Tala otooto o le Fono Faitulafono

SAUNI LE FONO E MALOLO MO LE 3 VAIASO

 

Ua pasia e maota e lua a laua iugafono i le taeao ananafi e sauni ai le faamalologa a le Fono Faitulafono mo le umi e tolu vaiaso. I se vaega o iugafono a maota e lua na pasia ananafi o lo o taua ai e faapea, i lalo o le Vaega II, Maga II o le Faavae Toe Teuteuina a Amerika Samoa, o lo o aiaia ai maota e lua o le Fono Faitulafono e faia ana malologa, ae le mafai ona malolo le isi maota e aunoa ma le malilie i ai o le isi maota, pe afai o se malologa e sili atu i le 3 aso.

 

Talu ai ua maea se vaega tele o galuega a le fono ma ua manaomia le faasaoina o ana aso fono, ina ia talafeagai ma le talanoaina o le paketi a le malo mo le Tausga Tupe fou 2014, o lea ua manatu ai maota e lua ina ia faia se malologa mo le umi e tolu vaiaso.

 

O lea malologa e amata i le aso Faraile, Iulai 26, 2013 ae toe tauaofia i le aso 19 Aokuso 2013. Ua i ai finagalo o afioga i ta’ita’i o maota e lua, o le masina o Aokuso e tatau ona tuu atu ai i luma o le fono le Paketi a le malo, ma amata faatulaga ai loa iloiloga mo le fesiligiaina o ofisa ma matagaluega taitasi a le malo e tusa ai o a latou paketi.

 

TAUNUU FONO TOFIGA KOVANA MO LE KOMITI SIKOLASIPI A FANAU AOGA

 

O le taeao o le aso Faraile o le vaiaso nei lea ua faatulaga e feiloa’i ai le komiti o Aoga a le Maota o le Senate, ma sui o le Komiti Faafoe lea ua maea ona tofia e le kovana e avea ma totino o le Komiti o Sikolasipi a fanau aoga.

 

O i latou ua tofia e le kovana i totonu o lea komiti e aofia ai Rev. Kalepo Vaitautolu; Mrs. Evelyn Lili’o-Satele; Tamalii Anesi Poloa; Jeanette Yamasaki; Sandy Ilaoa; le afioga i le alii faipule ia Vaetasi Tuumolimoli Saena Moliga ma le afioga i le ali’i senatoa ia Faumuina Tagisiaalii.

 

I se tusi a le afioga i le kovana sili ia Lolo Matalasi Moliga na tuuina atu i taitai o le fono faitulafono, sa ia taua ai le lava o le tomai ma le agavaa ia i latou ua ia tofia mo le faatinoina o le galuega.

 

Fai mai Lolo, o Rev. Kalepo ua tele tausaga o galue i le tofiga faifeau, sa galue foi i le vaega o tupe ma le vaega o galuega lautele a le Ekalesia EFKAS, o le taimi nei o lo o avea o ia ma feagaiga o le Ekalesia i Vaitogi.

 

O Evelyn e lei leva ona litaea mai le tele o taimi sa avea ai ma puleaoga o le South Pacific Academy, o ia o se faiaoga e silia ma le 26 tausaga o tautua i le matagaluega o Aoga a le malo, e le gata sa faiaoga ae sa avea fo’i o ia ma ta’ita’i.

 

O Tamalii sa galue foi i le matagaluega o aoga, sa galue i le vaega o le Faatonu o polokalama ao lei malolo litaea o ia.

 

O Jeanette ma Sandy, o ni isi ua lava lo la tomai e faatautaia ai ituaiga galuega faapenei, o lo o i ai agavaa i kamupani ma isi ofisa o le malo sa la galulue ai, ae o le afioga ia Vaetasi ma Faumuina, o lo o avea i laua ma taitai fono o le komiti o aoga a maota e lua o le fono, sa avea i laua ma faiaoga mo le tele o tausaga.

 

I le faaiuga o le tusi a le kovana i taitai o le fono, sa ia talosagaina ai i latou ina ia tuuina atu la latou lagolago i sui o le komiti ua ia tofia, ina ia mafai ai ona vave pasia ma amata faagaioi loa a latou tiute e pei ona tofia ai i latou.

 

FESILIGIA FAIPULE FAAFITAULI TULAI MAI LBJ

 

O le mataupu e pei ona faamalolo ai ni isi o tagata sinia mai le falemai o le LBJ mai a latou tofiga, na fesiligia e ni isi o ali’i faipule i luma o le maota o sui vaiaso nei.

 

Na taua e le afioga i le alii faipule ia Puleleiite Liamatua Tufele Jr e faapea, o le faamalolo ai o i latou nei mai a latou tofiga na galulue ai, o se tulaga e faateia ma faanoanoa ai lona loto, ae maise lava o i latou nei sa avea ma taitai o ni isi o vaega o le falema’i.

 

O ni isi o tofiga ua faamalolo e pei ona taua e Puleleiite i luma o le maota, sa faamoemoe i ai le olataga o le falema’i, peitai ua avea faafitauli tau tupe ma itu ua faia ai lenei faaiuga, ae na saunoa le afioga i le Fofoga Fetalai ia Savali Talavou Ale e faapea, e tatau lava ona taoto atu pea le mataupu a le falema’i e iloilo ma taulima e le komiti faafoe a le falema’i.

 

Fai mai Savali, afai e fia malamalama atili i ai faipule i le mataupu lenei, o le taimi lelei lava e fesiligia ai o le taimi e iloilo ai le paketi a le falema’i.

Comment Here