TOE MOLIA FOI KATERINA SILIGA

O le tamaitai lea o lo o tuuaia i lona faaaoga faasolitulafono o tupe sa totogi atu mo le Inisiua a se ulugali’i o lo o aumau i Savaii i le taimi nei, ua toe molia nei fo’i i lona faaaoga faasolitulafono o tupe sa totogi atu mo pasese a ni tagata se toalua i le kamupani vaalele a le Hawaiian Air.

Na teena e Katerina Siliga le moliaga e tasi ma ua toe tolopo lana mataupu e toe fofogaina i le masina fou.

I faamaumauga a le faamasinoga o lo o taua ai e faapea, e toalua ni tagata sa tuuina ni tupe ia Siliga ma le faamoemoe la te maua ai le pasese pau mo le vaalele (k-fares).

E $650 na totogi atu e Susana Leaga ia Siliga ae $250 na totogi atu e Millie Titialii, i le aofai o le tupe atoa e $900.

E tusa ai ma faamaumauga o lo o taua ai, ua maea ona toe totogi e Siliga le $650 ia Susana ae $50 ia Titialii.

O lo o taofia pea Siliga i le toese i Tafuna e faatali ai le aso lea ua faatulaga e toe fofoga ai lana mataupu.

FITU MALUA

O le alii lea na sei e le Faamasinoga Faaitumalo lona laisene ave taavale i le masina o Aperila, ina ua faamaonia le  ave taavale ‘ona, na toe loka e leoleo i le vaiaso nei ina ua maua o lo o ia aveina se taavale ae o lo o se’i lona laisene.

Na taofi e leoleo le taavale e Fiti Malua ina ua le usita’i i se faailoilo o lo o i luga o le alatele, ma fesiligia ai loa lana laisene, peitai na faailoa e le ua molia i leoleo, o lana laisene o lo o galo i le fale, mulimuli ane faamaonia e leoleo o Malua o lo o se’i lana laisene.

Ua molia nei Fiti Malua i le ave taavale faatamala i luga o le alatele ma le faamoemoe, o se taimi o le vaiaso nei e faila ai le moliaga mamafa o le ave taavale a’o se’i lana laisene faasaga ia te ia.

O le moliaga o le ave taavale a’o se’i le laisene, e mafai ona faasala ai se tasi i le toese mo le umi e le silia i le 5 tausaga, pe faasala foi i se salatupe e le silia i le $5,000, ae faamalosia le tuli o aso e 90 i le toese i Tafuna.

SEFO SIAULAIGA

O le aso 8 o Ianuari 2013 lea ua faatulaga e faataunuu ai le faamasinoga autu a le alii o Sefo Siaulaiga, po o Raponi Siaulaiga, ina ua le mafai ona maua se latou maliliega ma le malo e faamuta ai lana mataupu.

O Siaulaiga, o lo o tuuaia faatasi ma Nemaia Poamo ma Migo Misa i le moliaga o le fasioti tagata i le tulaga lua, ona o le faalavelave lea na maliu ai le alii o Sio Faumui po o Chico i Malaeimi i le masina o Iuni o le tausaga na te’a nei.

Ina ua valaauina le mataupu a i latou nei e toatolu i le vaiaso nei, na faailoa ai e loia i le faamasinoga e faapea, ua maea ona saini e Misa ma Poamo a laua maliliega ma le malo, ma ua faamoemoe o le taeao nei e fofogaina ai lea maliliega, sei vagana ai Siaulaiga lea o le a finau lana mataupu e ala i lana faamasinoga autu.

O lo o tuuaia i faamaumauga a le faamasinoga le fasi e Siaulaiga ma Poamo o le alii o Chico, ae o Misa na faaaogaina le fagupia e ta ai ona foliga ao taatia o ia i lalo.

O lo o taofia uma i latou nei i le toese i Tafuna, ina ua le mafai ona o latou totogiina le tai $100,000 sa faatulaga e tatala ai i latou i tua.

O le afioga i le alii faamasino sili lagolago ia Lyle L. Richmond o lo o taulimaina lenei mataupu, i le lagolagosua a afioga i alii faamasino lagolago o Mamea Sala ma Muasau Tasina.