Tala otooto o Fa’amasinoga

SINAVE TUPUOLA

 

O le ali’i lea na ta’usala e le fa’amasinoga maualuga i le solitulafono mamafa o le fa’aoolima i le tulaga lua, ona o le fa’alavelave lea na ia sasaina le ulu o le isi ali’i i se atigi fagupia, ua poloaina e le fa’amasinoga e taofia o ia i le toese mo le umi e 6 masina, o se tasi lea o tuutuuga o lana nofovaavaaia e 5 tausaga.

 

Na fa’atoese le ali’i o Sinave Tupuola i luma o le faamasinoga i le aso Faraile na te’a nei, e tusa ai o lana solitulafono sa faia. Sa ia faatoese fo’i i le ali’i na aafia o Sefo Sefo, lea fo’i sa i ai i totonu o le potu fa’amasino i le taimi na lau ai lona fa’asalaga, ina ia fa’amagalo sona sese i lo la va.

 

E ui na finau le loia a Tupuola o Michael White i le fa’amasinoga e nofovaavaaia le ua molia, ae na finau le loia a le malo o Tony Graf e tuu atu se fa’asalaga faa falepuipui mo ia, se’i mafai ai ona ia a’oa’oina se lesona mai le mea sese sa ia faia.

 

Na maua le avanoa e molimau ai le ali’i na a’afia o Sefo i luma o le fa’amasinoga, e fa’atatau i le fa’alavelave sa tupu, aemaise ai, ua uma ona toe fa’aleleia lo la va ma Tupuola, ua ia fa’amagalo fo’i i ai.

 

Na fesili le loia o White ia Sefo pe aisea e masani ai ia Tupuola, ae na tali Sefo, o le ua molia o se uo mamae ia te ia, ua silia ma le 3 tausaga talu ona la masani, la te faigaluega fa’atasi fo’i.

 

Na taua e le alii faamasino sili lagolago ia Lyle L. Richmond e faapea, e foliga mai e mafanafana tele le mafutaga a Tupuola ma le ali’i na a’afia i lenei mataupu, ma ua faamaonia foi e le alii na aafia lona loto fa’amagalo i le alii ua molia, e ui i le matuia o manu’a na a’afia ai o ia.

 

E 20 masina na manatu le faamasinoga e taofia mo’i ai Tupuola i le toese, o se tasi lea o tuutuuga o lana nofovaavaaia e 5 tausaga, ae talu ai o ni isi o itu lelei ua fa’amauina mo ia, na manatu ai loa ali’i fa’amasino, ua lava le 6 masina na te tuliina i le toese, ae o isi masina e 14 o le a faamalumalu lona tuliina, fuafua lava lea i lona usitaia o poloaiga a le faamasinoga.

 

Ua talia foi e le faamasinoga le talosaga a Tupuola e tatala o ia i tua e faigaluega, ma e tatau ona tatala o ia i le itula e 5:00 i le taeao ae toe fo’i i totonu o le toese i le itula e 5 i le afiafi, o le aso Gafua e oo atu i le aso Faraile.

 

Ua faasa fo’i ona ia toe tagofia le ava malosi i totonu o le 5 tausaga o lana nofovaavaaia, pe ulufale fo’i i fale o lo o faatau ai le ava malosi, a ia auai ini aoaoga e fesoasoani ai i aafiaga o le ‘ava malosi, ma ia totogi le $85 o le pili o le falema’i a le ali’i na aafia i le taimi na taofia ai o ia.

 

FALETOI SEVI

 

O le aso 14 Aperila 2014 lea ua faatulaga e faia ai le ulua’i iloiloga o le mataupu a Faletoi Sevi i luma o le fa’amasinoga maualuga, ina ua ia teena i le aso Faraile na te’a nei moliaga fa’asaga ia te ia.

 

O lo o tuuaia e le malo ia Sevi i le moliaga o lona umia faasolitulafono o vaega o le laau faasaina o le mariuana, ma o lea mataupu na tula’i mai a’o taofia ai o ia i le toese i Tafuna e faatali ai le aso e faataunuu ai lona faamasinoga, ona o le isi fo’i mataupu na ulua’i tuuaia ai o ia e le malo, o lona umia faasolitulafono lea o vaeg o le laau faasaina o le mariuana, atoa ai ma lona umia faasolitulafono ma le faamoemoe e tulei ma faatau atu i isi tagata.

 

O le masina o Oketopa 2013 na taofia ai e leoleo Sevi mai luga o le vaa o le Lady Naomi, ina ua malaga asiasi mai i le teritori ae maua ai o lo o sau ma aumai mariuana, e ala i lona saisai o ni afifi i ona ogavae ma lona manava, ae saili ae e silia i le 200 sikaleti mariuana ua maea ona taai, ma lala mariuana lusi e le i taaia.

 

O lo o taofia pea i le toese le ua molia e fa’atali ai le aso lea ua faatulaga e toe fofogaina ai lana mataupu.

Comment Here