Ads by Google Ads by Google

Tala otooto o Ta’aloga

POPOLE KLITSCHKO I LE MALOSI O LE TU’I A LEAPAI

 

Ua faaalia i ni ripoti mai le au faasalalau i Lusia le faia e le alii siamupini o le lalolagi i le paga mamafa, le alii o Vladimir Klitschko o ni faamatalaga e taua ai le mata’utia o le malosi o le tu’i a le alii o Alex Leapai, ma o se tasi fo’i lea o auala o le a ia popole i ai ao lumana’i ai le la fusuaga mo le fusi o le lalolagi i le aso 26 Aperila 2014.

 

O Leapai, o se alo Samoa mai le afioaga o Laulii ae o lo o aumau nei ma lona aiga i Ausetalia, na ia faatoilaloina le alii Lusia o Denis Boystov na numera tasi i le lu’iina o le fusi o le WBO o lo o umia e Klitschko, ma maua ai loa lona avanoa na te lu’iina ai le fusi lenei.

 

O koleniga a Leapai e pei ona la fufusu ai ma le maualuga mai Romania o Razvan Cojan lea na matamata ai Klitschko i le vaiaso na te’a nei, na maofa ai le siamupini o le lalolagi i le malolosi o tu’i a Leapai.

 

E fa taamilosaga na fufusu ai Leapai ma Cojan, sa fai le head gear a Cojan a’o Leapai sa fusu fua, ma sa vaaia e tagata faasalalau le malosi o le alii Samoa i le faatinoina o ana koleniga.

 

Na taua e le toatele o le au faasalalau i taaloga fusuaga e faapea, afai e sa’o le auala e ui ai Leapai i le taimi o le fusuaga, o le a matua tele lona avanoa e faatoilalo ai Klitschko ae manumalo i fusi o le lalolagi e aofia ai le WBA, WBC, IFB ma le IBO.

 

SAUNI MARK HUNT MO LE FUSUAGA LONA LUA MA ANTONIO SILVA

 

Ua talia e le alii Samoa mai Niu Sila ia Mark Hunt le lu’i lea ua fa’ataoto e le alii logologoa i le fusuaga o le kiki ma fusu ‘UFC’ ia Antonio ‘Big Foot’ Silva, ina ia faataunuu le la fusuaga lona lua, ona o lea na tutusa le la ulua’i fusuaga i le masina o Tesema 2013.

 

Afai ae manumalo Hunt i le la fusuaga lona lua lea ma Silva i le aso 28 Iuni 2014, lona uiga o le a latalata loa o ia i le avanoa e fusu ai i le fusi o le aupaga o lo o fusu ai.

 

SUI UMA LE AU TAITOA 7 A FITI

 

Ua faalauiloa e le faiaoga o le au taitoa 7 a Fiti ia Ben Ryan, o le a sui uma le au mo taamilosaga e lua a le IRB o lo o totoe i Sikotilani ma Enelagi.

 

Na taua e Ryan i se ripoti mai vaega faasalalau a Fiti i le vaiaso nei, e oo mai lava i le aso ananafi e le i faamautuina lava lana lisi mo i latou o le a filifilia i le au lea e le o toe umi se taimi ae faamautuina loa, o lo o i ai fo’i lana fuafuaga e ono suia uma le au atoa sa auina atu i Iapani ma Hong Kong.

 

E pei ona silafia, o le au a Fiti na siamupini i le vae a le IRB i Iapani ae na faiaina ia Aferika i Saute i le semi final i Hong Kong i le masina na te’a nei, ma le manuia ai lana taumafaiga mo le Ipu autu, lea na sola ma Niu Sila.

 

O Fiti na tulaga tolu i le taamilosaga i Hong Kong ina ua faiaina ai Ausetalia i se taaloga mataina ma le finau.

 

SAUNI PARKER MO LE ISI ANA FUSUAGA TELE

 

O se tasi o alo o Samoa ua lauiloa i Niu Sila i le taaloga o le fusuaga, le susuga ia Joseph Parker, ua sauni atu nei mo le isi ana fusuaga tele i le aso 26 Aperila, 2014, e pei ona faatulaga la te fusu ai ma le alii o Sherman Williams, i paga faaopoopo mo le fusuaga tele i le va o Alex Leapai ma Vladimir Klitschko.

 

O Parker ua 7 ana fusuaga, 7 manumalo, lea e aofia ai ma manumalo e 6 i le tu’ioti, ua faatulaga o le isi lea fetu pupula mo Samoa i le lumana’i i le taaloga o le faipele, ina ua ia faatoilalo ni isi o igoa tetele i le fusuaga e pei o Francis Porter mai Aferika i Saute, lea sa ia faatoilaloina i le taamilosaga 10 i se tasi o fusuaga iloga o lona olaga.

 

Na taua e Parker i le au faasalalau i Niu Sila lona fiafia tele e auai i le po lea o le a fusu ai lona uso Samoa ia Leapai, e le gata na te tapuaia faiva o Leapai, ae o le a maua ai foi lona avanoa e faalauiloa ai le igoa o Niu Sila ma Samoa i lea po, pe afai o le a manumalo i lana fusuaga lona 8 e pei ona sauni atu i ai.

 

faaliliu Ausage Fausia