MOMOLI MAI ALOFAAGA O LE KOVANA

Na taua e ta’ita’i o le Fono lea sa malaga e asi le gasegase o le afioga i le alii kovana i Hawaii, le maloloina o le tofa i le tootoo ia Lolo Matalasi Moliga, ma o lo o momoli mai fo’i ona alofaaga i le Fono faapea ai le atunuu atoa.

O le aso Gafua o le vaiaso na te’a nei na malaga ai le afioga a Gaoteote Palaie Tofau ma le fofoga fetalai ia Savali Talavou Ale, e fai ma sui o le fono mo le asia o le gasegase o le ali’i kovana i Honolulu.

I le toe taliu mai ai o ta’ita’i o maota e lua i le po o le aso Faraile na te’a nei, sa maua ai loa le avanoa la te faailoa ai i luma o maota e lua tulaga manuia ua i ai le alii kovana a o aumau ai i Honolulu.

“O lo o momoli mai alofaaga o le alii kovana i le Fono ma le atunuu atoa, e le o toe i ai o ia i le falema’i i le taimi nei, ae o lo o malolo i tua ma tau savali mo ana talavai,” o le fa’aaliga lea a Gaoteote i luma o le maota maualuga.

Ae na faailoa e Savali i afioga i faipule e fa’apea, sa talia ma le agaga fiafia e Lolo le asiga a le Fono e pei ona fai ai laua ma le peresetene ma sui o maota e lua, ma o lo o naunau ia vave ona oo mai le aso e toe malaga mai ai i le atunuu.

E tusa ai o ripoti sa tuuina mai e le afioga i le kovana le tumau ia Lemanu Peleti Mauga i se feiloaiga ma tusitala i le lua vaiaso talu ai, e i le va o le 90 e aga’i atu i le 120 aso ua fautuaina e foma’i le ali’i kovana e tatau ona aumau ai pea i Honolulu mo ana talavai.

TAPUNIA ALOAIA TAUAOFIAGA LONA 3

O le aso Gafua na te’a nei na tapunia aloaia ai galuega a le Fono Faitulafono mo lana tauaofiaga lona 3 i le mae’a ai o aso e 45 o ana galuega fa’atino.

Na momoli le agaga faafetai a ta’ita’i o maota e lua i afioga i senatoa ma faipule, ona o galuega e tele sa latou galulue mai ai i le amataga o lenei tausaga seia oo mai i le aso Gafua na te’a nei.

Na faailoa e Savali Talavou Ale i le maota o sui e faapea, o pili ma i’ugafono sa pasia e le maota i le tuana’i ai o aso e 45 o le tauaofiaga, ua fai lea ma sao o afioga i faipule i le faaleleia o le faigamalo ma le atunuu atoa.

“Faafetai fo’i i mataupu eseese sa outou lagaina mai i le tele o taimi, e pei o atugaluga i faaletonu sa aafia ai aoga, auala, falema’i ma vaega eseese o le tamaoaiga o le malo, lea ua vaavaaia ni isi o suiga na afua mai i a outou fautuaga, e momoli atu ai la’u fa’afetai ia te outou uma lava,” o le saunoaga lea a Savali i afioga i faipule.

I luma o le maota maualuga, na faafetaia ai e Gaoteote Palaie Tofau galuega lelei uma sa faatinoina e afioga i senatoa, mo le manuia o le atunuu ma le faigamalo.

PASIA FONO $200K FAATUPE AI POLOKALAME FANAU AOGA

O le aso Faraile na te’a nei na pasia ai e le Fono Faitulafono le pili sa tuuina atu e le Faigamalo, e talosagaina ai le $200,000 e faatupe ai le polokalame mo fanau aoga i le vai tuuaga o le tau mafanafana lea o lo o loma nei, ina ua fulisia afioga i faipule e pasia lenei tulafono.

Na fa’aalia e afioga i ali’i faipule e taua tele lenei tulafono mo le lumana’i manuia o fanau aoga a le atunuu, ona o se avanoa lelei lenei e mafai ai ona latou aga’i atu i matagaluega eseese a le malo, e vaavaai ma maitauina auala o lo o faatinoina ai galuega i totonu o ofisa.

Saunoa le afioga ia Faimealelei Anthony Fu’e Allen e fa’apea, na te matua lagolagoina fuafuaga a le malo ina ia fa’aalu se vaega tupe tele e fa’aleleia ai polokalame mo fanau aoga, nai lo le fa’aalu i isi manaoga e tatau ona ave i ai le fa’amulimuli.