FA’AI’UGA MASINA MO I LATOU E I AI MANAOGA FAAPITOA

O le toe aso o le masina o Mati 2016 na fa’ai’u aloa’ia ai e le Pulega ma le Aufaigaluega a le OPAD fa’atasi ma latou pa’aga le masina na fa’ataua uma ai auaunaga ma i latou ua i ai mana’oga fa’apitoa i le tino fa’apea ma le mafaufau i Amerika Samoa.

Na saunia nisi o fa’ailoga matagofie e taua’aoina i nisi o i latou sa iloga ni a latou taumafaiga eseese i le tausaga ua tuana’i fa’apea fo’i ma le tele o polokalama sa fa’atautaia i le atunu’u a’o lumana’i lenei fa’ataua.

 O sui iloga fo’i sa pa’au atu i le Special Olympics ma sa fa’amanuiaina i pine auro, siliva ma apamemea, sa fa’apea ona fa’amau fa’ailogaina i lea fo’i sauniga mamalu. Na aofia fa’atasi ai le matagaluega ma a latou pa’aga i lenei fa’ataua.

O le Matagaluega o le Soifua Maloloina sa mua’i taua’aoina latou meaalofa ma sa agava’a ai le tama’ita’i o Elsie i se fa’ailoga matagofie mo ia na latou tapenaina. E tolu lava fa’ailoga na fa’atulaga, peita’i, e le’i pa’au atu isi sui e to’alua mo la’ua fa’ailoga.

Ina ua o’o le fa’asologa i le vaega a le OPAD sa latou fa’alauiloa ai fa’ailoga mo sui na suia fa’apitoa Amerika Samoa i le Special Olympics:

Justin Lutu mo le Pine Auro, Hanipale ma ‘Superman’ Dennis mo pine apamemea fa’atasi ai ma Sina Petelo sa auai fo’i i le moligafu’a ma isi ta’aloga, fa’atasi ai ta’aloga tamo’e i le Special Olympics i el fa’aiuga o le tausaga ua te’a.

O le Fa’atonusili Peter Tinitali sa tula’i ma fa’afetaia le vasega o i latou na auai o e na fa’asinotonu i ai lenei polokalama, ae maise sui aloa’ia o polokalama fa’atautaia fa’atasi mo le auaunaga o nei sui i totonu o le teritori o latou pa’aga e pei o le DHSS, DOH, Voc Rehab ma le SPED/DOE.

“O la outou tautua e iloga ai o outou loto i le auaunaga ia au mo sui nei, o tatou fanau fa’apitoa ona tausia lelei, atoa ai ma le tatou amana’ia o i latou ma latou aia tatau e soifua fiafia ai, ma maua uma alamanuia mo tagata lautele.” O se tala lea a le fa’atonu Peter Tinitali.

AVANOA SIKOLASIPI MCDONALDS 2016-2017

O lo ua fa’asalalauina i le fa’aperetania ina ia talosaga ane i le Ofisa Autu o le McDonalds i Nuuuli ina ia taua’ao ane ai sau pepa talosaga, ae o le fanau a’oga i a’oga maualuluga o le a fa’au’u  e maua lava lau pepa talosaga i le Ofisa o lau Faufautua i le tou a’oga.

O le a fa’amuta lea avanoa lelei i le aso 29 Aperila, 2016 ma ua fuafua nei avanoa ina ia a’oa’oga ai le fanau i le isi tausaga a’oga fou. Ua va’aia pea lava le si’isi’i i luga o le tetele o sikolasii ua ofoina mai e lenei Kamupani, ae o le latou fa’afetai fo’i lea e fa’aalia i se ala e toe fa’afo’i sa’o ai i tagata nu’u o Amerika Samoa e le McDonalds lo latou agalelei ma sapaia a latou fefa’ataua’iga i le tatou nei malo.

ULUA’I FA’AALIGA TINOLELEI AMERIKA SAMOA:

O le Asosi o le Tino Lelei i Amerika Samoa lea ua fa’alauiloa mai le latou ulua’i fa’aaliga tino lelei e faia lea i le Lee Auditorium ia Aperila 16 ma ua fa’atautaia tonu fo’i i le vaitau ua lolofi mai ai o tatou tagata mai fafo e fia maimoaina le tatou Sisigafu’a i lenei tausaga.

O loo ta’imua mai ai le vaega ua mae’a avea a Pine Auro a Amerika Samoa i le Tino lelei: Mr ManasemAfuha’amango ma Ursula Fitimaleafa Teo- Martin i lenei fa’aaliga, ma ua fa’ailoa mai fo’i e to’atele nisi o fanau ua fiafia i lenei fa’agatama o le a auai e fa’aalia o latou tino.