Tala ototo o Fa’amasinoga

TAOFIA E LEOLEO I LE AVE TA’AVALE ‘ONA

 

E to’atele na taofia e leoleo i le faaiuga o le vaiaso na te’a nei, ona o tu’uaiga i le ave ta’avale ‘ona.

 

Mai le to’a 23 na taofia e leoleo i le faaiuga o le vaiaso, o le to’a 10 o i latou ia na tuuaia i le ave ta’avale ‘ona, ae o le isi to’a 13 ua tuuaia i moliaga eseese e aofia ai le faatupu vevesi i nofoaga faitele, tagofia o le ava malosi ae le’i atoa le 21 tausaga le matua, faapea ai ma i latou o lo o nofo vaavaaia i luma o le faamasinoga ae ua toe tuuaia i le le usitaia lea o poloaiga o a latou nofovaavaaia.

 

Na taua e le Sui Komesina o Leoleo ia Leseiau Laumoli i le Samoa News e faapea, o i latou e toa 23 sa taofia i le toese i Tafuna, na amata taofia mai e leoleo i le po o le aso Faraile na te’a nei seia aulia mai le vaveao o le aso Gafua ananafi.

 

“E ui i le to’atele o i latou sa taofia e leoleo ona o solitulafono eseese, o se tala fiafia pea lenei mo le atunuu, ona e le o i ai lava se faalavelave matuia ua aafia ai se soifua o se tagata, sei vagana ai lava faalavelave laiti o lo o tutupu mai e pei o le faamisa pe a tago i le ‘ava, atoa ai ma le loka i le ave ta’avale ‘ona,” o le saunoaga lea a Laumoli, ma ia toe fautuaina ai le atunuu ina ia nofo i le fale pe afai ua tagofia le ‘ava, ae aua le fealua’i ‘ona i le ta’avale ina ne’i tula’i mai ai se faalavelave e sili atu ona matuia.

 

O le fautuaga fo’i lea na momoli e le afioga i le kovana sili i lana kapeneta ananafi, a’o sauni atu ai le atunuu mo le faafeiloaiina o le tausaga fou i le tulua o po nanei, ina ia nofo i le fale pe afai ua tago i le ‘ava.

 

“Aua e te tago i le ‘ava ma ave le ta’avale, afai ua e iloa ua e tagofia le ‘ava, su’e se isi e aveina le ta’avale, ae le o lou alu ‘ona lava i le ta’avale, ae a taofi loa oe e leoleo ua e vili mai ia te a’u e tatala oe, a o lena ua e soli le tulafono. O le fautuaga, ia fai tatou uma ma faataitaiga lelei i le atunuu, aua le soliina le tulafono,” o le fautuaga lea a Lolo i sui uma o lana kapeneta.

 

O le toatele o i latou na taofia e leoleo i le faaiuga o le vaiaso na tutula’i ai i luma o le faamasinoga faaitumalo i le taeao ananafi, ua toe tatalaina uma i tua e faatali ai le aso lea ua faatulaga e toe fofogaina ai a latou mataupu, sei vagana ai se vaega toaititi ua toe taofia nei i le toese i Tafuna, sei vagana ua totogi vaega tupe ua faatulaga e le faamasinoga ona faatoa mafai lea ona tatala i latou i tua, ina ua latou le usitaia poloaiga sa tuuina atu e le faamasinoga e usita’i ai, a’o nofovaavaaia ai i latou.

 

E tusa ai ma faamaumauga a le faamasinoga, e leai se faalavelave tau taavale matuia na tula’i mai i le faaiuga o le vaiaso, sei vagana ai se taavale na tau oso i tua ma le auala ina ua ova le ‘ona o le ave taavale, ma mafua ai loa ona taofi e leoleo le taavale i se vaega o le alatele i Nuuuli.

 

Ina ua fesiligia e leoleo le ave taavale, sa maitauina le sasi sasi solo o ana faamatalaga sa fai, e o o foi i ona foliga ma ona mata (tulou) ua mumu uma i le malosi o le ‘ava sa i lona tino, ma taofia ai loa o ia i le toese i le po o le aso Faraile na te’a nei, ma molia ai i le ave taavale ‘ona ina ua tulai i luma o le faamasinoga faaitumalo i le taeao ananafi.

 

E tasi le isi faalavelave na tulai mai i Leone i le faaiuga o le vaiaso na te’a nei, ina ua tula’i mai se misa i se inugapia a ni alii se toafa sa faia i luma o se faleoloa.

 

E tusa ai ma faamaumauga a le faamasinoga sa taua ai e faapea, o le vevesi na mafua mai ina ua palauvale le isi alii o le au inu, ona taumafai lea o le isi alii matua e fautua i ai e soia le pisa tele ua momoe le nuu, peitai sa atili ai ona malovale le alii laititi ma i’u ina ta ai loa e le alii matua lona ulu i le faguia.

 

O lo o molia uma  i laua ia i le faatupu vevesi i nofoaga faitele, ma ua toe tatala i tua i laua e faatali ai le aso lea ua faatulaga e toe fofogaina ai le la mataupu.

 

RAYMOND LEVI

 

O le alii e 24 tausaga le matua lea na tuuaia e le malo i moliaga mamafa e lua o le talepe fale ma le gaoi, ua ia tautino i luma o le faamasinoga maualuga e faamaonia tuuaiga faasaga ia te ia.

 

O le tali ioe ai o le alii o Raymond Levi i le moliaga o le gaoi, na ia tautino ai e faapea, i se taimi o le aso 21 Setema 2013 i Tafuna, sa ia osofaia ai se faleoloa ma ia ave faagaoi ni oloa sa i totonu e aofia ai pusa pia e lua ma ni pepa sikaleti se 4, ma o ia oloa na ia gaoiina sa faaaoga i le taimi o le latou inugapia ma ana uo e toatolu.

 

I le talia ai e le faamasinoga maualuga o le tali ioe a Levi i le moliaga o le gaoi, na talosaga ai loa le malo i le faamasinoga ina ia solofua le moliaga o le talepe fale i le tulaga lua o lo o totoe ai i le pepa o tagi.

 

O lo o taofia pea Levi i le toese e faatali ai le aso 30 Ianuari 2014 lea ua faatulaga e lau ai lona faasalaga.

Comment Here