VIANE SOONALOLE

Ua toe tolopo i le aso 14 Fepuari le lauina o le faasalaga a le ali’i o Viane Soonalole e le fa’amasinoga maualuga, ona o nisi o tulaga ua fautuaina e le alii faamasino sili ia Michael Kruse loia a itu e lua, e ao ona toe silasila i ai i le mataupu a lenei ali’i talavou.

O Soonalole na faatulaga e lau lona faasalaga i le aso Faraile na te’a nei, ina ua maea ona ta’usala o ia e le faamasinoga i le moliaga mamafa o le tapele fale i le tulaga lua, ae i se vaega o le ripoti a le Ofisa Nofovaavaaia na silasila i ai le faamasinoga, o lo o atagia mai ai e foliga mai e le talafeagai le moliaga lea ua ta’usala ai Soonalole ma le si’osi’omaga o le faalavelave sa tula’i mai.

O le fale lea na osofaia e le ua molia, o le fale a lona uncle o lo o nofo ai, pau lana gaioiga sa faia, o le talepe lea o le Ofisa a lona uncle o lo o i totou o le fale, ma e manatu le fa’amasinoga, e talafeagai i ai le solitulafono o le tu fua i le fale o le isi tagata (trespass), ina ua tu fua i le Ofisa o lona uncle e aunoa ma se faatanaga, ae le talafeagai le talepe fale ona o Soonalole e nofo ai lava i le fale lea a lona uncle.

Ua tatala nei i tua e le faamasinoga le ali’i o Soonalole, 19 tausaga le matua i lalo o le vaavaaiga a lona uncle lea sa nofo muamua ai, e faatali ai le aso lea ua faatulaga e lau ai lona faasalaga.

FOLASA GALEA’I

E 2 tausaga lea ua nofovaavaaia ai le ali’i o Folasa Galea’i i se faaiuga a le fa’amasinoga maualuga i le vaiaso na te’a nei, faatasi ai ma le poloaiga na te totogiina le salatupe e $1,000. O se tasi lea o tuutuuga o lona nofofaavaavaia.

O Galea’i na ulua’i tuuaia e le malo i le moliaga mamafa o lona umia faasolitulafono lea o vaega o le pauta faasaina o le aisa, ma le faamoemoe e tulei ma faatau atu i isi tagata, ae i lalo o se maliliega sa latou sainia ma le malo ma talia e le faamasinoga, sa ia tali ioe ai i le moliaga mamafa i lona fesoasoani lea i se isi tagata e faatino le solitulafono o le umia faasolitulafono o vaega o le pauta faasaina o le aisa.

Ua poloaina fo’i e le faamasinoga ia Galea’i ina ia aua ne’i ona toe solia se tulafono a le malo, a ia avea o ia ma tagatanuu lelei i usita’i i tulafono i taimi uma.

O tuuaiga faasaga ia Galea’i na afua mai ina ua alu atu e piki mai se afifi sa aumai i lona igoa i le falemeli a le malo tele i Fagatogo, ae maua ai ma se vaega o le pauta oona o le aisa o lo o aumai faanana i totonu o ni apa tamato.

Ina ua fesiligia e leoleo le ua molia e faatatau i le afifi na alu atu e piki mai, sa ia taua ai o le afifi a lona uncle, peitai na te le i ta’uina i leoleo le igoa o lona uncle.

MARK MULIPOLA

O le ali’i lea o lo o tuuaia i lona faaoolima i lona tama, e ala i lona faaaoga o se agaese e faaoo ai manu’a ia te ia i le tausaga na te’a nei, ua ia talosaga i le fa’amasinoga maualuga e faatulaga loa se aso e faia ai lana faamasinoga autu.

O le aso 6 Oketopa 2014 lea ua faatulaga e le faamasinoga e faia ai le faamasinoga autu o Mark Mulipola, ma o lo o taofia pea o ia i le toese i Tafuna.

O le vaiaso na te’a nei na faamoemoe e tatau ona o o atu ai ua maea se suesuega a le Foma’i o le mafaufau faasaga i le tulaga o lo o i ai le malosi o le mafaufau a le ua molia, pe gafatia fo’i ona ia tula’i e tali i tuuaiga faasaga ia te ia i le taimi o lana faamasinoga iloilo.

Ae ina ua toe valaau lana mataupu i le vaiaso na te’a nei, sa talosaga ai loa le ua molia ina ia faatulaga loa se aso e faia ai lana faamasinoga.

O tuuaiga faasaga ia Mulipola na afua mai ina ua faatonu e lona tama o ia e alu e ao mai le vai e fai ai le fofo ae musu, ona tuli lea e lona tama o ona tei laiti e ao mai le vai, ae ina ua savali atu le tama e aga’i atu i le isi a latou fale, na faafuase’i ona oso atu le ua molia ma se agaese ma faaoo ai manu’a ia te ia.