Ads by Google Ads by Google

Tala otooto o Fa’amasinoga

TATALA I TUA SAUSAULELE SIUA

 

Ua talia e le Faamasinoga Maualuga le fautuaga a le Ofisa Faanofovaavaaia, ina ia tatala i tua le alii o Sausaulele Siua mai le toese.

 

E 20 masina lea na faasala ai Siua, ina ua faamaonia lona moliaga o le faaoolima i se tama’ita’i i Tafuna, ina ua te’ena e le tama’ita’i ona mana’oga tu’inanau.

 

Na faailoa e le alii faamasino sili lagolago ia Lyle L. Richmond ia Siua e faapea, afai na te le usitaia tuutuuga ua tuu atu e le faamasinoga ia te ia, o le a misi lona avanoa ua maua.

 

NOFOVAAVAAIA CHELLETTE FOSTER MO LE TOLU TAUSAGA

 

E tolu tausaga nofo vaavaaia lea ua faasala ai e le Faamasinoga Maualuga ia Chellette Foster Metuli, ina ua tausala o ia i moliaga mamafa e lua o le  gaoi ma le fa’aaoga o se ‘credit card’ sa ia gaoia.

 

A’o lei tuuina atu le faasalaga o Metuli, sa ia faatoese i le faamasinoga, le malo faapea i latou na aafia i lana gaioiga sa faia, aemaise ai lona aiga ua ta’uvalea ona o ia.

 

Na faaiu lana faatoesega i lona talosagaina o le faamasinoga mo se avanoa sei faaauau ai lana tausiga i lana pepe e ono masina o lo o i le fale. Na faailoa foi e le ua molia i le faamasinoga e faapea, o ia e le toe fia oo i le falepuipui, ma o lana toe tulai foi lea i luma o le faamasinoga.

 

Na finau le loia a Metuli o Leslie Cardin  ina ia faanofovaavaaia le ua molia, ae aua nei toe tuuina atu i le falepuipui. Fai mai Cardin, o le faalavelave lea ua mafua ai ona molia Metuli, e le masani ai lona olaga, ma ua maea foi ona ia toe totogi le tupe na ia ave faagaoi.

 

Na talia e le faamasinoga le faafinauga a Cardin faatasi ai ma le faatoesega a le ua molia.  Ua faatonuina Metuli ina ia totogia se salatupe e $1,000 i totonu o le tolu masina..

 

“O lea ua avatu e le faamasinoga le avanoa ia te ia, o le fautuaga, faaaoga tatau le avanoa ma aua e te toe soliina se tulafono,” o le saunoaga lea a le alii faamasino sili lagolago ia Lyle L. Richmond ia Metuli.

 

SAUNI ERNIE TAO E TALI IOE I TUUAIGA A LE MALO

 

O le alii lea na tuuaia i lona fasi faamo’amo’a o lana uo teine ao la tafafao ai i se fale kalapu, ua ia sauni e sainia se maliliega ma le malo mo le tuuina atu o lana tali ioe i luma o le faamasinoga faasaga i tuuaiga a le malo.

 

O le alii o Ernie Tao lea o lo o tuuaia i le moliaga o le faaoolima i le tulaga lua ma le faatupu vevesi i nofoaga faitele, ua faamoemoe e toe tulai i le taeao nei mo le fofogaina o le latou maliliega ma le malo.

 

O tuuaiga faasaga ia Tao na afua mai i le faalavelave na tulai mai i le Bowling Alley i le tausaga na te’a nei, ina ua ia fasia lana uo teine i fafo o le vaega e paka ai taavale ma manu’a tigaina ai le na aafia.

 

O lo o taofia pea Tao i le toese i Tafuna e faatali ai taualumaga o lana mataupu i luma o le faamasinoga maualuga.