TUUAIA SE ALI’I I LONA FA’AMALOSIA O LE AFAFINE A LONA USOO se alii e 20 tausaga lea o lo o tuuaia i lona faamalosia o le afafine e 13 tausaga le matua a lona lava uso, ma i’u ina ma’itaga ai le teineititi, ua molia nei e le malo i luma o le faamasinogaO moliaga mamafa e fa ua tuuaia ai e le malo lenei alii, e aofi ai le mataifale, faiaiga faamalosi ma se tama’ita’i, faaoolima mataga i se tamaitai, atoa ai ma le tagofia o itutinosa o se tamaitai e le’i faaipoipo i ai.I faamaumauga a le faamasinoga o lo o taua ai e faapea, o le tina o le teineititi na aafia ma failaina se tagi i le ofisa o leoleo.Na pepelo le tamaitai na aafia i leoleo ina ua ulua’i fesiligia o ia i lenei mataupu, ae ina ua faaauau pea suesuega a leoleo, na tagi ai loa o ia ma faamatala i leoleo e faapea, o le masina o Oketopa 2011 na amata mai ai le amio a lona ‘uncle’ o le taumafai e tago i ona itutinosa ma o le va o le masina o Setema 2011 ma Fepuari 2012 na la faiaiga ai ma lona ‘uncle’.Na taua e le tamaitai na aafia i leoleo e faapea, o le masina lava foi lea o Fepuari 2012 na ia iloa ai ua ma’itaga, ae talu mai le taimi lea seia oo mai ia Aokuso 2012 lea na fanau ai lana pepe, la te lei toe momoe ai ma le ua molia.Na musu le ua molia e talanoa i leoleo i le uluai taimi na taofia ai o ia, peitai na i’u lava ina malie e fai sana faamatalaga i leoleo ma sa ia taua ai e faapea, o le masina o Setema 2011 na amata mai ai ona ia taumafai e faailoa ona uiga tu’inanau i le tamaitai na aafia, o le masina lava foi lea na amata ai ona la momoe, ma e faatele taimi na la momoe ai i le va o le masina o Setema 2011 seia oo atu i le masina o Fepuari 2012, ma faamuta ai loa i le masina lava lea ina ua ia maua le tala ua ma’itaga o ia, ona ia taumafai loa lea e faatuatuana’i ia te ia.SILIA $10,000 GAOI E SE TAMAITAI MAI KAMUPANI NA GALUE AIE silia i le $10,000 le aofai o le tupe lea ua tuuaia e le malo le tamaitai o Stephania Sulusulu, sa ia gaoia maia i le GHC Reid a’o faigaluega ai o ia i se taimi o le 2010I faamaumauga a le faamasinoga o lo o taua ai e faapea, o lenei mataupu na alia’e mai ina ua masalomia e se tasi o le aufaigaluega ni faaletonu i galuega ma tiute tauave a le ua molia, ma mafua ai loa ona faia i ai ni suesuega.Na faamaonia i suesuega le fa’aaogaina e le ua molia, ia siaki mai i isi kamupani e totogi ai a latou pili, e pei o le siaki mai i le kamupani a le North West lea na aumai e totogi ai le aitalafu a le Cost-U-Less i le GHC.Ina ua amata ona manino ni isi o tuuaiga faasaga ia Sulusulu, na faia ai loa e se tasi o pule o le kamupani le faaiuga e faamalolo le tumau o ia ae se’i faagasolo su’esu’ega e faatatau i lenei lava mataupu.I le aso lava lea ao le’i faia le faaiuga e faamalolo le ua molia, na fesoasoani ai le ua molia i se tagata faatau na alu atu e totogi faamaea sana paleni e $104, peita’i ina ua faapaleni tupe maua a le kamupani i le faaiuga o le aso, na maua ai o lo o misi le $104, ae ina ua fesiligia le ua molia, sa ia taua ai e faapea, o le $104 sa ia teuina i totonu o lana ‘pusa toso’, ae taoto atu o le a ia toe fesootai i le tagata na aumai ai le tupe, peitai na uma ane lava na te le’i faia lava lea tulaga.E fa aso talu ona faamalolo le tumau lea ua molia mai le galuega ae malaga loa i Apia, e aunoa ma lona faailoaina i le kamupani o lana malaga.O le aso 30 o Novema 2010 na logoina ai e se tasi o le aufaigaluega le tina a le ua molia ma faailoa i ai, e tusa ma le $3,447.27 le tupe o lo o masalomia na gaoi e le ua moliai, peitai ina ua faaauau pea suesuega a le kamupani, na toe manino ai, e $11,842.27 le aofaiga sa’o o le tupe o lo o masalomia na gaoia e le ua molia.I le aso 1 o Tesema 2010 e pei ona taua i faamaumauga a le faamasinoga, na faaaoga ai e le ua molia lana ‘Facebook’ e momoli atu ai sana tusi faatoese i lona pule e tusa ai o le mea ua tupu, ma lana talosaga e faamagalo o ia, ae tuu mai se avanoa na te toe totogia ai le tupe sa ia gaoia.Ina ua toe foi mai le ua molia mai Apia, sa ia sainia se maliliega ma le kamupani mo le toe totogia o le ta’i $500 i masina taitasi, peitai i le va o Aperila 2011 ma Novema 2012, e na o le $1,050 ua maea ona ia totogia.