Ads by Google Ads by Google

Tala otooto o Fa’amasinoga

MOLIA LE UNCLE MA’ITAGA AI LONA NIECE

 

O le uncle lea o lo o tuuaia i le ma’itaga ai o le niece a lona to’alua sa latou nonofo faatasi, ua molia nei i moliaga o le tagofia o itutinosa o se tama’ita’i e talavou i lalo o le tulafono, faia o uiga mataga faafeusuaiga, atoa ai ma lona faia o ni gaioiga e ono lamatia ai le saogalemu o fanau e laiti i lalo o le tulafono.

 

O le a le mafai e le Samoa News ona faalauiloa le igoa o le ua molia, ona o puipuiga i le ono mafai lea ona iloa ai ma le igoa o le tama’ita’i o lo o a’afia i lenei mataupu.

 

O le vaiaso na te’a nei sa tula’i ai le ua molia i luma o le faamasinoga maualuga, ma ia teena ai tuuaiga faasaga ia te ia, ma ua faatulaga ai loa le isi ana iloiloga e faia lea i le faaiuga o le masina fou.

 

O le fa’alavelave ua molia ai le uncle, na alia’e mai i le lua tausaga talu ai a’o nofo aoga le teineititi na aafia i le fale o le ali’i ua molia. Ina ua alia’e le mataupu ma ma’itaga ai le teineititi na aafia, sa faatoese le ua molia i le aiga o le tama’ita’i na aafia, ma taua ai le toe teuteu i tua o lenei mataupu.

 

O lo o taofia pea le ua molia i le toese i Tafuna, ina ua le mafai ona ia totogi le $50,000 na faatulaga e le faamasinoga e tatala ai o ia i tua.

 

TOIVASA SU’A

 

Ua poloaina e le alii faamasino sili ia Michael Kruse le tuuina atu o le mataupu faasaga ia Toivasa Su’a, e fofogaina lea i luma o le Faamasinoga o Aiga, Fualaau Faasaina ma le ‘Avamalosi (FDA Court), ona o lo o aafia ai i lea mataupu faamatalaga faasaga i fanau laiti.

 

O le vaiaso na te’a nei na faatulaga e lau ai le faasalaga a le alii o Su’a, ina ua faamaonia e le faamasinoga tuuaiga faasaga ia te ia, i lona sauaina lea o lona afafine i se auala na matua manu’a tigaina ai lona tino.

 

Ua poloaina fo’i e le faamasinoga le Ofisa Nofovaavaaia, ina ia saunia se ripoti e faamatala atu ai tulaga o manu’a na aafia ai le teineititi na aafia, se’i malamalama ai le faamasinoga i tulaga matuia sa i ai manu’a na aafia ai lenei teineititi.

 

Na taua e le loia a le ua molia ia Karen Shelly i le faamasinoga e faapea, e ui o le sasa o fanau o se auala lea e faaaoga e nisi o matua Samoa e a’oa’i ai a latou fanau, peitai sa tatau fo’i ona malamalama le ua molia i le tulafono e faasa ai ona faapologa fanau.

 

E ui i le matuia o le mea sa tupu ae na taua e le Shelly e faapea, o lo o soifua maloloina le teineititi na aafia i lalo o le tausiga a le ua molia i le taimi nei, ma e le o toe i ai fo’i se isi faalavelave o toe tula’i mai talu mai le mataupu e pei ona molia ai o ia.

 

Ae na finau le loia a le malo ia Camille Phillippe e faapea, talu ai le matuia o manu’a na aafia ai le tino o le na aafia, e tatau ai ona i ai se faasalaga faa falepuipui e tuu atu mo le ua molia, ina ia avea lea ma lesona i lona mafaufau lenei faalavelave.

 

Ua toe tolopo lenei mataupu i le masina fou.

 

ALLEN APELU

 

E lua tausaga lea ua nofovaavaaia ai se ali’i lea na ta’usala i lona tu’iina o se ave taxi, e mafua mai i se inugapia sa faia i Iliili i le mae’a ai o se fa’aipoipoga sa faia i le va o aliga e lua.

 

O le vaiaso na te’a nei na fofogaina ai le faasalaga a le faamasinoga faaitumalo faasaga i le alii o Allen Apelu, lea na ta’usala i moliaga mama e lua o le faaoolima i le tulaga tolu atoa ai ma le faaleaga meatotino i le tulaga tolu.

 

A’o le i tuuina atu le faasalaga a le faamasinoga faasaga ia Apelu i le vaiaso na te’a nei, na muamua faatoese le ua molia e tusa ai o le faalavelave sa tupu, ma ia talosagaina ai le faamasinoga ina ia faamagalo lana solitulafono sa fai.

 

Na taua e Apelu, ua maea ona toe teuteu le mataupu sa tula’i mai i le va o ia ma le alii ave taxi, ma ua toe faaleleia tulaga uma sa feeseesea’i ai o la aiga.

 

Na talosaga o ia i le faamasinoga mo se avanoa se’i faaauau ai pea lana tausiga i lana fanau, aemaise ai o lea faatoa 5 masina talu ona galue i lana galuega fou ua i ai nei i le malo. Sa ia ta’utino fo’i e faapea, ua atoa nei le masina e le i toe tago i le ‘ava malosi ma le sikaleti, ma ua tele fo’i se lesona sa ia a’oa’oina mai i aso e 5 na taofia ai o ia i le toese i le tausaga na te’a nei, ona o lenei mataupu.

 

Na tutu faatasi loia e lagolago le fautuaga a le ofisa nofovaavaaia, ina ia nofovaavaaia le ua molia ae aua nei i ai se faasalaga faa falepuipui e tuuina atu ia te ia.

 

Na faailoa e le alii faamasino ia John Ward II ia Apelu e faapea, o le itu taua ua ia a’oa’oina se lesona mai le mea sese sa ia faia, ae tatau fo’i ona ia iloa, ua avea le ‘ava malosi sa ia tagofia i lea po ma itu na sese ai lana faaiuga sa faia.

 

E le gata e $175 le salatupe ua totogi e Allen, ae ua poloaina fo’i o ia na te totogiina le tioata o le taavale a le alii na aafia.

 

Ua poloaina e le faamasinoga le ua molia ina ia aua ne’i ona toe tagofia le ava malosi i totonu o le 2 tausaga o lana nofovaavaaia, a ia auai i ni aoaoga e fesoasoani ai i le tulaga o le ita ma le tagofia o le ava malosi.