Ads by Google Ads by Google

Tala otooto o Fa’amasinoga

MATAIMOANA ELISARA

 

O le ali’i e 53 tausaga le matua lea na tuuaia e le malo i lona totoina o ni laau mariuana i lana fa’atoaga, ua ia ta’utino i le fa’amasinoga e faamaonia tuuaiga faasaga ia te ia.

 

I le tali ioe ai o Mataimoana Elisara i le moliaga o lona umia faasolitulafono o vaega o le laau faasaina o le mariuana na toe teuteu e le malo, sa ia tautino ai e faapea, i le va o le aso 23 - 25 Fepuari 2014 i Amerika Samoa, sa ia umia faasolitulafono ai vaega o le laau faasaina o le mariuana.

 

Na ta’utino Elisara e faapea, e 8 laau mariuana sa ia toto i totonu o lana faatoaga, lea e aofia ai ma laau mariuana e 5 sa ia tuuina i totonu o se apa i totonu lava o lana faatoaga. Sa ia tautino e faapea, o le gaioiga sa ia faia i lea aso, sa le tusa lea ma ala o le tulafono.

 

O tuuaiga faasaga ia Elisara na alia’e mai ina ua alu atu le tagata e ana le fanua lea o lo o galue ai le ua molia e oto mai ni lau luau e fai ai lana umu, ae tau atu ai i laau mariuana o lo o ola lauusiusi i totonu o le fa’atoaga, ma ia fa’afeso’ota’iina ai loa le Ofisa o Leoleo e tusa ai o lea mataupu.

 

O le aso 30 Me, 2014 lea ua faatulaga e fofogaina ai le faasalaga a le fa’amasinoga faasaga ia Elisara, ina ua talia e le faamasinoga le maliliega na sainia e le ua molia ma le malo, ma o lo o taofia pea le ua molia i le toese i Tafuna.

 

ROSE AUVA’A

 

O le masina o Iuni lea ua fa’atulaga e le fa’amasinoga maualuga e toe valaau ai le mataupu a le ali’i faiaoga musika mai le aoga maualuga a Fagaitua, ina ua ia tula’i ma teena tu’uaiga a le malo fa’asaga ia te ia i le taeao ananafi.

 

O le loia fautua ia Fiti Sunia o lo o tula’i mo Rose Auva’a na fa’aleoina le tali tete’e a le ua molia.

 

O Auva’a o lo o tuuaia e le malo i moliaga mamafa e lua o lona faiaiga lea i se teineititi e laititi i lalo o le tulafono, atoa ai ma lona faia i ai o amioga mataga faafeusuaiga.

 

O ia tuuaiga na alia’e mai i le fa’alavelave lea o lo o tuuaia ai o ia, i lona faiaiga lea i se teineititi o lana vasega e 15 tausaga le matua, i le va o le aso 12 Fepuari e oo atu i le aso 1 Aperila, 2014.

 

Ua tatala nei i tua le ua molia e fa’atalitali ai taualumaga o lana mataupu, i le mae’a ai lea ona ia totogi o le tupe e $25,000 na fa’atulaga e le fa’amasinoga e tatala ai o ia i lalo o poloaiga e ao ona ia usita’i i ai.

 

O ni isi o ia poloaiga e aofia ai le faasa lea ona ia toe taumafai e faafesootai le teineititi na a’afia i lenei mataupu po o ni isi o lona aiga, a ia avea o ia o se tagatanuu e tausisi i tulafono a le malo i taimi uma.

 

KERRY NAOLAVOA

 

O le aso Faraile o le vaiaso nei lea ua fa’atulaga e fofogaina ai i luma o le fa’amasinoga maualuga le fa’asalaga o le ali’i o Kerry Naolavoa, ina ua talia e le faamasinoga le talosaga a lana loia ina ia toe tolopo le aso e lau ai le faasalaga, ae se’i saili mai ni isi o faamatalaga e fesootai ma le mataupu o lo o tuuaia ai le ua molia.

 

O Naolavoa o lo o tuuaia i moliaga o le talepe fale ma le gaoi, peitai na taua e lana loia ia Michael White e faapea, o ni isi o faamatalaga ua maua faasaga i lenei mataupu, e le i alu le ua molia ma ni mea o lo o tuuaia na gaoia, ae na taatitia uma lava i le nofoaga na faatino ai le solitulafono.

 

O lo o taofia pea le ua molia i le toese e faatali ai le aso Faraile nei lea ua faatulaga e tula’i ai i luma o le faamasinoga mo le lauina o lana faasalaga.

 

JAMES FIATAU

 

O le alii talavou lea na ta’usala i le moliaga o le faaoolima i le tulaga tolu, ona o le faalavelave lea na ia faaoolima ai i se alii sa la inupia fa’atasi i le masina o Fepuari 2014, ua nofovaavaaia mo le 12 masina i lalo o poloaiga a le faamasinoga, e aofia ai le faasa ona ia toe tagofia le ava malosi i totonu o e 12 masina, atoa ai ma le alu e fa’atoese i leoleo sa ia lafo i ai upu le mafaufau i le taimi na taumafai ai leoleo e taofia faapagota o ia.

 

Na faatoese James Fiatau i le faamasinoga e tusa ai o lana solitulafono sa faia, ma ia talosagaina ai se isi avanoa mo ia.

 

I faamaumauga a le faamasinoga na taua ai e faapea, o le vevesi na tula’i mai ina ua onana Fiatau ma lana uo i se la inugapia sa faia, ma tu’i ai e le ua molia lana uo ma manu’a ai ona foliga, ae ina ua taunuu leoleo ma taumafai e faafilemu le mataupu, na vaaia le faia e le ua molia o ni gaioiga e tete’e atu ai i galuega a leoleo sa faia.

 

E $150 le salatupe ua poloaina e le faamasinoga le ua molia na te totogiina, atoa ai ma lona auai i ni aoaoga e fesoasoani ai i le tulaga o le ita faapea ai le ava malosi.