TO’ATOLU ALII TUSITALA SEPANIA O LOO TAU SAILI

E to’atolu ni ali’i tusitala mai se Faalapotopotoga o Tusitala i Sepania o loo tau sailia i le taimi nei, i le tuana’i ai lea o vaiaso e tolu e le o toe vaaia i latou i le aai o Aleppo i Suria sa galulue ai. O alii o loo tau sailia nei, sa galulue i latou i le vaega tonu o loo vevesi ai taua i totonu o Suria, faapea ai nofoaga o loo pulea faamalosi e le vaega fa’atupu fa’alavelave mata’utia o le ISIS. I se ripoti sa faasalalau e le Minisita o le Va i Fafo a Sepania i luga o le CNN i le vaiaso nei, sa ia taua ai le popole o le atunuu, ina ne’i maua ane ua ave faamalosi e le au fa’atupu faalavelave alii o loo tau sailia. E tusa ai ma ripoti mai fafo, e le o se taimi muamua lenei ua leiloloa ai ni tagata Tusitala i nofoaga o loo vevesi ai taua ma faiga faatupu faalavelave.

TAU TAGATA PAPUA I LE NOFOAGA ELI AI LE AURO

E to’a 15 tagata mai le Itumalo o Ega i Papua Niu Kini ua maliliu i totonu o le lua vaiaso, e mafua mai i le vevesi ma le va tau o tagata i le nofoaga tonu o loo eli ai le auro. Ona o lea fa’aletonu, ua talosagaina ai e le Komesina o Leoleo a le Itumalo Taitai o le malo, o se poloaiga e faataga ai loa ona faia se taua i le va o leoleo ma le au faatupu faalavelave, ina ia mafai ai ona foia le faafitauli. Ae na taua e isi sui o le Itu Agai e faapea, afai ae faataga e le malo le tau o leoleo ma tagata tete’e, o le a atili ai ona toatele tagata maliliu. O le vevesi o loo masalomia na tulai mai ina ua faatau e le au tete’e fagupia ma ‘ava malosi, ma tuu i tagata o loo eliina le auro poo ‘maina’, e faaosooso ai o latou lagona e faatupu ni vevesi ma tula’i mai ai loa lenei faalavelave. Talu mai le 3 masina talu ai, ua silia i le to’a 60 tagata ua maliliu i lenei vevesiga.

FASIOTI AMERIKA TA’ITA’I AL QAEDA I SE OSOFAIGA I SURIA

Ua faamaonia mai i ripoti mai le Fale Pa’epa’e a Amerika lo latou fasiotia o le alii sa avea ma Ta’ita’i o le vaega faatupu faalavelave o le al-Qaeda, ina ua osofa’i e se va’alele le ta’avale sa fealua’i ai lenei alii i totonu o Suria i le aso ananafi. O le alii o Muhsin al Fadhi, sa avea muamua ma Taitai o le vaega fa’atupu fa’alavelave o le Khorasan Group, peitai o le tausaga na te’a nei na tuu faatasi ai loa lea vaega ma sui o loo totoe o le al-Qaeda, ma avea ai loa Fadhi ma o latou ta’ita’i. O le masina na te’a nei na faalauiloa aloaia ai e lenei alii le tatau lea ona faia ni osofaiga faasaga ia Amerika, ao lea ua fasiotia o ia i ni osofaiga faatopetope a Amerika.

OVA 3,000 TAGATA SULUFA’I TAUMAFAI E ULUFALE I EUROPA

E to’a 3,500 tagata sulufa’i mai itu eseese o le atu Europa ua taofia e leoleo ma toe faafoi i o latou atunuu na malaga mai ai, ina ua maua o taumafai e ulufale faamalosi i totonu o le atunuu, e ala i le fa’aaoga lea o auala o loo eli i lalo o le palapala (tunnel). Na taua i ni ripoti mai fafo le maliliu ai o ni tagata se to’a 10 ina ua tula’i mai se feteenaiga i le va o leoleo ma le au sulufa’i. O tausaga uma lava e pei ona taua i ripoti mai Europa, e to’atele ai le anoano o tagata sulufa’i e taofia e leoleo ma toe faafo’i i o latou atunuu, ina ua maua i latou o loo taumafai e laasia tuaoi o Europa ma le faamoemoe e fia nonofo tumau ai i totonu o le atunuu. O le to’atele o i latou nei e aofia ai fafine ma latou fanau, faapea ai fo’i tagata matutua.