PENIAMINA OPETAIA

Ua talia e le fa’amasinoga maualuga le talosaga na fa’aulu e le malo, ina ia solofua moliaga sa latou tuuaia ai le alii o Peniamina Opetaia, ina ua le mafai ona latou sailiina le molimau autu sa faamoemoe e molimau mo lenei mataupu.

Na taua e le loia a le malo ia Tiffany Oldfield i luma o le faamasinoga maualuga ananafi e faapea, sa taumafai le malo e saili le tama’ita’i na a’afia i lenei mataupu ae le i manuia taumafaiga.

Na taua e le loia a Opetaia ia Michael White e faapea, o le tama’ita’i na a’afia ua toe fo’i atu i lona aiga i Samoa, ua le toe fo’i mai o ia i le teritori nei.

O Opetaia na tuuaia e le malo i moliaga eseese e aofia ai le faiaiga ma se teineititi e laititi i lalo o le tulafono, tagofia o itutinosa o se teineititi e laititi i lalo o le tulafono, faapea ai ma le faia i ai o amioga mataga faafeusuaiga.

Na tuuaia faatasi Opetaia ma le uncle o le teineititi e 16 tausaga na a’afia, i lo la faia o uiga mataga nei i le teineititi na a’afia.

Na taua e le teineititi na a’afia i leoleo e fa’apea, na avea lona ita i loa uncle i lona faia o uiga mataga ia te ia ma itu na sola ese ai ma le latou aiga, ina ua masalosalo lona uncle ia te ia ma Opetaia.

AIPOLO MAO

Ua poloaina e le fa’amasinoga maualuga le tuuina atu o se poloaiga e sailia mai ai le ali’i o Aipolo Mao, ina ua le mafai ona auai atu o ia i le iloiloina o lana mataupu.

O le iloiloga a Mao na valaauina i le aso Lua na te’a nei, o le tulaga i le totogiina o le tupe lea na poloa’i o ia e le fa’amasinoga e totogi, ina ua ta’usala o ia ma isi tagata i le ave faagaoiina o kalone suau’u a le kamupani suau’u a le BP Oil, ma leiloa ai le silia i le 100,000 kalone suau’u a le kamupani.

Ina ua faailoa e le loia ia Joel Shiver i luma o le fa’amasinoga e le o auai Mao i totonu o le potu fa’amasino, na poloaina ai loa e le ali’i fa’amasino ia Lyle L. Richmond le tuuina atu o se poloaiga a le fa’amasinoga e saili mai ai Mao.

PAULA TUITAVUKI

O le ali’i lea na tu’uaia e le malo i lona faia o ni uiga mataga i se teineititi e 16 tausaga le matua, ua ia ta’utino i luma o le fa’amasinoga maualuga i le vaiaso nei, e fa’amaonia tuuaiga fa’asaga ia te ia.

I le tali ioe ai o le ali’i o Paula Tuitavuki i moliaga mamafa e lua o le tagofia o itutinosa o se teineititi e laititi i lalo o le tulafono, atoa ai ma lona faia o uiga mataga fa’afeusuaiga fa’asaga i lea teineititi, sa ia ta’utino ai e fa’apea, i se taimi o le aso 10 Fepuari 2014, sa ia tagofia ai itutinosa o se teineititi e laititi i lalo o le tulafono i ni auala e le fa’atagaina e le tulafono.

I le talia ai e le fa’amasinoga o le maliliega na sainia e Tuitavuki ma le malo, na malie ai loa le fa’amasinoga o le a solofua isi moliaga e tolu o lo o totoe ai i le pepa o tagi.

O lo o taofia pea le ua molia i le toese e fa’atali ai le aso e lau ai lona fa’asalaga.