Tala otooto o Fa’amasinoga

MISI FAIAGA

 

O le ali’i lea na tuuaia i lona taumafai e faia ni uiga mataga i se teineititi aoga e ala i lona ave o ia i toton o se tama’i fale ma taumafai e fa’amalosi ai o ia, ua ia ta’utino i le fa’amasinoga maualuga e fa’amaonia tu’uaiga faasaga ia te ia.

 

Na ulua’i tuuaia e le malo le ali’i o Misi Faiaga i moliaga mamafa e lua o lona tagofia o itutinosa o se tama’ita’i e le i fa’aipoipo i ai, ma le moliaga o lona taofia faapagota o se tagata, faapea ai fo’i ma le moliaga mama o lona faia o ni gaioiga e ono lamatia ai le saogalemu o fanau laiti, ae i lalo o se maliliega sa ia sainia ma le malo ma talia e le fa’amasinoga, ua ia tali ioe ai i moliaga o le tagofia o itutinosa o se tama’ita’i, ae solofua e le faamasinoga isi moliaga e lua o lo o totoe ai i le pepa o tagi sa fa’aulu e le malo.

 

I le tali ioe ai o Faiaga i le solitulafono e pei ona ta’usala ai o ia, sa ia ta’utino ai e fa’apea, i se taimi o le masina o Tesema 2013 i Amerika Samoa, sa ia tagofia ai itutinosa o se teineititi aoga ao savali atu i luga o le auala ua tuua lana aoga.

 

Na tautino le ua molia e faapea, o lana gaioiga sa faia i lea aso sa le tusa ai ma ala o le tulafono, sa ia faia fo’i i se auala e le i mana’o i ai le teinitiiti.

 

O le faalavelave na tulai mai ina ua tuua atu le aoga a le teineititi na aafia, ae faafuase’i ona valaau ane le ua molia mai se fanua o lo o galue ai i tafatafa o le auala. Na taua e le teineititi na aafia i leoleo e faapea, ao talanoa atu le ua molia ia te ia, sa le ano i ai ae sa faaauau pea ona savali, ae na te’i ina ua oso faafuasei atu le ua molia ma toso o ia aga’i i se fale taele e tu latalata ane i le fanua sa galue ai, ma ia taumafai ai loa e kisi atu ia te ia, atoa ai ma lona tago tago atu i ona itutinosa.

 

O lo o taofia pea Faiaga i le toese i Tafuna e fa’atali ai le lauina o lona faasalaga i le masina fou.

 

LOKENI APELU

 

O le ali’i lea na ta’usala e le fa’amasinoga i le moliaga mama o le faaoolima i le tulaga tolu, ua poloaina e le faamasinoga maualuga na te totogiina le salatupe e $1000 i le faamasinoga, ma ia totogi ma le pili o le falema’i mo le alii na aafia i le taimi na taofia ai o ia ona o manu’a sa aafia ai.

 

O Lokeni Apelu na ta’usala i le moliaga mama o le faaoolima i le tulaga tolu sa toe suia e le malo, i lalo o se maliliega sa latou sainia ma le malo ma talia e le faamasinoga.

 

O tuuaiga faasaga ia Apelu na afua mai ina ua ia faaoolima i se alii i le taimi o taaloga Volipolo a le latou nuu i le masina o Oketopa 2013, e ala i lona tu’iina o le gutu o le ali’i na aafia, ma pau ai i lalo lea alii ma tau lona ulu i se poloka sima sa taatia i autafa o le malae Voli ma ta’e ai lona ulu.

 

Na talia e le faamasinoga le talosaga a Apelu mo se avanoa e faaauau ai pea ona tatala o ia i tua e faigaluega ma tausi lona aiga, ae aua nei toe tuuina atu o ia i le toese.

 

E 6 masina na manatu le faamasinoga e faasala ai Apelu, peitai ua faamalumalu lona tuliina o le 6 masina, ae ua lava aso e 52 na taofia ai o ia i le falepuipui ao faagasolo mai lana faamasinoga e fai ma ana faasalaga i lenei mataupu.

 

Ua fautuaina fo’i o ia ina ia auai i ni aoaoga e fesoasoani ai i le tulaga o le ita vave o lo o aafia ai o ia, ma ua faatonuina fo’i o ia e le faamasinoga e aua ne’i ona toe soliina se isi tulafono a le malo.

Comment Here