Tala otooto o Fa’amasinoga

FERETI TALOSAGA

 

E lua moliaga mamafa ua tuuaia ai e le malo se ali’i e 25 tausaga le matua, e mafua mai i le fa’alavelave lea o lo o tuuaia ai o ia na la faiaiga ma se teineititi e 15 tausaga le malo.

 

O moliaga faasaga i le susuga ia Fereti Talosaga e aofia ai lona tagofia o itutinosa o se teineititi laititi i le tulaga muamua, faapea ai ma lona faia i ai o uiga mataga faafeusuaiga.

 

O le mataupu lenei na tofu atu i le Ofisa o Leoleo i Tafuna i le aso 29 Novema 2013, ina ua logo e le aunty o le teineititi na aafia leoleo mo se fesoasoani, ina ua fiu e faatali lona niece sa alu i le aoga ua le toe fo’i atu i le fale i le aso lea, ma sa masalosalo le aunty, ai o tafao lona niece i se fale o sana uo.

 

O le po o le aso 29 lava lea o Novema 2013 na vili atu ai le to’alua o le ali’i o Talosaga i le Ofisa o Leoleo, ma fa’ailoa atu i leoleo o le teineititi o lo o tau su’e e lona aiga o lo o tafafao ma lona to’alua (le ua molia) i lo latou aiga i Mapusaga fou.

 

Na fesiligia e leoleo le alii ua molia e tusa ai o lenei mataupu, peitai sa ia teena lona faia o ni uiga mataga faafeusuaiga i le teineititi, se i vagana ai le taimi na la talanoa ai i le isi vaiaso.

 

O le aso 2 Tesema 2013 na maua ai e leoleo le teineititi na aafia i Alofau, ao tafao ai i le fale o se tasi o lona aiga, ma auina atu ai loa i le ofisa o leoleo mo suesuega, ma ia faamaonia ai e faapea, o le aso 22 Novema 2013 ina ua tuua le aoga, sa alu ai i le fale o lana uo tama i Mapusaga fou ma la tafafao ai.

 

Na faaigoa e le teineititi na aafia le ua molia o lana uo tama, e ui o le ali’i lea ua fai lona to’alua.

 

Na taua e le teineititi i leoleo e faapea, o le va o le aso 22 Novema e oo atu i le aso 2 Tesema 2013 na nofo ai i le fale o le ua molia i Mapusaga fou, ma e faatolu ona la faiaiga ai. Sa ia taua foi i leoleo e faapea, sa ia faailoaina i le ua molia o ia e 15 ona tausaga ae sa manao lava le ua molia la te uo ona ua alofa ia te ia.

 

E $25,000 le tupe lea ua faatulaga e le faamasinoga e totogi ona faatoa mafai lea ona tatala le alii o Talosaga i tua mai le toese i Tafuna, e faatali ai taualumaga o lana mataupu lea ua faagasolo i le taimi nei.

 

NOFOVAAVAAIA LE ALII TALEPE FALE

 

O le ali’i talavou lea na ta’usala e le fa’amasinoga maualuga i le moliaga o le talepe fale i le tulaga lua, ua nofovaavaaia o ia mo le 5 tausaga i lalo o poloaiga ua tuu atu e le faamasinoga e ao ona ia usita’i i ai.

 

O le alii o Fareti Tino na uluai tuuaia e le malo i moliaga mamafa e lua o le talepe fale i le tulaga muamua atoa ai ma le gaoi, ae i lalo o se maliliega sa latou sainia ma le malo ma talia e le faamasinoga, na ia tali ioe ai i le moliaga o le talepe fale i le tulaga lua lea na toe teuteu e le malo, ae solofua e le faamasinoga le moliaga mamafa o le gaoi.

 

Na faatoese Tino i le faamasinoga e tusa ai o lana solitulafono sa fai, ma ia talosagaina ai se isi avanoa mo ia sei toe foi atu ai i lona aiga e tausi ona matua ma saili sana galuega e fesoasoani ai i lona aiga.

 

Sa ia taua e faapea, o masina e 8 lea na taofia ai o ia i le toese i Tafuna, ua ia lagona ai le leaga o le talepe fale atoa ai ma le le usitai i matua.

 

Na malilie loia e talosaga i le faamasinoga, ua lava masina e 8 lea ua maea ona tuli e Tino i le toese e fai ma ana faasalaga, ma ia tuuina atu ia te ia ni poloaiga e usita’i ai i le umi e nofovaavaaia ai.

 

O isi poloaiga o le nofovaavaaia a Tino e aofia ai lona totogiina o le salatupe e $1,000 i le faamasinoga, ma le $120 o le tau o mea sa ia gaoia mai le fale o le aiga na aafia, e aofia ai DVD, pea seevae ma lavalava.

Comment Here