Ads by Google Ads by Google

Tala otooto o Fa’amasinoga

FALEPUIPUI MO LE 28 MASINA

 

E 28 masina lea ua faasala ai e le faamasinoga maualuga le sa avea ma pule le tumau o le lala o le Ofisa o le Polenisia i Amerika Samoa nei, o se tasi o tuutuuga o lona nofovaavaaia mo le fitu tausaga, ina ua faamaonia moliaga o lona faaaoga faagaoi lea o le $11,380.04 mai le kamupani vaalele sa galue ai.

 

A’o le’i tuuina atu le faasalaga a le faamasinoga o Judy Matautia, sa maua lona avanoa e faatoese ai i le faamasinoga ma lana talosaga mo se isi avanoa mo ia.

 

Na faatoese foi le ua molia i lona toalua, o lona tina ma lana tama e tusa ai o le solitulafono sa ia faia, ua mafua ai ona tauleagaina lo latou igoa tauleleia.

 

E ui sa finau lana loia fautua o Mike White i le faamasinoga ina ia nofovaavaaia le ua molia, ona o lea ua ia tautino lona salamo, ua maea ona ia totogiina le $2,000 i le kamupani vaalele, atoa ai ma le leai o sana solitulafono muamua, peitai na finau le loia a le malo o Mitzie Jessop i le faamasinoga ina ia faasalaga Matautia i le faasalaga pito i maualuga o lo o faatulaga mai e le tulafono, fuafua lea i le aofai o le tupe sa ia ave faagaoi.

 

Na taua foi e Mitzie e faapea, e lei faatasi ona faia e le ua molia le gaioiga e pei ona tausala ai o ia, ae sa ia faia mo le umi e 7 masina, ma sa tatau foi ona ia manatua lona aiga aemaise lana tama i le taimi sa ia faatinoina ai le solitulafono.

 

Sa ia taua foi e faapea, e ui o lea ua faatoese le ua molia i lona aiga, peitai e le i faatoese i le malo o Amerika Samoa, aua o le isi lea paaga a le kamupani vaalele o le a fesoasoani i le toe totogiina o le tupe sa ia ave faagaoi.

 

Fai mai Mitzie, e ono sii i luga e le kamupani vaalele pasese ina ia tau faapaleni ai la latou tupe ua leiloa, e mafua mai i le gaioiga a le ua molia.

 

E 7 tausaga na manatu le faamasinoga e faasala ai le ua molia, peitai ua faamalumalu lona tuliina o lea faasalaga, ae ua nofovaavaaia o ia mo le 7 tausaga i lalo o tuutuuga e ao ona usitai i ai.

 

O ni isi o ia tuutuuga e aofia ai lona tuliina o le 28 masina i le toese, totogi le salatupe e $1,000, faatasi ai ma le totogiina o le tupe e $9,380.04 agai i le kamupani mai le tupe sa ia ave faagaoi.

 

MOLIA MANUA I LE UMIA FAASOLITULAFONO O SE FANA

 

O le osofaiga a leoleo i se fale i Malaeloa i le faaiuga o le masina o Ianuari o le tausaga nei, ua mafua ai ona faila e le malo le moliaga o le umia faasolitulafono lea o se fana faasaga i le alii o Manua Lefatia, ona o lo o masalomia o ia e ana le ituaiga fana o le .38 lea o lo o tuuaia sa maua i lona fale.

 

Na teena e Lefatia le moliaga faasaga ia te ia ina ua tulai i luma o le faamasinoga faaitumalo i le vaiaso nei.  I lona teena ai o le tuuaiga a le malo, ua toe faatulaga ai loa le isi aso e toe fofogaina ai lan mataupu.

 

O se poloaiga a le faamasinoga na tuuina atu i leoleo suesue o le Vaega a le ‘Vice and Narcotics’ i le Ofisa o Leoleo na mafua ai ona osofaia le fale o Lefatia i le aso 30 Ianuari ma maua i ai e leoleo se fana, atoa ai ma tamai taga pepa iila ma se paipa, o mea ia e faaaoga e tagata e ula ai le pauta oona o le aisa.

 

I faamaumauga a le faamasinoga o lo o taua ai e faapea, e taunuu le osofaiga a leoleo a’o moe le ua molia, ao taatia le fana i ona tafatafa.

 

MOLIA SE AU USO I LE FAAOOLIMA I LE TULAGA LUA

 

O le vaiaso nei lea na faila ai e le malo moliaga faaopoopo faasaga i se auuso talavou, ona o le faalavelave lea na manu’a ai se alii i Fagatogo i le aso 25 Fepuari 2013.

 

O le alii o McClusky Fa’agata Jr poo Lasi fo’i e pei ona iloa ai e le to’atele ma lona uso o Joe Fa’agata, ua molia nei e le malo i le moliaga mamafa o le faaoolima i le tulaga lua, atoa ai ma le moliaga mama o le faatupu vevesi i nofoaga faitele.

 

I faamaumauga a le faamasinoga o lo o taua ai e faapea, o se vevesi na tulai mai i Fagatogo i le vaiaso na te’a nei, na mafua ai ona aga’i atu leoleo e faatoa filemu le mataupu, ma taumafai ai loa leoleo e tuli i laua ua molia i lenei faalavelave, ae faasaga atu ai Joe ma pu’e i lalo le isi leoleo e pei ona taua i faamaumauga a le faamasinoga.

 

Na taua e le alii na aafia i leoleo e faapea, o ia ma ana uo sa latou aai i le falevaa i Fagatogo, ae faafuase’i loa ona aga’i atu le alii o Lasi ma lu’i latou. Na toe fo’i Lasi ma toe o atu ai loa ma lona uso o Joe ma tauai atu fagupia ia te i latou atoa ai ma le tatu’iiina o i latou.

 

O alii e toalua na aafia sa la faamatala i leoleo le mea atoa sa tupu, ma o manua na aafia ai le lisi o i laua na manua e aofia ai se manua i lona vae atoa ai ma se manua i ona foliga.

 

E ta’i $5,000 lea ua faatulaga e le faamasinoga e tatala ai i tua Lasi ma Joe e faatali ai taualumaga o le la mataupu i luma o le faamasinoga.