Ads by Google Ads by Google

Tala otooto o Fa’amasinoga

OFA KOMITI

 

Ua i luma nei o le fa’amasinoga le mataupu faasaga ia Ofa Komiti, ona o tuuaiga i lona ave faagaoi lea o se vaega tupe e silia i le $25,000 mai le kamupani o le O&O Company i Nuuuli sa galue muamua ai.

 

O lo o tuuaia faatasi e le malo ia Komiti ma Lisi Kwon i lenei mataupu, peitai e le o i ai Know i le taimi nei i le teritori, se’i vagana ai Komiti lea ua molia i moliaga mamafa e lua, le moliaga o le gaoi faapea ai ma le moliaga o lona ave faagaoi o ni tupe sa tuuina atu i lalo o lana vaavaaiga.

 

E tusa ai o faamaumauga a le faamasinoga o lo o taua ai e faapea, o le masina o Novema 2012 na faailoa ai e se sui o le kamupani i leoleo lenei mataupu, ma tofia ai loa le alii leoleo ia Elden Ane na te suesueina faamatalaga uma e uiga i le mea sa tupu.

 

Na taua e le sui o le kamupani i leoleo e faapea, o le tiute a Komiti ma Kwon, o le galulue lea e faapaleni tupe a le kamupani ma teu uma ana faamaumauga, ae ina ua siaki atu i le masina o Novema 2012 faamaumauga, sa maua ai le aofaiga o le tupe ua leiloa e $25,820.58.

 

Na taua i faamaumauga a le faamasinoga e faapea, sa i ai se sui o le kamupani na fesootai i ni isi o pisinisi o lo o aitalafu i le kamupani, ma faailoa i ai tulaga o a latou aitalafu, peitai sa faailoa ane e sui o ia pisinisi i le sui o le kamupani, ua maea ona totogi a latou aitalafu, ae ina ua sailia e le sui o le kamupani a latou faamaumauga, sa iloa ai e le o faamauina i totonu o a latou faamaumauga aitalafu a pisinisi e pei ona taua.

 

Na taua e le sui o le kamupani i leoleo e faapea, ina ua ia fesiligia Kwon i le aso 25 Oketopa 2012 e uiga i lenei mataupu, sa ia ioeina ai lona ave faagaoi o le tupe e $3,561.

 

Sa tuuaia e Kwon ia Komiti, o ia lea ua mafua ai ona ia faia lenei solitulafono, ona ua tele tausaga o gaoi e Komiti tupe mai le kamupani, ae le i faia lava i ai e le kamupani se faaiuga, o lo o tuuaia foi le faailoa e Komiti ia Kwon lo latou faia o lenei gaioia ma isi tagata faigaluega sa galulue muamua i le kamupani i tausaga ua mavae.

 

Ae ina ua fesiligia e leoleo ia Komiti, sa ia tuuaia ai Kwon o ia lea ua mafua ai ona ia faia lenei solitulafono, ina ua ia fautuaina o ia na te gaoiina mai tupe mai le kamupani.

 

Na taua fo’i e Komiti i leoleo e faapea, e le i tuana’i ni nai aso talu ona alu atu Kwon ma talanoa atu ia te ia e faatatau i le ave faagaoi o tupe mai teugatupe a le kamupani, ae te’i ina ua oo atu i le fale sa ia maua ai le $1,000 i totonu o lana ato, ae i le isi vaiaso e sosoo ai, sa ia maua ai fo’i le $700 i totonu o lana ato, o le isi vaiaso sa ia maua ai le $800, ma le masina o Novema 2012 sa ia maua ai fo’i le $1,000 i totonu o lana ato.

 

E tusa ai ma faamaumauga a le faamasinoga, e 15 faleoloa sa misi a latou faamaumauga o aitalafu mai api a le kamupani a le O&O, o lo o maua fo’i i faamaumauga a le kamupani, o le aso 25 Oketopa e o o atu i le aso 15 Novema 2012 na faatinoina ai e i laua ua molia nei gaioiga.

 

JAMES BARLOW

 

O le ali’i lea sa avea ma faiaoga o le Kolisi Tuufaatasi a Amerika Samoa, lea o lo o tuuaia i lona faia o amioga mataga i ni ali’i aoga se to’atolu, ua ia talosaga i le fa’amasinoga maualuga e faatulaga loa se aso e faia ai lana faamasinoga iloilo i luma o ali’i fa’amasino (Bench Trial).

 

O tuuaiga faasaga ia Barlow na alia’e mai i le tausaga na te’a nei, ina ua taofi e leoleo lana taavale ona o tu’uaiga i le ave ta’avale ‘ona, ae maua atu ai e leoleo ma ni alii talavou i totonu o le ta’avale a le ua molia, o lo o ‘onana uma fo’i.

 

O le taimi na fesiligia ai e leoleo ali’i talavou i le mafuaaga o le latou i ai i totonu o le ta’avale a Barlow, na fa’amatala ai loa e i latou mea uma sa tutupu i le va o i latou ma le ua molia, e aofia ai le faia e le ua molia o ni uiga mataga ia te i latou i lona fale, a’o lumana’i ai le taimi na taofia ai i latou e leoleo.

 

O lo o taofia pea Barlow i le toese i Tafuna i le taimi nei, ina ua le mafai ona ia totogi le tupe e $100,000 sa faatulaga e tatala ai o ia i tua.