Ads by Google Ads by Google

Tala otooto o Fa’amasinoga

SALATUPE SE FAFINE NA SASAINA SONA TEI I SE PAIPA

 

E $500 le salatupe lea ua faasala ai e le Faamasinoga Maualuga le fafine o Feo Utu, ina ua ta’usala o ia i le solitulafono o le faaoolima i le tulaga tolu ma le faatupu vevesi i nofoaga faitele, o ni solitulafono mama uma.

 

E tasi le tausaga na manatu le faamasinoga e faasala ai Utu i le toese, peitai ua faamalumalu lona tuliina o lea faasalaga, ae ua nofovaavaaia o ia mo le lua tausaga i lalo o poloaiga e ao ona ia usita’i i ai.

 

O ni isi o ia poloaiga e aofia ai lona auai i ni aoaoga e fesoasoani ai i le tulaga o le ita, ma ia aua nei ona toe faafesoota’iina lona niece na aafia i lenei mataupu i soo se auala.

 

Ua poloaina foi e le faamasinoga le ua molia ina ia avea o ia ma tagatanuu lelei, aua nei ona toe soliina se tulafono.

 

O tuuaiga faasaga ia Utu na afua mai ina ua vili e le tamaitai na aafia le Ofisa o leoleo mo se fesoasoani, ina ua faatoa maea ona fasi o ia i se fasi paipa i le aso 16 o Novema 2011 i lo latou aiga i Aua.

 

Ina ua fesiligia e leoleo le ua molia e uiga i lenei faalavelave, sa ia ioeina ai lona faaaogaina o se fasi paipa e sasa ai lona niece, ona o le sola ese soo mai le latou aiga.

 

TETE’E OGE VAISAGOTE I TU’UAIGA FA’ASAGA IA TE IA

 

Ua teena e le alii o Oge Vaisagote tu’uaiga a le malo faasaga ia te ia, ona o le faalavelave lea na tulai mai i le tausaga na te’a nei i Lauli’i, lea na la fai’aiga ai ma se teineititi e laititi i lalo o le tulafono.

 

O lona teena ai o moliaga faasaga ia te ia, ua faatulaga ai loa lana ulua’i iloiloga e faia lea i le masina o Aperila, lea ua faamoemoe e tatau ona oo atu ai i le aso lea, ua mautu se tulaga e oo i ai lana mataupu, i le faia lea o se maliliega ma le malo poo le tuuina atu foi o lana mataupu e faataunuu sona faamasinoga autu.

 

Na faailoa e le tamaitai e 15 tausaga na aafia i lenei mataupu e faapea, na ave e Vaisagote o ia i lona fale i Lauli’i ma la fai’aiga ai i le masina o Tesema 2012. Ina ua fesiligia e leoleo le ua molia, sa ia ioeina ai le faamatalaga a le tamaitai na aafia, ae ina ua fesiligia o ia pe sa ia iloa e na o le 15 tausaga o le tamaitai na la momoe, na tali Vaisagote ‘e leai.’

 

O lo o taofia pea Vaisagote i le toese i Tafuna ina ua le mafai ona ia totogia le $20,000 lea ua faatulaga e le faamasinoga e tatala ai o ia i tua.

 

FA’AMAONIA MOLIAGA FAASAGA IA IOANE PASSI MA LENEUOTI TUAUA

 

O le masina nei lea ua faatulaga e fofogaina ai le faasalaga a le faamasinoga maualuga faasaga ia Ioane Passi ma Leneuoti Tuaua, ina ua la ioeina moliaga na toe teuteu e le malo faasaga ia te i laua, i lalo o se maliliega na latou sainia ma le malo ma talia e le faamasinoga.

 

O Passi ma Tuaua na ulua’i tuuaia e le malo i moliaga taitasi o le i ai lea ia te i laua o se ta’ifau taufeai, o se solitulafono D i solitulafono mamafa, ae i le maliliega na latou sainia ma le malo, na toe teuteu ai e le malo le mamafa o lenei solitulafono aga’i i le solitulafno mama, lea e na o le tausaga e mafai ona faasala ai se tasi i le toese, poo le faasala i le salatupe e $1,000.

 

O le moliaga faasaga ia Passi na afua mai i le faalavelave lea na tulai mai i le aso 6 Setema 2012 i Vatia, ina ua osofa’i e ni taifau se tamaititi e 10 tausaga ao la savavali ma lona aunty i luga o le alatele.

 

Na taua e le aunty o le tamaititi na aafia i leoleo e faapea, ao latou savavali agai i le fale ma lana fanau ma lona nephew na aafia, na faafuase’i ona latou vaaia ni ta’ifau se fa ua tamomo’e aga’i atu ia te i latou ma taumafai e osofa’i i latou.

 

E lei mafai e ia ma lana fanau ona taofi ta’ifau, ma maua ai loa le avanoa o taifau e lua e osofa’i le vae o lona nephew, ma ia tago ai loa i ma’a ma tauai ese ai ta’ifau. Sa ia taua foi i leoleo e faapea, ao osofa’i e ta’ifau lona nephew, sa na o le tutu mai o Passi ma lana fanau i fafo o le latou fale e aunoa ma se isi na alu atu e fesoasoani.

 

O le aso 22 Setema 2012 na agai atu ai leoleo ma sui o le Ofisa o Faatoaga ma faatamaia lea ta’ifau.

 

O le mataupu faasaga ia Tuaua na afua mai i le faalavelave lea na osofa’i ai se ta’ifau se tamaita’i i Fagaalu i le masina o Novema 2012. O se tamaitai na savali mai i Fagaalu e agai i lana galuega i le falema’i o le LBJ, ae osofa’i ai e se taifau o ia.

 

Na taua e le tamaitai i leoleo e faapea, ina ua maea ona osofa’i o ia e le ta’ifau, sa ia vaaia ai se tamaloa ua savali mai ma tutuli ese ta’ifau, mulimuli ane aga’i se fafine ia te ia, e foliga mai o ia lea e ana ta’ifau ma fesili atu i le mea ua tupu, e aunoa ma le ofoina atu o se fesoasoani mo ia.