Ads by Google Ads by Google

Tala otooto o Fa’amasinoga

IONA TOO

 

O le ali’i ave taxi lea o lo o tu’uaia i lona fesoasoani lea i se isi ali’i i le susunuina o le Fale Teuoloa a le kamupani i’a o le StarKist Samoa i Tafuna i le tausaga na te’a nei, ua amata aloaia nei lana fa’amasinoga iloilo i luma o tagatanuu o Amerika Samoa.

 

O le ali’i o Iona Too o lo o tuuaia e le malo, o ia lea sa ia pikiina mai le ali’i sa ia susunuina le Fale Teuoloa a le kamupani, le ali’i o Tilotilo Opelu i le po tonu na tula’i mai ai le fa’alavelave.

 

O Opelu o lo o tuli sona fa’asalaga fa’afalepuipui i le toese i taimi nei, ina ua ta’usala o ia i le moliaga o le susunu fale.

 

O lo o teena malosi e Too tuuaiga a le malo, ona sa ia taua i leoleo e fa’apea, o ia na alu atu e piki mai le pasese sa vili atu mo se taxi, ae na te le o iloaina se tulaga e faatatau i le susunuina e Opelu o le Fale Teuoloa a le kamupani.

 

O le aso Gafua na te’a nei na amata saili ai ni sui o le vaega iloilo iuga ma o le taeao ananafi na amata aloaia ai le iloiloina o lenei mataupu, e ala i le tuuina atu e le malo o a latou mau fa’amaonia e lagolago ai tu’uaiga fa’asaga ia Too.

 

ALESANA PEKO

 

E 6 masina lea ua poloaina e le fa’amasinoga maualuga le ali’i o Alesana Peko, e taofia mo’i ai o ia i le toese i Tafuna, ina ua ta’usala o ia i le moliaga mamafa o le sola ese a’o tatala o ia i tua e alu e faigaluega.

 

E 5 tausaga le umi na manatu ali’i fa’amasino ia Lyle L. Richmond ma Mamea Sala Jr e tatau ona taofia sa’o ai Peko i le toese, ae ona o itu lelei sa fa’ailoa e loia atoa ai ma talosaga sa tuuina atu e lona aiga, na manatu ai loa le fa’amasinoga ua lava le 6 masina e taofia ai o ia i le toese.

 

Na fa’atoese Peko i le faamasinoga e tusa ai o lana solitulafono sa faia, ma ia talosagaina ai se isi avanoa mo ia, e oo fo’i i lona afafine, sa ia talosagaina ali’i fa’amasino ina ia tatala lona tama i tua mai le toese, ina ia mafai ai ona auai i le aso o lona fa’au’uga, ia 12 Iuni 2014.

 

Na taua e le afafine a le ua molia ma se tasi o lona aiga na molimau i le fa’amasinoga, o Peko o se tagata e fa’amoemoeina i totonu o le aiga, o se tama fo’i e galue malosi mo le manuia o lana fanau.

 

Saunoa Richmond e fa’apea, e ui i itu lelei ua maea ona faailoa mo le ua molia, ae le o galo ai i le faamasinoga faamaumauga mai le ofisa o fa’amasinoga faaitumalo, i le fa’atele lea ona molia Peko i le solitulafono o le ave ta’avale ‘ona.

 

O le isi poloaiga o le nofovaavaaia a Peko e aofia ai lona totogiina o le salatupe e $1,000 i totonu o le 12 masina, o le a mafai fo’i e le fa’amasinoga ona iloilo se talosaga e faaulu atu e lana loia, ina ia mafai ona auai o ia i le fa’auuga a lona afafine, e pei ona taua e le teineititi i lana talosaga.

 

O Peko na tuli sona fa’asalaga fa’afalepuipui e 90 i le toese i Tafuna, ina ua ta’usala o ia e le fa’amasinoga fa’aitumalo i le moliaga o le ave ta’avale a’o se’i lona laisene, peitai sa maua le avanoa e tatala ai o ia i tua e faigaluega a’o taofia ai o ia i le toese.

 

I le masina o Tesema 2013 ina ua toe fo’i atu Peko i totonu o le toese ua manava mai lana galuega, sa maua ai e se leoleo o le falepuipui se afa sikaleti mariuana i totonu o le taga o lona ofu sa fai.

 

Ae ina ua fesiligia o ia sa ia taua ai e faapea, o se sikaleti mariuana sa maua mai i sana uo ina ua alu i le latou fale i Pago Pago e piki mai mea sa ia mana’omia, ma molia ai loa o ia e le malo i moliaga mamafa e lua, o le sola ese ao tatala o ia i tua e faigaluega lea ua ta’usala ai o ia, ma le moliaga o lona umia faasolitulafono vaega o le laaau faasaina o le mariuana lea na solofua e le fa’amasinoga.