Tala otooto o Fa’amasinoga

MOLIA SE ALI’I I LE FAIA O UIGA MATAGA I SE TEINEITITI

 

O lo o taofia pea i le toese i Tafuna se ali’i pe a ma le 26 tausaga le matua, ona o tu’uaiga i lona faia lea o uiga mataga i se teineititi e 12 tausaga le matua, o le uso laititi fo’i lea o lona to’alua.

 

O le a le mafai e le Samoa News ona faalauiloa le igoa o le ali’i ua molia ona o puipuiga i le ono mafai ai lea ona iloa le teineititi o lo o a’afia i lenei mataupu, ae tusa ai o faamaumauga a le faamasinoga o lo o taua ai e faapea, o le mataupu lenei na tula’i mai i se nuu i le itu i sisifo o le atunuu i le lua vaiaso talu ai, ona ua logo e le tina o le teineititi na aafia le ofisa o leoleo mo se fesoasoani, ma aga’i atu ai loa leoleo mo le suesueina o lenei mataupu.

 

I faamaumauga a le faamasinoga o lo o taua ai e faapea, o le faalavelave na tula’i mai ina ua alu atu le ua molia ma taumafai e tagofia le itutinosa o le uso laititi a lona to’alua, sa latou nonofo faatasi i le aiga o le alii ua molia i le taimi na tula’i mai ai le faalavelave.

 

Ina ua fesiligia e leoleo le ali’i ua molia i le taimi na tula’i mai ai le faalavelave, sa faalogoina ai le manogi pia i lona tino, e atagia mai ai sa ‘ona o ia i le taimi na tula’i mai ai le fa’alavelave.

 

O moliaga faasaga i le alii ua molia e aofia ai lona tagofia o itutinosa o se teineititi e laititi i lalo o le tulafono, atoa ai ma lona faia o se gaioiga e ono lamatia ai lona saogalemu.

 

E $10,000 le vaega tupe lea ua faatulaga e le faamasinoga e totogi ona faatoa mafai lea ona tatala le ua molia i tua, e faatali ai taualumaga o lana mataupu lea ua faagasolo i luma o le faamasinoga maualuga i le taimi nei.

 

MANA’O ISUMU E FAATULAGA FAAMASINOGA AUTU

 

O le alii pagota lea o lo o tuli sona faasalaga soloatoa i le toese i Tafuna, ae o lea ua toe molia i le sola ese mai le toese i Tafuna i le tausaga na te’a nei, ua ia talosaga i le faamasinoga e faatulaga loa se aso e faia ai lana faamasinoga autu.

 

O ananafi na faatulaga ai le ulua’i iloiloga a le alii o Maeli ‘Isumu’ Pitoitua i luma o le faamasinoga maualuga, ae ina ua valaau lana mataupu, sa faailoa e lana loia fautua ia Mike White le mana’o o Isumu e faatulaga loa se aso e faia ai lana faamasinoga autu, lea ua faatulaga ia Mati 2, 2015.

 

O lo o molia Isumu i le moliaga mamafa e tasi o le sola i tua mai le toese i Tafuna, ona o se faalavelave na tula’i mai i le masina o Iula 2013, lea na tuuaia ai o ia i lona sola i tua ma la momoe ai ma le to’alua o se ali’i sa sifi i se tasi o kamupani i le taulaga.

 

MATULINO TAUALII

 

O le alii talavou mai Savaii lea o lo o tuuaia e le malo i le moliaga mamafa o le fasioti tagata i le tulaga muamua, ona o le faalavelave lea na maliu ai se alii mai Fagaalu ia te ia i le tausaga na te’a, ua faatulaga o le aso 15 Fepuari 2015 e faia ai lana faamasinoa autu i luma o tagatanuu o Amerika Samoa.

 

Ina ua valaau le mataupu a Matulino Taualii i le taeao ananafi, na faailoa e lana loia fautua ia Douglas Fiaui le mana’o o le ua molia e faatulaga loa se aso e faia ai lana faamasinoga autu.

 

O se vevesi na tula’i mai i se inugapia sa faia i le va o Taualii ma le alii ua maliu, na faai’u ai loa i le ta e le ua molia o le ulu o le alii ua maliu i le samala ma manu’a tigaina ai, mulimuli ane ina ua tuana’i ni nai aso talu ona taofia le alii na manu’a i le falema’i, ae maliu loa o ia ona o le matuia o manu’a sa aafia ai lona ulu.

 

O lo o taofia pea le ua molia i le toese i Tafuna e faatali ai le taimi ma le aso lea ua faatulaga e faia ai lana faamasinoga autu.

Comment Here