Ads by Google Ads by Google

Tala otooto o Fa’amasinoga

OTO TUPUA MA DORIAN SALAVEA

 

O ali’i e to’alua lea na ta’usala e le fa’amasinoga maualuga i le solitulafono o le fa’aoolima i le tulaga tolu, ua poloaina la te totogi le silia i le $3,000 mo le pili o le falema’i a le ali’i na a’afia i se gaioiga sa laua faia, o se tasi lea o tuutuuga o le la nofovaavaaia e 2 tausaga.

 

I le vaevaeina ai o le tupe e totogi e Tupua ma Salavea, ua poloaina ai le totogi e le tagata e toatasi o le $1,640, faatasi ai ma le salatupe a le tagata e $1,000.

 

O le mataupu ua faasala ai i laua ia e toalua, na afua mai i se faalavelave na tulula’i mai i le tausaga na te’a nei, ina ua la fasi fa’amo’amo’a se ali’i ‘ona sa pisapisao i le fanua o le latou aiga, ina ua fiu e faatali leoleo mo se fesoasoani, ma i’u ina la faaoolima ai i le alii na aafia ma gau ai lona auvae.

 

Na tau fai faatoese i laua uma nei i luma o le faamasinoga e tusa ai o le solitulafono sa laua faia, ma la talosagaina ai se isi avanoa mo i laua.

 

Na taua e Tupua ma Salavea e faapea, o le gaioiga sa la faia, sa le tatau ona tupu, ae ua avea lo la naunau e puipuia lo la aiga atoa ai ma le fanua mai faiga a le au ‘onana ma itu ua la soli ai le tulafono.

 

Sa la faatoese foi i le alii na aafia ma lona aiga ina ia faamagalo i laua e tusa ai o le mea sa tupu.

 

SEFO LEGA

 

Ua toe tolopo le lauina o le faasalaga a le alii o Sefo Lega i luma o le faamasinoga maualuga, ina ua fia maua e ali’i fa’amasino se ripoti mai le Ofisa o Femalagaaiga e faatatau i le tulaga o lo o i ai pepa nofomau a le ua molia.

 

O le aso la lea ua faatulaga e toe tula’i ai Lega i luma o le fa’amasinoga maualuga mo le fofogaina o lana faasalaga, o le a oo atu ai fo’i ma se sui mai le Ofisa o Femalagaaiga faapea ai ma lana sponsor, mo le faailoaina atu o le tulaga sa’o o lo o i ai pepa nofomau a le ua molia.

 

O le vaiaso na te’a nei na faatulaga e lau ai le faasalaga a le ali’i o Lega i luma o le faamasino sili lagolago, i le maea ai lea ona ta’usala o ia e le faamasinoga i le moliaga mamafa o le faaoolima i le tulaga lua.

 

Na faatoese le ua molia e tusa ai o lana solitulafono sa faia, ma ia talosagaina ai se isi avanoa mo ia. Sa ia faatoese fo’i i le ali’i na aafia i lenei mataupu, ina ia faamagalo o ia, ma faaiu ai loa lana talosaga i luma o le faamasinoga, mo se avanoa se’i fo’i atu ai i lona aiga e tausi lona tina, na o ia fo’i le tagata o lona aiga sa faigaluega i le taimi ae le i tula’i mai lenei mataupu.

 

Na finau le loia a Lega ia Michael White i le faamasinoga ina ia nofovaavaaia le ua molia, ae ua lava le umi lea ua maea ona ia tuliina i le falepuipui e avea ma ona faasalaga i lenei mataupu. Na taua fo’i e White e faapea, talu ai e i ai le aafiaga o le ava malosi ia Lega, e mana’omia ai le auai atu o ia i ni aoaoga e fesoasoani ai i le foiaina o lea faafitauli.

 

Na lagolagoina e le loia a le malo le i ai o le faafitauli o le ava malosi ia Lega, e manaomia fo’i le auai o ia i ni aoaoga e fesoasoani ai i aafiaga o le ‘ava malosi.

 

O tuuaiga faasaga ia Lega na alia’e mai i se faalavelave na tula’i mai i Malaeimi i le aso 13 Oketopa 2013, ina ua ia faaaoga se naifi faamoe e faaoo ai manu’a i le alii na aafia, e ala i lona ta tui faatolu o lona tauau.

 

SIVAI TEO

 

O le alii lea o lo o tuuaia i lona faia o ni uiga mataga i se tamaititi e laititi i lalo o le tulafono, ua toe tolopo lana mataupu mo le isi lua vaiaso ma le faamoemoe, o le a faalauiloa aloaia ai loa i le aso lea se maliliega o le a latou sainia ma le malo ma faamuta ai loa lana mataupu.

 

Ina ua toe valaau le mataupu a Sivai Teo i luma o le faamasinoga maualuga i le vaiaso nei, sa faailoa ai e lana loia fautua ia Karen Shelly le toeititi lea ona maea talanoaga o lo o faia ma le malo mo se maliliega, ma e i ai le talitonuga e tatau ona mautu nei feutanaiga i totonu o le isi lua vaiaso o lo o lumana’i nei.

 

O tuuaiga faasaga ia Teo na alia’e mai i se faalavelave na tula’i mai i le aso kerisimasi na te’a atu nei, ina ua ia taumafai e tagofia itutinosa o se tamaititi e 15 tausaga le matua, i le maea ai lea ona alu e faamanuia le kerisimasi i le aiga o le tamaititi ma lona tina.

 

O lo o taofia pea Teo i le toese i Tafuna e faatali ai le aso lea ua faatulaga e toe valaau ai lana mataupu i luma o le faamasinoga.