TOLOPO LE LAUINA O LE FAASALAGA O LE SUI FOFOGA FETALAI

O le Aso Tofi o le vaiaso fou, Aperila 25 lea ua toe tolopo i ai le lauina o le faasalaga a le Sui Fofoga Fetalai o le maota o sui ia Iaulualo Faafetai Taila, lea sa fuafua e faataunuuina i le taeao anana.

Ua ta’usala le alii Faipule mai Manu’a i le solitulafono, o lona faatagaina lea o le tuuina atu o le siaki e totogi ai se tagata faigaluega a le Matagaluega o Auaunaga Lautele ao si’i gasegase atu i fafo.

O le masina na te’a nei na taliaina ai e le faamasinoga maualuga le tali le tete’e a le alii faipule i le moliaga sa toe teuteu e le malo.

E tolu moliaga mamafa o le faaaoga faagaoi o tupe sa tuuina atu i lalo o lana vaavaaiga na ulua’i tuuaia ai e le malo ia Iaulualo, ae i lalo o le maliliega ua maea ona latou sainia ma le malo ma ua talia e le faamasinoga, ua ia tali tete’e ai i le moliaga muamua lea ua toe teuteu, ina ia faailoa ai le moliaga mama o le Faaaoga sese o Faamaumauga a le malo, o se solitulafono e mafai ona faasala ai se tasi i le toese mo le umi e le silia i le tasi le tausaga, pe faasala i le salatupe e le silia i le $1,000, poo le faasala foi i faasalaga uma ia e lua.

Ua talosagaina e le loia Tutoatasi o lo o tulai mo le malo ia Marcellus Tala Uiagalelei ina ia nofovaavaaia Iaulualo e aunoa ma le tuuina atu i ai o se faasalaga faafalepuipui.

OGE VAISAGOTE

Ua toe tolopoina nei le mataupu faasaga ia Oge Vaisagote mo le masina fou, ona o le toesea o le tamaitai loia a le malo, o Mitzie Jessop.

Na taua e le loia a Vaisagote e faapea, ua toeititi maea talanoaga o lo o faia ma le malo mo se maliliega e faamuta ai le mataupu a le ua molia.

O Vaisagote o lo o tuuaia i le moliaga o le faiaiga ma se teineititi laititi, tagofia o itutinosa o se tamaitai, faaoolima mataga, atoa ai ma le faia o gaioiga e ono lamatia ai le soifua maloloina o fanau laiti.

O tuuaiga faasaga ia Vaisagote na afua mai i le faalavelave lea na la momoe ai ma se tamaitai e 15 tausaga le matua i le masina o Tesema 2012 i lona fale i Laulii.

O lo o taofia pea Vaisagote i le toese i Tafuna ina ua le mafai ona ia totogiina le tupe sa faatulaga e tatala ai o ia i tua, ma faatali ai le aso lea ua faatulaga e toe tulai ai i luma o le faamasinoga maualuga.

IOE ALENI SUIA I LE SOLITULAFONO O LE FAAOOLIMA TULAGA TOLU

O le alii lea na tuuaia e le malo i le moliaga o le faaoolima i le tulaga tolu, ona o le faalavelave lea na ia titina ina ai le ua o se alii ave pasi i Tafuna i le masina o Fepuari na te’a nei, ua ia faailoa i le faamasinoga e faapea, e moni tuuaiga sa faia faasaga ia te ia.

I le tali ioe ai o Aleni Suia i le moliaga e pei ona taua i se latou  maliliega sa faia ma le malo, sa ia tautino ai e faapea, o lona ita tele i le alii ave pasi na aafia na maua ai ona ia tago ua kola le ua o lona ofu sa fai ae titina lona ua.

Ua manatu loia o le a la finauina se faasalaga faanofovaavaaia mo le ua molia pe a oo atu i le aso e lau ai lona faasalaga, peitai ua malamalama le ua molia, tusa lava pe finau loia i le faamasinoga mo se faasalaga faanofovaavaaia mo ia, e pule le faamasinoga pe talia pe teena ia faafinauga, aua o lo o i ai i le faamasinoga le malosiaga e faasala ai o ia i soo se faasalaga e manatu le faamasinoga e talafeagai mo lana solitulafono.

Ua ia malamalama foi, e le mafai ona toe suia lana tali ioe ua tuuina atu i le faamasinoga, pe afai e tuuina mai se faasalaga a le faamasinoga ae le tusa ai ma lona mana’o.

Na faailoa e ni molimau i leoleo e faapea, sa ‘ona le ua molia i le taimi na ia faatinoina ai le solitulafono, e ala i lona titinaina lea o le ua o le alii ave pasi ao paka le pasi i luma o se faleoloa i Tafuna.

Na faailoa e Suia i leoleo, na mafua ona ita i le ave pasi ona e le’i sa’o lana sui sa tuu atu i le isi aso na tietie ai i le pasi lea. E le masani le ua molia i le ave pasi e ui e masani ona tietie i luga o le pasi lea.

O le faaiuga o le masina nei lea ua faatulaga e le faamasinoga e lau ai le faasalaga a le ua molia, ma o lo o tumau pea poloaiga a le faamasinoga o lo o tatala ai o ia i tua.