Ads by Google Ads by Google

Tala otooto o Faamasinoga

AVE MATAUPU SEILA A LE LADY NAOMI E FAAMASINO I SAMOA

 

Ua talia e le Faamasinoga Maualuga a Amerika Samoa se talosaga na faaulu e le Ofisa o le Loia Sili a le malo, ina ia solofua moliaga faasaga i le alii o Feagaiga Si’ilata, ae tuu atu lana mataupu i le Faamasinoga Maualuga a Samoa.

 

O lo o tuuaia Siilata i le faiaiga ma se teineititi e 15 tausaga le matua, sa malaga mai ma lona tina i luga o le vaa o le Lady Naomi i le po o le aso 27 o Tesema 2012.

 

O le vaiaso na tea nei na iloilo ai e le faamasinoga maualuga lea mataupu, i le maea ai lea ona tuuina atu e le loia a le malo o faamaumauga e faamaonia ai le latou talosaga.

 

Sa galue Siilata o se alii Saila i luga o le vaa a le malo o Samoa, le Lady Naomi i le taimi na tula’i mai ai le faalavelave, lea e pei ona tuuaia ai o ia i moliaga o le faiaiga ma se teineititi e laititi i lalo o le tulafono, faia o uiga mataga, tagofia o itutinosa o se tamaitai, atoa ai ma lona faia o ni gaioiga e ono lamatia ai le saogalemu o se fanau.

 

Na taua e le loia a le malo o Mitzie Jessop e faapea, o tuuaiga faasaga ia Siilata na tulai mai i le taimi ao malaga mai le vaa mai Samoa mo Amerika Samoa nei.

 

I faamaumauga a le faamasinoga o lo o taua ai e faapea, o le faalavelave lenei na tulai mai ina ua fiu le tina o le teineititi na aafia e saili lana tama i se taimi o le po, peitai ina ua ia maua, sa ia fesiligia o ia poo fea sa i ai, ma faamatala ai loa e le teineititi i lona tina le mea sa tupu.

 

O ia sa tu i le isi tulimanu o le vaa ua tau lagona lona ma’i vasa, ae ona vaaia loa le ua molia ua agai atu ma fai atu pe na te manaomia se fesoasoani, ma o iina na la agai atu ai loa i totonu o le potu ma faataunuu ai loa le solitulafono.

 

Ao faagasolo suesuega e faatatau i lenei mataupu, na manino ai i ni talanoaga sa faia e le malo ma le Ofisa o le U.S Coast Guard e faapea, o le solitulafono lenei sa tulai mai i ogasami o Samoa, ae le o ogasami o Amerika Samoa.

 

O lo o manino foi i le Vaega o le Tulafono 3:0103 e faapea, o ituaiga mataupu tau solitulafono nei e tatau ona faataunuuina i le faamasinoga o lo o i ai lona malosi e iloilo ai nei ituaiga mataupu.

 

Ona o lea mataupu, na faia ai loa fesootaiga a le Ofisa o le Loia Sili a Amerika Samoa ma le Ofisa o le Loia Sili a Samoa, ma malilia ai loa le Samoa e tuu atu le mataupu a Siilata e faamasino i Samoa.

 

O se tusi saisai sa tuuina mai i le Faamasino Sili a Samoa, le afioga ia Patua Tiavaasu’e Falefatu Sapolu na faapipii faatasi ma le talosaga, lea o lo o taua ai le taofia faapagota o Siilata i le taimi e taunuu atu ai i Samoa.

 

O lo o taua i le tusi saisai e faapea, o le taimi lava e taunuu atu ai Siilata i eleele o Samoa, ia taofia loa i lalo o le vaaiga a leoleo e faatali ai le taimi e tulai ai i luma o le faamasinoga.

 

Talu mai le taimi na taofia ai Siilata i le toese i Tafuna i le aso 28 Tesema, o lo o faaauau pea ona taofia o ia i le toese e faatali ai le taimi lea ua faatulaga e auina atu ai o ia i Samoa.

 

TETE’E ALII TALAVOU E TO’ATOLU I TUUAIGA A LE MALO

 

O alii talavou e toatolu ia o lo o tuuaia i lo latou faia lea o uiga mataga i ni maitai se to’atolu, ua latou teena tuuaiga a le malo faasaga ia te i latou, ina ua latou tutulai i luma o le faamasinoga maualuga i le vaiaso na tea nei.

 

O le teena ai e i latou nei e toatolu o moliaga mamafa o lo o tuuaia ai i latou, ua faatulaga ai loa a latou ulua’i iloiloga e faia i le masina fou, lea o le a iloilo ai loa e alii faamasino le tulaga tonu o le a taoto ai a latou mataupu, i le faia lea o ni maliliega ma le malo, poo le faatulaga loa o ni aso e faia ai a latou faamasinoga iloilo.

 

O i latou e toatolu o lo o tuuaia e aofia ai se auuso latou o lo o tuuaia i lo la faia lea o ni amioga e le tusa ai ma le tulafono i se tamaititi e 6 tausaga le matua, e ala i lo la faia i ai o gaioiga faafeusuaiga, faamatamata i ata leaga toe faaulaula i sikaleti, ae o le isi alii talavou e toatasi o lo o tuuaia i lona faia o ni uiga mataga i ni tamaiti laiti se toalua e 2 ma le 5 tausaga le matutua, e ala i lona faia i ai o uiga faafeusuaiga.

 

O lo o taofia pea i latou nei i le toese i Tafuna ina ua le mafai ona latou totogiina vaega tupe sa faatulaga e tatala ai i latou i tua.