NOFOSALA LE ALI’I SA AVEA MA PERESETENE O FRENCH POLYNESIA

E 18 masina lea ua nofovaavaaia ai le alii sa avea ma Peresetene o le atunuu o French Polynesia, atoa ai ma lona fa’atonuina o ia e toe totogi le US$19,000 aga’i le malo, ina ua ta’usala e le fa’amasinoga maualuga o ia i lona fa’aaoga le tatau o tupe sa fa’aagaga mo galuega lautele a le atunu’u, i le taimi ao avea o ia ma peresetene o le malo i le 1997 e oo mai i le 2004. O isi tuutuuga o lana nofovaavaaia, o le fa’asa lea ona ia toe tauva mo se tofi o le malo i totonu o le 2 tausaga.

FASIOTIA ALII AUSETALIA SA TAU MO LE VAEGA A LE ‘ISIS’

E to’alua ni ali’i mai Ausetalia sa tau mo le vaega fa’atupu fa’alavelave o le ISIS ua fa’amaonia mai i ni ripoti le maliliu, ina ua tu’i pomu e fitafita a Iraq le aai o Mosul i Iraq lea sa pulea fa’amalosi e le ISIS i le masina lenei o Iuni. I ni ripoti mai Suria sa taua ai e fa’apea, o le alii o Khaled Sharrouf ma Mohamed Elomar na maliliu ina ua fetoai le la ta’avale ma se pomu na fana sa’o atu e fitafita a Iraq ma maliliu ai i laua. O le ali’i o Sharrouf na mata’utia ona talaaga ina ua ia faalauiloa i le lalolagi se ata o lona atalii e 7 tausaga o loo ia uu le ulu (tulou) o se fitafita Suria ua mae’a ona fasiotia. O le alii o Sharrouf sa fa’afalepuipui i Ausetalia ina ua ta’usala o ia i lona taumafai e fa’apa se pomu i ni nofoaga tetele i totonu o Ausetalia, ae ina ua magalo o ia i tua, sa ia fa’aaoga le tusi folau a lona uso e sosola ai ma lona to’alua ma le la fanau e to’atolu i Suria, ma avea ai o ia ma sui o le ISIS.

FALEPUIPUI LE ALI’I SAVEA MA KOVANA O NORTHERN MARIANA

Ua faasala nei e le fa’amasinoga maualuga le ali’i sa avea muamua ma kovana o Northern Mariana, e nofosala i le falepuipui mo le tausaga atoa, ina ua fa’amaonia e le fa’amasinoga le moliaga o le faia o gaioiga fa’aalatua faapea ai ma le fesoasoani i se tasi e fa’ataunu’u le moliaga o le gaoi. Ina ua ta’usala e le fa’amasinoga le ali’i o Benigno Fitial, sa talosagaina ai loa e lana loia le fa’amasinoga ina ia fa’amalumalu le tuuina atu o se fa’asalaga fa’afalepuipui i lenei ali’i, ae afai e i ai se fa’asalaga fa’a falepuipui, ia fa’amalumalu uma le tuliina o lea fa’asalaga, ae poloaina o ia na te toe totogi le tupe ua leiloa a le malo. Ae mo le itu a le malo, sa talosagaina e le loia le tuuina atu o Fitial i le falepuipui mo le lua tausaga e aunoa ma le agava’a o ia i le palola.

ULUA’I TUPU O LE LALOLAGI ATOA LE 100 O ANA ‘AVA

O se tasi o tala ofoofogia mai le Tupu o le aai o Maroua i le atunuu o Cameroon i Matu, o le fa’aipoipoga mulimuli a le ali’i o Bakary Yerima Bouba Alioum i le vaiaso nei, ua atoa ai loa le to’a 100 o ona ta’ito’alua, e tusa ai o tu ma aganu’u a lea fo’i atnu’u. E tusa ai i tu ma aganu’u a le atunu’u, afai e maliu le Tupu, e mafai ona avea ona ta’ito’alua ma ‘ava a lona atali’i o le a tula’i mai i le nofoa, atoa ai ma le mafai fo’i lea ona faaopoopo i ai nisi ava fou a lona atali’i lea ua avea ma Tupu. O le alii o Bakary fa’atoa tolu tausaga talu ona avea ma tupu, ao lea ua ausia le toa 100 o ana ava, fa’atasi ai ma ‘ava uma a lona tama ua maliu. E ui o loo fa’aigoaina e ni isi i le atu Aferika le mata’utia ma le faapaupau o lenei aganuu, peita’i na taua e tagata o le aai o Maroua, e sili atu lo latou fa’amemelo i lo latou aganu’u nai lo se isi lava mea o lenei olaga.

SILIA 800 MALILIU PAKISITANA I LE VEVELA O LE EA

E silia i le to’a 800 tagatanu’u o le malo o Pakisitana ua fa’amaonia le maliliu i le vevela o le ea i totonu o le atunu’u, talu mai le masina atoa lenei o Iuni, e pei ona fa’aalia i ripoti ua salalau i soo se tulimanu o le lalolagi. I ripoti mai le atunuu o Pakisitana o loo taua ai e fa’apea, e le o fa’atulagaina i se ituaiga matua tagata ua maliliu, ae o loo a’afia lava soo se tasi. O le vevela o le ea ma le tau i lenei vaitau, o le mafua’aga lena o lenei fa’alavelave, peita’i i atunuu tuaoi o Pakisitana, o loo taua ai i ripoti le malolosi o timuga ma lologa, ona o le tulaga fa’aletonu o le tau. Ua taua i ripoti le fa’atumulia o fale maliu i totonu o le aai o Pakisitana i le to’atele o tagata maliliu ona o lenei fa’alavelave.