4 TAUSAGA PASIA FAATAOTO POLOKALAMA TITLE 111 TAOA

Ua mae’a taua’aoina i le afioga le Kovana Sili Lolo Moliga le tusi aloa’ia mai le Sui Failautusi mo Polokalama Tagata Matutua i le Region IX, Kathy Greenlee, ua pasia e le latou Ofisa autu i San Francisco le Fuafuaga Fa’ataoto o le Polokalama TAOA Title 111 ua taua’aoina e le TAOA Amerika Samoa.

O lea vaega o polokalama a le TAOA e aofia ai vaega e tolu ua mae’a fa’atautaia ai le polokalama i lenei tausaga. Polokalama mo Mea Tausami tufaina atu - ua le toe taua’aoina le seleni i tagata matutua e fa’atau ai e i latou mea taumafa po’o mea e gaosia ai latou mea taumafa, ae ua tufaina atu fa’atolu i le vaiaso e tasi i Aso Lua, Aso Lulu ma Aso Tofi.

Polokalama lona lua o Ta’avale e femalaga’i ai tama ma tina matutua, ma ua fa’atautaia fo’i lea vaega o le polokalama i le taimi nei, mo talavai a matua e mamao mai le falema’i, ma e mua’i vala’au mai ma feutaga’i taimi ma aso o femalaga’iga a nei pasi fa’apitoa mo tagata matutua.

Polokalama lona tolu o lo ua amatalia nei ae le’i mae’a ona fa’atula’ia atoatoa e le tatou vaega a le TAOA i le taimi nei, “Le tausiga o tagata matutua i o latou aiga!” Ua amata gaoioia lea polokalama o lea ua fa’ailoa mai, o aiaiga ma le fa’atulagaga ua taua’aoina mo lea vaega o le tautua mo tagata matutua iinei, ua mae’a pasia lelei mai.

Ina ua fesiligia le tama’ita’i e sailia vaega tupe mo polokalama e fa’atautaia ai le TAOA, Lorelei Haleck-Fifita ma o le Sui Faatonu sa ia taua’aoina mai lea fa’ai’uga mai fafo, ae ia fa’ailoa mai, “Ioe ua mae’a fo’i ona pasia mai ma le seleni e fa’atupe ai lenei polokalama mo ia tausaga uma ua pasia mai lona fuafuaga fa’ataoto.”

I le vaega mulimuli o lea tusi, sa fa’ailoa mai ai le fiafia o le Ofisa Autu i San Francisco i le taumafaiga fou ua fa’ataoto atu nei ina ia mafai ona fa’aleleia le soifua o tagata matutua o le atunu’u, ma ua fiafia i latou e galulue fa’atasi ma le tatou Ofisa o le TAOA iinei i le lumana’i

MASI’I AU KIRIKITI “TAMA O LE MUA’AU” VAIASO TEUILA I SAMOA

O lo ua masi’i atu le “Tama o le Mua’au” mai Faleniu i Samoa Tuto’atasi mo le Ta’amilosaga Kirikiti Fa’avaomalo, e fa’ailoga ai le vaiaso o le Teuila 2015. O lo’o aofia ai i le taamilosaga faavaomalo, lea na amata i le aso Gafua (taimi Samoa) ‘au kirikiti a Amerika Samoa, Samoa, Ausetalia ma Niu Sila.

E ui ina o lea lava e fa’atautaia le Liki Kirikiti a le tatou Asosi Kirikiti mo le Vaiaso o le Moso’oi, ae o lea ua masi’i le “Tama o le Mua’au” ona o se vala’aulia faapitoa mo le Siamupini o le Sisigafu’a a Amerika Samoa i lenei tausaga.

E ui ina o lo ua masi’i Tama o le Mua’au, ae o lo’o fa’aauau pea lava ta’aloga e ao ina fa’atino mo le Liki, ae ua fa’anoi fo’i le Tama o le Mua’au mai a latou ta’aloga faitaulia, pe afai o i ai, i le tatou liki o le Moso’oi se’i toe taliu mai Samoa.

O le tala fiafia, ua “malo Tama o le Mua’au i le ‘au kirikiti na siamupini i Upolu, le ‘au malosi a Faleula.” Lea ua tatalia le ta’aloga i le aso a taeao ma le ‘au a le Povi Po’a mai Le’auva’a. Ma o ‘au fo’i ia o lo’o pulu fa’atasi ma “Tama o le Mua’au” i le Liki o le Teuila fa’atasi ai ma Uelinitone i Niu Sila.

I le pulu lona lua o le Liki a le Teuila, ua tauva ai le ‘au mai Savaii ma le ‘au a Ausetalia  fa’apea ma le ‘au kirikiti a Aukilani i Niu Sila.