Ads by Google Ads by Google

Tala otooto o Fa’amasinoga

TAMALOA FA’AOO LIMA I LONA TO’ALUA

 

O le ali’i lea na tuuaia i lona fa’ao’olima i lona to’alua, ua ia ta’utino e fa’amaonia tu’uaiga fa’asaga ia te ia.

 

O lea ali’i na ulua’i tu’uaia e le malo i le moliaga o le fa’ao’olima i le tulaga  lua ma le fa’atupu vevesi i nofoaga faitele, ae i lalo o se maliliega sa latou sainia ma le malo ma ua talia fo’i e le fa’amasinoga, ua ia tali ioe ai i le moliaga muamua lea ua toe suia e le malo le mamafa, ina ia fa’ailoa ai le moliaga mama o le fa’ao’olima i le tulaga tolu.

 

I le tali ioe ai o le ua molia i le moliaga e pei ona toe teuteu e le malo, sa ia tautino ai e fa’apea, i se taimi o le aso 7 Fepuari 2014 i Pava’ia’i, sa ia fa’aooolima ai i lona to’alua.

 

Na tautino le ua molia, o lona ita na mafua ai ona ia faia lea gaioiga, peita’i ua ia lagona e le sa’o le gaioiga sa ia faia.

 

Na talia e afioga i le ali’i fa’amasino ia Lyle L. Richmond le talosaga a le tama’ita’i loia ia Karen Shelly na tula’i mo le ua molia, ina ia tatala o ia i tua e aunoa ma se tupe e totogi, e fa’atali ai le aso e lau ai lana fa’asalaga, ona o lea ua fa’ailoa e lona to’alua, ua mae’a ona toe fa’aleleia mea uma i le aiga.

 

Ua tatala nei i tua le ua molia e fa’atali ai le aso 15 Me e lau ai lana fa’asalaga.

 

FINAI NIMAROTA

 

O le alii pagota lea na poloaina e le fa’amasinoga maualuga i le 2012 na te tuua le teritori  pe mae’a ona ia tuliina le fa’asalaga e 20 masina i le toese i Tafuna, ua ia talosaga i le fa’amasinoga i le taeao ananafi ina ia toe fai se suiga i lana poloaiga lea, ina ia mafai ai ona nofo i le teritori e mafuta ma lona aiga o lo o i ai.

 

O le taeao nei e atoa i ai le 20 masina lea na poloa’i e le fa’amasinoga maualuga ia Finai Nimarota na te tuliina i le toese, ina ua ta’usala o ia i le moliaga mamafa o le fa’ao’olima i le tulaga lua.

 

Na taua e le alii loia ia Michael White sa tula’i mo Nimarota i luma o le faamasinoga e faapea, ao le i tulai mai le solitulafono lea o lo o faasala ai le ua molia, e 16 tausaga talu ona aumau o ia i le teritori e aunoa ma le aafia i se solitulafono.

 

“O lana fanau e toatolu o lo o i ai na fananau uma i Amerika Samoa, o le mafuaaga lena o lo o talosaga mai ai o ia i le fa’amasinoga, mo se avanoa e faaauau ai ona latou mafuta ma si ana fanau faapea ai lona aiga atoa i le teritori nei,” o se vaega lea o le talosaga a White i le faamasinoga.

 

Ina ua fesiligia e le alii faamasino sili ia Michael Kruse se manatu o le loia a le malo ia Tiffany Oldfield e tusa ai o le talosaga a le itu tete’e, na taua ai e Oldfield le lagolagoina e le malo o le faaiuga ua mae’a ona tuuina atu e le malo i le aso na lau ai le fa’asalaga a Nimarota, ina ia tuua e le ua molia le teritori pe a magalo mai le toese.

 

Talu ai e le o atoa le aofa’i o fa’amasino e mafai ona latou iloilo le talosaga a le ua molia, na poloaina ai e le alii faamasino sili le taofi o le faataunuuina o le poloaiga a le faamasinoga sa tuuina atu mo Nimarota na te tuua ai le teritori pe a magalo, ae o le a taoto atu lana talosaga e iloilo e le fa’amasinoga, pe afai ae atoa le aofa’i o fa’amasino e mafai ai ona latou iloiloina se fa’aiuga o lana talosaga.

 

O ali’i fa’amasino lagolago ia Logoai Siaki ma Fa’amausili Pomele, o lo o gasegase i laua.