FA’ASEA GALEA’I I LE LEAI O SE MAMALU TATALAINA O LE FONO

Na fa’aalia le le fiafia o le afioga i le ali’i senatoa ia Galea’i M. Tu’ufuli i le aso Lua na te’a nei, i le leai lea o se mamalu i le taimi na tatala aloaia ai le ulua’i tauaofiaga a le Fono Faitulafono i le amataga o le vaiaso na te’a nei, ina ua le mulimuli ta’i le aufaigaluega i tulaga masani e fa’alauiloa ai fa’ailoilo ua tauaofia le fono a le atunu’u.

Saunoa Galea’i e fa’apea, i tausaga ua mavae, e muamua ona ‘ili le foafoa e fa’ailoa ai o le fono a le atunu’u o le a tauaofia, peita’i o le vaiaso na te’a nei, sa ia maitauina ai le leai o se mamalu, ina ua aga’i atu ta’ita’i o le atunu’u i totonu o le Fale Samoa mo le amataina o le sauniga e tatala ai le fono, pei lava o lo o savalivali i se paka e tafafao ai.

E ese mai i le alu ese o le mamalu o auala e fa’atino ai sauniga a le fono, ae na o o lava fo’i i taumafa sa fa’asea i ai le ali’i Senatoa, ina ua ia maitauina tulaga fa’aletonu o tapenaga mo taumafataga, ae o le isi lea vaega sa tatau ona matua silasila toto’a i ai le komiti sa tapenaina le fa’amoemoe, ia lelei le taumafataga mo ta’ita’i o le atunu’u lea ua afifio atu e molimau le tatalaina o le fono a le atunu’u.

Saunoa Galea’i i le ali’i peresetene ia Gaoteote Palaie Tofau, o ana fautuaga e taua mo le aga’i i luma, ae afai o nei fa’aletonu na mafua mai i le aufaigaluega, e sili pe a fa’amalolo le tagata na mafua ai nei fa’aletonu, aua o le Fono ma ona ta’ita’i e le fai mea leaga.

E le gata na fa’amalulu Gaoteote i finagalo o le maota e tusa ai o faaletonu e pei ona saunoa i ai Galeai, ae sa ia ta’utino fo’i e le toe tupu lea fa’aletonu i le lumana’i.

MANA’OMIA SE ILOILOGA MATAUPU LEOLEO NA MANU’A FANA

O le vaiaso na tea nei na talosagaina ai e le afioga i le ali’i faipule ia Larry Sanitoa le faia o se iloiloga a le komiti o le Puipuiga o le Saogalemu Lautele, se’i su’esu’e ai le mataupu e fa’atatau i le fa’alavelave lea na manu’a ai se ali’i leoleo i le tausaga na te’a nei, ina ua a’afia lona tino i se pulu fana a o fa’atino ai tiute fa’a le malo.

O le iloiloga e pei ona talosagaina e Sanitoa, e le gata e fesiligia ai le tulaga o le mataupu na manu’a ai le ali’i leoleo, ae o le taumafai fo’i lea e saili se auala e foia ai le fa’afitauli lea ua saoasaoa i le atunu’u i le taimi nei, o le umia fa’asolitulafono o fualaau fa’asaina atoa ai ma fana.

Saunoa Sanitoa e faapea, a o avea ai o ia ma ta’ita’ifono o le Komiti a le Puipuiga o le Saogalemu Lautele ma le Puipuiga o le Saogalemu Lotoifale, sa faia ai sa latou iloiloga i le 2010 e fa’atatau i le fa’alavelave lea na tagatavaleina ai le ali’i leoleo ia Det. Lt. Lusila Brown, lea fo’i na auai sui o le FBI ma le Ofisa o Leoleo a le atunu’u, lea na fa’alauiloa ai e le Ofisa o Leoleo sa latou fuafuaga ua mae’a ona fa’ataoto e foia ai faafitauli fa’apenei i le lumana’i.

“O lea la ua toe tula’i mai fo’i le ituaiga fa’alavelave lava lea e tasi, ua ou fia iloa la po o fea ua fai i ai le fuafuaga lea na fa’ailoa e le Ofisa o Leoleo i le iloiloga lea ua mae’a ona i ai, ina ia foia ai le aumai fa’anana i totonu o le teritori o fana ma fualaau faasaina”, o le saunoaga lea a Sanitoa.

Na taua e Sanitoa e fa’apea, afai o lo o gaosi i totonu o le atunu’u fualaau faasaina nei faapea ai ma fana, e tatau la ona saili po o fea tonu lea e maua mai ai mea o lo o fa’aaoga e gaosi ai mea nei.

Sa ia taua fo’i e fa’apea, e foliga mai ua leva ona i ai le tulafono, ae mana’omia le matua fa’amalosia ina ia puipuia ai le atunu’u.

O le itula e 8:30 i le taeao a taeao lea ua fa’atulaga e faia ai le iloiloga a le komiti o le Puipuiga o le Saogalemu Lautele a le Senate ma le Pulega a le Ofisa o Leoleo, e tusa ai o lenei mataupu.