE LBJ

O le fa’aiuga o le vaiaso ua te’a sa fa’amaonia ai e le pulega a le Falema’i o le LBJ Medical Center, le fa’agafuaina o totogi mo nisi o tautua a le falema’i, e pei ona muamua fa’alauiloa e le pulesili o le falema’i i se fonotaga a le Kapineta i le masina ua te’a.

I se pepa o fa’amatalaga mai le falema’i, ua fa’alauiloa aloaia ai e fa’apea o le Iuni, 1, 2019, sa amata ona fa’agafuaina mo se taimi le tumau le totogiina o le lafoga ulufale mo le va’aia o le foma’i i potu tala vai, mo e o lo’o alala i Amerika Samoa.

Ma e mana’omia pepa faamaonia mo tagata nuu, sitiseni mai Amerika, atoa ma e o lo’o fai mai, ma o lo’o u’umia pepa ulufale i Amerika Samoa mai le ofisa o femalagaina.

O Potu Talavai nei ua fa’aagafuaina le totogiina o le lafoga ulufale, e aofai ai le Dental; ENT Clinic; Dialysis; Eye Clinic; General Surgery; OB/GYN Clinic; Pediatric Clinic; Radiology (Diagnostic Imaging) Services; ma le Rehabilitation (Physical Therapy) Services.

Fa’ailoa e le LBJ e fa’apea, o le a fa’aauauaina pea le totogiina o le $20.00 mo e asiasi atu i le ER (Emergency Room) - Potu talavai mo gasegase faafuase’i. Faapea fo’i le Fale Talavai. E fa’aauau pea le totogiina o le $10.00 mo vailaau faatonuina.