Ads by Google Ads by Google

Tala otooto o le Fono Faitulafono

MANA’OMIA SE RIPOTI GALUEGA AUALA MALAE VAALELE

 

Ua i luma o le maota o sui se iugafono na faaulu e le afioga i le tamaitai faipule ia Vui Florence Vaili Saulo mai le Itumalo o Tualauta, e talosagaina ai le kovana ina ia faatonu le faatonusili o Galuega a le malo, e tuu atu i le fono se ripoti atoatoa ma faamatalaga e faatatau i le  fausiaina o le auala e agai i le malae vaalele.

 

I le tino o le iugafono o lo o taua ai e faapea, o le auala i le malae vaalele ua avea ma faafitauli i le toatele o le atunuu aemaise ai tagata o le itumalo o Tualauta, ma ua silia ma tausaga talu ona feagai pea tagata o le motu ma le itumalo ma faafitauli ona o le faaletonu i le auala.

 

I se taimi e lei mamao atu na faalauiloa ai e le matagaluega o galuega a le malo le maua o tupe e toe faaleleia ai omoomo i le auala ina ia foia ai nei faaletonu.

 

Talu ona tuuina atu le galuega i le konekarate a le Whitehorn Construction Inc i le aso 23 Aokuso 2012, e itiiti lava se gaioiga ua vaaia e le atunuu ua faia i le auala, ma ua atili ai le tele o finagalo faasea o le atunuu ua faaoo atu i le fono ma le malo ona o lenei galuega.

 

I le faaiuga o le iugafono, ua talosagaina ai ina ia faatonu le faatonusili o galuega mo le tuuina mai lea o se ripoti o lenei galuega i luma o le fono.

 

FESILIGIA TUIASINA SAILIGA TUPE O LO O FAIA I TAFATAFA O LE ALATELE

 

O le faatupulaia o sailiga tupe a ni isi o faalapotopotoga e ala i le faia o ‘car wash’ i tafatafa o le alatele, o se tasi o lea o mataupu na fesiligia e le alii senatoa ia Tuiasina S. Esera i luma o le maota maualuga i le taeao ananafi, ona o se faalavelave na semanu a uma ai le soifua o se tamaititi e 9 tausaga i le aso Toona’i na te’a nei.

 

Na taua e Tuiasina i luma o le maota e faapea, o le alofa o le Alii na le mafai ai ona taia e le taavale se tamaititi e 9 tausaga na tamo’e atu e aumai tupe na tauai atu e taavale i luga o le alatele, i le taimi o le ‘car wash’ sa faia i le itu i Sisifo o le motu nei.

 

E ui e lei taua e le alii senatoa le afioaga sa faia ai le ‘car wash’, ae i lana saunoaga sa ia taua ai lona faanoanoa tele i tagata o lo o faatautaia sailigatupe nei, ona e tutuli mai fanau laiti e laulaututu i luma o le alatele ma su’e tupe, ae na o le nofonofo mai i lalo o laau ma pekete tupe, ae aunoa ma so latou popole i le saogalemu o fanau.

 

Ona o lea tulaga, sa talosagaina ai loa e le alii senatoa se avanoa e aami ai e le maota le komesina o Leoleo, sei fesiligia o ia e faatatau i lenei mataupu.

 

Na lagolagoina e le alii senatoa ia Mauga Tasi Asuega le finagalo o Tuiasina, ina ia aami le komesina sei fesiligia i le mataupu e faatatau i ‘car wash’, atoa ai ma le mataupu i taavale o lo o faaleotetele a latou laau pese i luga o le auala, ae aunoa ma se galuega a leoleo o lo o faia i ai.

 

Na faamanino e Mauga i luma o le maota e faapea, o le mataupu i ‘car wash’, ua maea ona i ai le tulafono e faasa ai sailigatupe nei, e faapena foi i le tulafono lea na pasia e le fono i le tausaga na tea nei e faasa ai le soona faaleotetele o laau pese i luga o le auala.

 

“O lea ua i ai tulafono ua pasia e le fono ma sainia e le kovana, ae foliga mai e leai ma se galuega a leoleo o faia i ai, e le o i ai foi ni isi o faasala i le soliina o nei tulafono,” o le atugaluga lea o le alii senatoa ia Mauga.

 

Ina ua fesiligia e le Samoa News le komesina o Leoleo ia William Haleck i le masina na te’a nei ina ua fesiligia i le maota o sui le mataupu lenei, na faamanino ai e le alii komesina le amata galulue o leoleo e faamalosi le tulafono.

 

Na taua e Haleck e faapea, ua i ai ave taavale ua maea ona tuuina atu i ai pepa sala ona o le le tausisi i le tulafono e faasa ai le soona faaleotetele o laaupese i luga o le auala.

 

E lei faatulagaina se aso e faia ai le iloiloga a le senate ma le komesina o leoleo e faatatau i lenei mataupu.

 

TALIGALU MA AUALA FALELIMA I SASA’E

 

O le fausiaina o taligalu ma pa e siomia ai auala savali i ni isi o afioaga i le Falelima i Sasa’e, o le autu lea o iugafono e lua na faaulufale e alii faipule ia Fatulegaee Palepoi Mauga ma Talaimatai Elisara Sua, e talosaga ai le kovana e faatonu faatonusili o galuega mo le faatulagaina lea o ni ata ma suesuega aua le fausiaina o ia galuega.

 

I le tino o iugafono o lo o taua ai e faapea, ua tele tausaga o aia pea auala o Alofau e oo atu i Amouli, Alao e oo atu i Tula, atoa ai Onenoa, Aoa ma Vatia, ona o le malolosi o galu e fafati mai i le sami, ma o ni isi o taimi e afaina ai soifua o tagata feoa’i ona o le leai o se pa e siomia ai le alasavali mo tagata.

 

O le fausiaina o nei galuega, o le a mafai ai ona faasaoina soifua o tagata o lo o alala i le Falelima i Sasae, e pei ona taua i totonu o le iugafono ua i luma nei o le maota o sui.